ພະນະທ່ານຮອງນາຍົກ, ລັດຖະມົນຕີວ່າການກະຊວງການຕ່າງປະເທດ ສຳເລັດການເຂົ້າຮ່ວມກອງປະຊຸມລັດຖະມົນຕີ ອາຊຽນ-ອີຢູ ຄັ້ງທີ 17 ວັນທີ 27-28 ພຶດສະພາ ທີ່ ພະນົມເປັນ
ພະນະທ່ານ ດຣ.ທອງລຸນ ສີສຸດລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມລັດຖະມົນຕີ ອາຊຽນ-ອີຢູ ຄັ້ງທີ 17 ໃນລະຫວ່າງວັນທີ 27-28 ພຶດສະພາ 2009, ທີ່ ພະນົມເປັນ ພາຍໃຕ້ການເປັນປະທານຂອງລັດຖະມົນຕີວ່າການກະຊວງການຕ່າງປະເທດກຳປູເຈຍ ແລະ ປະທານຮ່ວມຈາກ ສ.ເຊັກ.
ກອງປະຊຸມຄັ້ງນີ້, ໄດ້ປຶກສາຫາລື ກ່ຽວກັບ ການຮ່ວມມືໃນຂອບ ອາຊຽນ-ອີຢູ ໃນໄລຍະຜ່ານມາ ພ້ອມທັງກຳນົດທິດທາງການຮ່ວມມື ໃນອະນາຄົດ. ທັງສອງຝ່າຍຍັງໄດ້ປຶກສາຫາລືສະພາບການຢູ່ສອງພາກພື້ນ ແລະ ແລກປ່ຽນຄຳເຫັນຕໍ່ສະພາບການໃນພາກພື້ນ ແລະ ສາກົນທີ່ມີຄວາມເປັນຫ່ວງເປັນໃຍຮ່ວມກັນ ໂດຍສະເພາະການແກ້ໄຂວິກິດການເງິນໂລກ ເຊິ່ງຈຸດໜັກແມ່ນສະເໜີບໍ່ໃຫ້ນຳໃຊ້ນະໂຍບາຍ ປົກປ້ອງຕະຫລາດພາຍໃນ.
ພ້ອມດຽວກັນນີ້, ອີຢູ ຍັງໄດ້ໃຫ້ຄວາມໝັ້ນໝາຍທີ່ຈະສະໜັບສະໜູນການເຊື່ອມໂຍງ ແລະ ການສ້າງປະຊາຄົມອາຊຽນ ໂດຍຈະໃຫ້ການ ຊ່ວຍເຫລືອໃນການຈັດຕັ້ງຜັນຂະຫຍາຍກົດບັດອາຊຽນ ໂດຍເນັ້ນໃສ່ຜັນຂະຫຍາຍ 3 ເສົາຄ້ຳ ແລະ ແຜນງານ IAI ໄລຍະ 2.
ຝ່າຍອີຢູ ຍັງໄດ້ໃຫ້ຄວາມສົນໃຈຕໍ່ຫລາຍບັນຫາສຳຄັນ ແລະ ລະອຽດອ່ອນ ເຊັ່ນ: ບັນຫາສິດທິມະນຸດ ແລະ ປະຊາທິປະໄຕ ໂດຍສະເພາະແມ່ນເພີ່ມຄວາມສົນໃຈການຮ່າງພາລະບົດບາດ (TOR) ຂອງໜ່ວຍງານສິດທິມະນຸດອາຊຽນ ແລະ ການສ້າງກົນໄກແກ້ໄຂຂໍ້ຂັດແຍ່ງຂອງອາຊຽນ, ພິເສດແມ່ນໄດ້ເນັ້ນໃສ່ບັນຫາສະພາບການໃນ ມຽນມາ ແລະ ການທົດລອງອາວຸດນິວເຄຣຍ ແລະ ລູກສອນໄຟໃນໄລຍະໃກ້ຂອງ ສປປ ເກົາຫລີ. ນອກນີ້, ຝ່າຍອີຢູ ຍັງມີຄວາມສົນໃຈຢາກເຂົ້າມາມີສ່ວນຮ່ວມໃນກິດຈະກຳຂອງ ກອງປະຊຸມອາຊີຕາເວັນອອກ (EAS).
