ພິທີມອບ-ຮັບກະດູກ ແລະ ສິ່ງເສດເຫລືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ
ໂດຍສືບຕໍ່ປະຕິບັດນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດຖະບານແຫ່ງ ສປປ ລາວ ແລະ ອີງຕາມການຮ້ອງຂໍຂອງລັດ ຖະບານແຫ່ງສະຫະລັດອາເມລິກາ ຢ່າງເປັນທາງການຕໍ່ການແກ້ໄຂບັນຫາດັ່ງກ່າວ. ຄະນະວິຊາການຮ່ວມມືສອງຝ່າຍ ລາວ-ອາເມລິກາ ໄດ້ດຳເນີນແຜນການສຳຫລວດ ແລະ ຂຸດຄົ້ນກະດູກ, ສິ່ງເສດເຫລືອຂອງທະຫານທີ່ຫາຍສາບສູນ ປະຈຳປີ 2008-2009, ຄັ້ງທີ 3 ແຕ່ວັນທີ 5 ມີນາ ເຖິງ 7 ເມສາ ແລະ ຄັ້ງທີ 4 ແຕ່ວັນທີ 1-31 ພຶດສະພາ 2009, ຊຶ່ງດຳເນີນຢູ່ແຂວງຫົວພັນ, ຊຽງຂວາງ, ຄຳມ່ວນ ແລະ ອັດຕະປື.
ໃນວັນທີ 4 ມິຖຸນາ 2009, ທີ່ສະໜາມບິນສະຫວັນນະເຂດ, ໄດ້ມີພິທີມອບ-ຮັບກະດູກ ແລະ ສິ່ງເສດເຫລືອຂອງທະຫານອາເມລິກາທີ່ ຫາຍສາບສູນໃນປາງສົງຄາມ ໄດ້ຄົ້ນພົບຈາກການປະຕິບັດງານຮ່ວມດັ່ງກ່າວ, ເປັນກຽດເຂົ້າຮ່ວມໃນພິທີຄັ້ງນີ້ມີທ່ານ ພົງສະຫວັດ ບຸບຜາ, ລັດຖະມົນຕີຊ່ວຍວ່າການກະຊວງການຕ່າງປະເທດ, ຕາງໜ້າໃຫ້ລັດຖະບານແຫ່ງ ສປປ ລາວ ເປັນຜູ້ກ່າວມອບ ແລະ ທ່ານ ຣາສິກ ຮູໂຊ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສະຫະລັດອາເມລິກາ ປະຈຳ ສປປ ລາວ, ຕາງໜ້າໃຫ້ລັດຖະບານສະຫະລັດອາເມລິ ກາ ເປັນຜູ້ກ່າວຮັບ, ໂດຍຊ້ອງໜ້າເຈົ້າໜ້າທີ່ກ່ຽວຂ້ອງຂອງທັງສອງຝ່າຍ.
ສິ່ງເສດເຫລືອທີ່ນຳມາມອບໃນຄັ້ງນີ້ ມີກະດູກ, ແຂ້ວ ແລະ ຫລັກຖານວັດຖຸອື່ນໆອີກຈຳນວນໜຶ່ງ ທີ່ໄດ້ຄົ້ນພົບຈາກຈຸດຄົ້ນກໍລະນີ 1519 ຢູ່ບ້ານສົບເປັງ, ເມືອງບົວລະພາ, ແຂວງຄຳມ່ວນ; ກໍລະນີ 0526, ເມືອງຊານໄຊ ແຂວງອັດຕະປື; ກໍລະນີ 3036, ບ້ານຊຽງໂຮງ, ເມືອງຊຽງຄໍ້ ແລະ ແຫ່ງອື່ນໆໃນສີ່ແຂວງ. ຕາມຕົວເລກທີ່ ຝ່າຍອາເມລິກາ ແຈ້ງໃຫ້ຊາບ, ທະຫານອາເມລິກາທີ່ຫາຍສາບສູນໃນປາງ ສົງຄາມຢູ່ລາວມີທັງໝົດ 570 ຄົນ ແລະ ນັບແຕ່ມີການຮ່ວມມືຂອງທັງສອງຝ່າຍ ແຕ່ປີ 1983 ເປັນຕົ້ນມາ ລັດຖະບານລາວ ໄດ້ມອບຊາກ ສົບທະຫານອາເມລິກາທີ່ຫາຍສາບສູນໃຫ້ແກ່ລັດຖະບານ ກໍ່ຄືປະຊາຊົນອາເມລິກາ ຈຳນວນ 230 ຊາກສົບ, ພ້ອມດຽວກັນນີ້ກໍ່ຍັງມີກະດູກ ແລະ ສິ່ງເສດເຫລືອຈຳນວນທີ່ລັດຖະບານລາວ ມອບໃຫ້ລັດຖະບານອາເມລິກາ ເພື່ອນຳໄປພິສູດ ແລະ ວິໄຈ ຊຶ່ງຍັງບໍ່ສາມາດຢືນຢັນໄດ້.
ເວົ້າລວມແລ້ວ, ການຮ່ວມມືໃນວຽກງານດັ່ງກ່າວ ແມ່ນໄດ້ຮັບຜົນສຳເລັດອັນດີເປັນກ້າວໆມາ, ຍ້ອນຄວາມເອົາໃຈໃສ່ຂອງລັດຖະບານ ຄືເຈົ້າໜ້າທີ່ຂອງລາວທຸກໆຂັ້ນ, ແຕ່ສູນກາງຈົນເຖິງທ້ອງຖິ່ນ, ສິ່ງເຫລົ່ານີ້ ໄດ້ສະແດງເຖິງນະໂຍບາຍດ້ານມະນຸດສະທຳ ອັນສະເໝີຕົ້ນ ສະເໝີປາຍຂອງລັດຖະບານແຫ່ງ ສປປ ລາວ ທີ່ມີຕໍ່ປະຊາຊົນອາເມລິກາ, ແລະ ໂດຍສະເພາະແມ່ນຕໍ່ຄອບຄົວ ກໍ່ຄືຍາດຕິພີ່ນ້ອງຂອງ ຜູ້ຫາຍສາບສູນໃນປາງສົງຄາມ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
