ພະນະທ່ານນາຍົກລັດຖະມົນຕີແຫ່ງ ສປປ ລາວ ເດີນທາງໄປຮ່ວມກອງປະຊຸມສຸດຍອດ ເພື່ອສະຫລອງການພົວພັນ ອາຊຽນ-ສ.ເກົາຫລີ ຄົບຮອບ 20 ປີ
ໃນວັນທີ 30 ພຶດສະພາ 2009, ຄະນະຜູ້ແທນຂັ້ນສູງຂອງ ສປປ ລາວ ນຳໂດຍພະນະທ່ານ ບົວສອນ ບຸບຜາວັນ, ນາຍົກລັດຖະມົນຕ ແຫ່ງ ສປປ ລາວ ອອກເດີນທາງໄປຮ່ວມກອງປະຊຸມສຸດຍອດ ເພື່ອສະຫລອງການພົວພັນ ອາຊຽນ-ສ.ເກົາຫລີ ຄົບຮອບ 20 ປີ ທີ່ເກາະເຈຈູ, ສ.ເກົາຫລີ ຊຶ່ງຈັດຂຶ້ນໃນລະຫວ່າງວັນທີ 1-2 ມິຖຸນາ 2009. ໃນໂອກາດນີ້, ພະນະທ່ານນາຍົກລັດຖະມົນຕີເຮົາ ຍັງຈະໄດ້ ເຂົ້າຮ່ວມກອງປະຊຸມສຸດຍອດຜູ້ບໍລິຫານທຸລະກິດສູງສຸດຂອງ ອາຊຽນ ແລະ ສ.ເກົາຫລີ ແລະ ການພົບປະສອງຝ່າຍລະຫວ່າງ ສປປ ລາວ ກັບ ລັດຖະບານ ສ.ເກົາຫລີ.
ກອງປະຊຸມສຸດຍອດເພື່ອສະຫລອງການພົວພັນ ອາຊຽນ-ສ.ເກົາຫລີ ໃນຄັ້ງນີ້, ແມ່ນມີຄວາມໝາຍສຳຄັນສຳລັບ ອາຊຽນ ແລະ ສ.ເກົາຫລີ ເພາະເປັນກອງປະຊຸມສຸດຍອດຂອງບັນດາຜູ້ນຳສູງສຸດທັງສອງຝ່າຍ ເພື່ອທົບທວນຄືນ ກ່ຽວກັບ ການສ້າງຕັ້ງການພົວພັນ ອາຊຽນ-ສ.ເກົາຫລີ ຕະຫລອດໄລຍະສອງທົດສະຫວັດທີ່ຜ່ານມາ ແລະ ນອກນີ້, ຍັງມີກອງປະຊຸມສຸດຍອດເພື່ອພົບປະລະຫວ່າງບັນດາຜູ້ນຳສູງສຸດ ອາຊຽນ ກັບບັນດາຜູ້ບໍລິຫານທຸລະກິດສູງສຸດ ເຊິ່ງຈະໄດ້ຈັດຂຶ້ນໃນໂອກາດດຽວກັນ.
ກອງປະຊຸມສຸດຍອດດັ່ງກ່າວ, ຍັງເປັນໂອກາດດີໃຫ້ແກ່ຜູ້ນຳ ອາຊຽນ ແລະ ຜູ້ນຳ ສ.ເກົາຫລີ ຮ່ວມກັນທົບທວນຄືນຜົນສຳເລັດ ແລະ ຂໍ້ຄົງຄ້າງຕ່າງໆຂອງການຮ່ວມມື ອາຊຽນ-ສ.ເກົາຫລີ ໃນໄລຍະ 20 ປີຜ່ານມາ ແລະ ວາງທິດທາງການຮ່ວມມືໃນອະນາຄົດໃຫ້ສອດຄ່ອງ ກັບສະພາບຄວາມເປັນຈິງຂອງພາກພື້ນ ແລະ ສາກົນ. ອັນສຳຄັນຍິ່ງແມ່ນບັນດາຜູ້ນຳຂອງທັງສອງຝ່າຍຈະໄດ້ຖືເອົາໂອກາດນີ້ ສືບຕໍ່ປຶກສາ ຫາລືເພື່ອຫາວິທີທາງແກ້ໄຂບັນຫາທ້າທາຍຕ່າງໆ ເຊັ່ນ: ການແກ້ໄຂບັນຫາຜົນກະທົບທີ່ເກີດຈາກວິກິດການເສດຖະກິດ ແລະ ການເງິນໂລກ, ການຄ້ຳປະກັນຄວາມໝັ້ນຄົງດ້ານພະລັງງານ, ການປ່ຽນແປງຂອງດິນຟ້າອາກາດ, ບັນຫາພາກພື້ນ ແລະ ສາກົນອື່ນໆທີ່ມີ ຄວາມສົນໃຈຮ່ວມກັນ.
ກອງປະຊຸມສຸດຍອດ ອາຊຽນ-ສ.ເກົາຫລີ ຄັ້ງນີ້, ຍັງເປັນໂອກາດສຳຄັນສຳລັບ ສປປ ລາວ ເພື່ອສືບຕໍ່ໂຄສະນາເຜີຍແຜ່ນະໂຍບາຍ ການຕ່າງປະເທດແຫ່ງສັນຕິພາບ, ເອກະລາດ, ມິດຕະພາບ ແລະ ການຮ່ວມມື ແລະ ເຜີຍແຜ່ນະໂຍບາຍການລົງທຶນໃນ ສປປ ລາວ. ພ້ອມດຽວກັນນີ້, ກໍ່ເປັນການຍົກຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນໃຫ້ນັບມື້ນັບສູງຂຶ້ນເລື້ອຍໆ ທັງເປັນການເປີດໂອກາດໃຫ້ ສປປ ລາວ ຍາດແຍ່ງການຊ່ວຍເຫລືອ ກໍ່ຄືການຂົນຂວາຍທຶນຈາກບັນດາປະເທດສະມາຊິກ ອາຊຽນ ແລະ ສ.ເກົາຫລີ ທັງໃນຂອບສອງຝ່າຍ ແລະ ໃນຂອບຫລາຍຝ່າຍ ເພື່ອມາຈັດຕັ້ງປະຕິບັດກິດຈະກຳການຮ່ວມມືຕ່າງໆ ເພື່ອປະກອບສ່ວນ ເຂົ້າໃນການແກ້ໄຂບັນຫາທ້າທາຍຫລາຍປະການ ແລະ ຍັງເປັນການຊຸກຍູ້ໃຫ້ ສ.ເກົາຫລີ ເພີ່ມທະວີການຊ່ວຍເຫລືອໃຫ້ແກ່ ອາຊຽນ ໃນການຮັດແຄບຄວາມແຕກໂຕນດ້ານການພັດທະນາ ແລະ ໂຄງການຕ່າງໆຂອງຂໍ້ລິເລີ່ມ ເພື່ອການເຊື່ອມໂຍງ ອາຊຽນ (IAI) ໄລຍະທີ 2 ເພື່ອໃຫ້ບັນລຸເປົ້າໝາຍ ກໍ່ຄືການສ້າງປະຊາຄົມອາຊຽນໃຫ້ສຳເລັດໃນປີ 2015 ຕາມທີ່ກຳນົດໄວ້.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