ຄະນະຜູ້ແທນເຮົາ ກໍ່ໄດ້ປະກອບສ່ວນຄຳຄິດຄຳເຫັນໃນຖານະເປັນຜູ້ສະເໜີບັນຫາການຄ້ຳປະກັນສະບຽງອາຫານ ແລະ ພະລັງງານ ໂດຍໄດ້ເນັ້ນໃສ່ສົ່ງເສີມການຜະລິດ ແລະ ນຳໃຊ້ພະລັງງານທີ່ບໍ່ບົກແຫ້ງ ແລະ ບໍ່ເປັນພິດຕໍ່ສິ່ງແວດລ້ອມ ເປັນຕົ້ນພະລັງງານໄຟຟ້ານ້ຳຕົກ, ພະລັງງານຊີວະພາບ ແລະ ພະລັງງານແສງຕາເວັນ. ພິເສດ ແມ່ນຄະນະຜູ້ແທນລາວມີຄວາມເຫັນ ກ່ຽວກັບ ບັນຫາສິດທິມະນຸດ ໂດຍໄດ້ຊີ້ແຈ້ງໃຫ້ເຫັນສະພາບຈຸດພິເສດ ແລະ ເງື່ອນໄຂຕົວຈິງຂອງອາຊຽນ ອັນໄດ້ເຮັດໃຫ້ ຝ່າຍອີຢູ ມີຄວາມເຂົ້າໃຈ ອາຊຽນ ຫລາຍຂຶ້ນ.
ກອງປະຊຸມລັດຖະມົນຕີ ອາຊຽນ-ອີຢູ ຄັ້ງທີ 17 ນີ້, ໄດ້ບັນລຸຜົນສຳເລັດຕາມເປົ້າໝາຍທີ່ວາງໄວ້ ໂດຍມີ 3 ເອກະສານທີ່ສຳຄັນຮ່ວມກັນ ຄື: 1. ບັນດາລັດຖະມົນຕີ ໄດ້ລົງນາມໃນຖະແຫລງການເພື່ອອະນຸຍາດໃຫ້ ອີຢູ ເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ (TAC) ພາຍຫລັງທີ່ທຸກພາຄີໄດ້ສັດຕະຍາບັນດັດແກ້ TAC ສະບັບ 3; 2. ບັນດາລັດຖະມົນຕີ ໄດ້ຮັບຮອງເອົາແຜນງານພະນົມເປັນ ເພື່ອຈັດຕັ້ງຜັນຂະຫຍາຍຖະແຫລງການ ນູເຣັມເບີກ ສຳລັບສົກປີ 2009-2010; 3. ປະທານຮ່ວມ ໄດ້ອອກຖະແຫລງການຮ່ວມຂອງຕົນໂດຍໄດ້ກວມເອົາເນື້ອໃນຈິດໃຈທີ່ກອງປະຊຸມໄດ້ປຶກສາຫາລື ແລະ ຕົກລົງກັນ.
ພ້ອມກັນນັ້ນ, ຄະນະຜູ້ແທນລາວ ກໍ່ໄດ້ມີການພົບປະສອງຝ່າຍກັບຄະນະຜູ້ແທນ ໂປໂລຍ, ອັງກິດ, ບຸນກາລີ, ອີຕາລີ, ລິດຕູອາເນຍ ແລະ ສະໂລເວເນຍ ເພື່ອປຶກສາຫາລື ກ່ຽວກັບ ການຮ່ວມມືສອງຝ່າຍ.
ນອກນັ້ນ , ບັນດາຫົວໜ້າຄະນະຜູ້ແທນຂອງປະເທດອາຊຽນ ແລະ ອີຢູ ທັງໝົດກໍ່ໄດ້ເຂົ້າເຝົ້າ ພະບາດສົມເດັດ ໂນໂຣດົມ ສີຫາໂມນີ, ພະມະຫາເຈົ້າຊີວິດແຫ່ງ ຣາຊະອານາຈັກກຳປູເຈຍ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
