ສະຫລອງວັນຊາດ ສ.ສ ຫວຽດນາມ ຄົບຮອບ 63 ປີ

ໃນຕອນຄໍ່າວັນທີ 1 ກັນຍາ 2008 ນີ້, ທ່ານ ດຣ ທອງລຸນ ສີສຸລິດ, ຫົວໜ້າຄະນະພົວພັນ ຕ່າງປະເທດສູນກາງພັກ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ພ້ອມ ບັນດາທ່ານລັດຖະມົນຕີວ່າການ ແລະ ຊ່ວຍວ່າການ, ບັນດາທູຕານຸທູດ, ບັນດາຜູ້ຕາງໜ້າອົງການຈັດ ຕັ້ງສາກົນປະຈຳລາວ ພ້ອມດ້ວຍພະນັກງານຂັ້ນສູງ ທີ່ກ່ຽວຂ້ອງຂອງລາວໄດ້ເປັນກຽດເຂົ້າຮ່ວມງານລ້ຽງ ໃນໂອກາດສະເຫລີມສະຫລອງວັນຊາດຂອງຫວຽດນາມ ຄົບຮອບ 63 ປີ ທີ່ໂຮງແຮມດອນຈັນ ພາເລດ, ນະຄອນຫລວງວຽງຈັນ ເຊິ່ງຈັດຂຶ້ນໂດຍ ທ່ານ ຫງວຽນ ຮູຍ ກວາງ, ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສ.ສ ຫວຽດນາມ ປະຈຳລາວ.

ໃນໂອກາດດັ່ງກ່າວ, ທ່ານ ຫງວຽນ ຮູຍ ກວາງ ໄດ້ກ່າວຄຳປາໄສໂດຍຍົກໃຫ້ເຫັນເຖິງໄຊຊະນະສະຫງ່າ​ລາສີຂອງການຕໍ່ສູ້ ເພື່ອຍາດເອົາເອກະລາດແຫ່ງຊາດ, ປົກ​ປັກຮັກສາ​ອະທິປະ​ໄຕ ​ແລະ ຜືນ​ແຜ່ນ​ດິນ​ອັນ​ຄົບຖ້ວນ, ​ສ້າງສາ ​ແລະ ພັດທະນາ​ປະ​ເທດ​ຊາດ, ​ຫວຽດນາມ​ ສາມາດ​ຜ່ານ​ຜ່າ ​ໄດ້ທຸກ​ອຸປະສັກ​ທີ່​ຫຍຸ້ງຍາກ​ລຳບາກ ​ແລະ ສິ່ງ​ທ້າ​ທາຍ​ບົນ​ເສັ້ນທາງ​​ປະຫວັດສາດ​ຕະຫລອດ 63 ປີ. ດ້ວຍຜົນ​ສຳ​ເລັດ​ທາງດ້ານ​ເສດຖະກິດ ​ແລະ ສັງຄົມ​ທີ່​ຫວຽດນາມ​ຍາດ​ມາ​ໄດ້​ ເຮັດ​ໃຫ້​ສະພາບ​ການເມືອງ, ສັງຄົມ​ຂອງ​ຫວຽດນາມ​ ນັບ​ມື້ຍິ່ງ​ມີ​ສະຖຽນ​ລະ​ພາບ​ ແລະ ໝັ້ນຄົງ, ການ​ພົວພັນ​ຕ່າງປະ​ເທດ​ສືບຕໍ່​ໄດ້​ຮັບ​ການເປີດ​ກວ້າງ, ຖານະ ​ແລະ ​ອິດທິພົນ​ຂອງ​ຫວຽດນາມ​ໄດ້​ຮັບ​ການ​ເຊີດ​ຊູ​ຂຶ້ນ​ໃນ​ເວທີ​ສາກົນ​, ເປັນເງື່ອນໄຂ ສະດວກສຳລັບ ຫວຽດນາມ ເພື່ອບັນລຸຕາມປະ​ເທດ​ຊາດ​​ເຂັ້ມ​ແຂງ, ປະຊາຊົນຮັ່ງມີ, ສັງຄົມ​ມີ​ ຄວາມ​ສະຫງົບ​ຍຸດຕິ​ທຳ, ປະຊາຊົນ​ມີຄວາມ​ສີວິ​ໄລ​.

ທູດຍັງໄດ້ກ່າວຕື່ມອີກວ່າ: ບົນເສັ້ນທາງກ້າວເດີນຂອງຕົນເປັນເວລາ 63 ປີ ທີ່ຜ່ານມານັ້ນ, ພັກ ລັດ ແລະ ປະຊາຊົນຫວຽດນາມ ບໍ່ວ່າຍາມໃດກໍ່ໄດ້ມີສະຕິຮູ້ໄດ້ຢ່າງເລິກເຊິ່ງ ວ່າໃນແຕ່ລະໄຊຊະນະຂອງ ການຕໍ່ສູ້ປົດປ່ອຍຊາດໃນເມື່ອກ່ອນ ກໍ່ຄືພາລະກິດອັນສຳຄັນເພື່ອສ້າງສາ ແລະ ພັດທະນາປະເທດຊາດ ໃນປະຈຸບັນ, ລ້ວນ​ແຕ່​ມີການ​ຕິດ​ພັນ​ກັນ​ ຢ່າງ​ສະໜິດ​ແໜ້ນກັບ​ການ​ຊ່ວຍ​ເຫຼືອ​ອັນ​ໃຫຍ່​ຫລວງ​ຢ່າງ​ໝົດ​ຈິດ​ໝົດ​ໃຈ ​ແລະ ມີ​ປະສິດທິ​ຜົນຢ່າງ​ສູງ​ຈາກ​ພັກ​-ລັດ ​ແລະ ປະຊາຊົນ​ລາວບັນດາ​ເຜົ່າອ້າຍນ້ອງ ທີ່ສະຫງວນ ໃຫ້ແກ່ພາລະກິດປະຕິວັດຂອງປະຊາຊົນຫວຽດນາມ. ພ້ອມ​ນີ້, ທ່ານ​ຍັງ​ໄດ້​ອວຍພອນ​ໃຫ້​ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ, ຄວາມ​ສາມັກຄີ​ແບບ​ພິ​ເສດ ​ແລະ ການ​ຮ່ວມ​ມື​ ຮອບດ້ານ​ລະຫວ່າງ​ຫວຽດນາມ-ລາວ​​ ນັບ​ມື້​​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ.