ຜູ້ນຳພັກ-ລັດຕີລາຄາສູງການຮ່ວມມືແຂວງດົງນາຍ ແລະນະຄອນຫລວງ

ສັນຕິພາບ ເອກະລາດ ມິດຕະພາບ ການຮ່ວມມື

ໃນຕອນເຊົ້າຂອງວັນທີ 08 ກັນຍາ 2008, ຢູ່ທີ່ຫ້ອງຮັບແຂກ ສູນກາງ ພັກ, ສະຫາຍ ຈູມມາລີ ໄຊຍະສອນ, ເລຂາທິການໃຫຍ່ ຄະນະບໍລິຫານ ງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ເຈີນ ດິງ ແທັງ, ກຳມະການສູນກາງພັກກອມມູນິດຫວຽດນາມ, ເລຂາຄະນະພັກ ແຂວງ ດົງນາຍ ແລະ ຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ນະຄອນ ຫລວງວຽງຈັນແຕ່ວັນທີ 5-9 ກັນຍາ 2008.

ໃນຕອນບ່າຍວັນດຽວກັນ ສະຫາຍ ເຈີນ ດິງແທັງ ໄດ້ນຳຄະນະຜູ້ແທນຂັ້ນສູງຂອງແຂວງດົງນາຍ ເຂົ້າຢ້ຽມຂ່ຳນັບ ສະຫາຍ ບົວສອນ ບຸບຜາວັນ, ກຳມະການກົມການເມືອງ ສູນກາງພັກ, ນາຍົກລັດຖະມົນຕີແຫ່ງ ສປປ ລາວ ຢູ່ທີ່ສຳນັກງານນາຍົກລັດຖະມົນຕີ, ນະຄອນຫລວງວຽງຈັນ ໂດຍທີ່ຜູ້ນຳພັກ-ລັດເຮົາໄດ້ຕີລາຄາສູງການພົວພັນ ຮ່ວມມືລະຫວ່າງແຂວງດົງນາຍ ກັບນະຄອນຫລວງວຽງຈັນ ໂດຍສະເພາະແມ່ນການລົງທຶນຂອງນັກທຸລະກິດຈາກດົງນາຍ ຢູ່ນະຄອນຫລວງວຽງຈັນ ເຊິ່ງມີຫລາຍກິດຈະການສຳຄັນ ພວມໄດ້ຮັບການຈັດຕັ້ງ ປະຕິບັດຢ່າງເປັນຮູບປະທຳ ແລະ ເກີດໝາກຜົນແກ່ສອງຝ່າຍ.

ໃນໂອກາດເຂົ້າຢ້ຽມຂ່ຳນັບ, ຫົວໜ້າຄະນະຜູ້ແທນແຂວງດົງນາຍ ໄດ້ລາຍງານຜົນການຢ້ຽມຢາມ ແລະ ເຮັດວຽກຂອງຄະນະຕົນຮ່ວມກັບຄະນະພັກ ຄະນະປົກຄອງນະຄອນຫລວງວຽງຈັນ ໃຫ້ແກ່ສະຫາຍ ເລຂາທິການໃຫຍ່, ປະທານປະເທດ ແລະ ສະຫາຍ ນາຍົກລັດຖະມົນຕີ ບົວສອນ ບຸບຜາວັນ ໄດ້ຮັບຊາບຊຶ່ງການມາຢ້ຽມຢາມດັ່ງກ່າວໃນຄັ້ງນີ້ ໄດ້ລົງນາມໃນບົດບັນທຶກຄວາມເຂົ້າໃຈໃນໂຄງການກໍ່ສ້າງສະໜາມກອັຟ ຢູ່ເຂດບ້ານດົງໂພສີ ເມືອງຫາດຊາຍຟອງ, ນະຄອນຫລວງວຽງຈັນ ລະຫວ່າງນະຄອນຫລວງວຽງຈັນ ແລະ ບໍລິສັດຫຸ້ນສ່ວນລົງທຶນ ແລະ ທຸລະກິດ ກອັຟລອງແທັງ ແຂວງດົງນາຍໃນວັນທີ 7 ກັນຍາ 2008 ນີ້. ໂຄງການດັ່ງກ່າວ ມີເນື້ອທີ່ກວມເອົາ 500 ເຮັກຕາ ໃນມູນຄ່າການລົງທຶນ 1 ຕື້ໂດລາສະຫະລັດ, ເຊິ່ງປະກອບມີສະໜາມກອັຟ ແລະ ໂຮງແຮມ 5 ດາວ.

ຜູ້ນຳພັກ-ລັດເຮົາໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ ສະຫາຍ ເຈີນ ດິງ ແທັງ ແລະ ຄະນະໃນການມາຢ້ຽມຢາມ ແລະ ເຮັດວຽກຢູ່ນະຄອນຫລວງວຽງຈັນໃນຄັ້ງນີ້ ວ່າເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ-ລັດກໍ່ຄືປະຊາຊົນສອງຊາດ ເວົ້າລວມເວົ້າສະເພາະ ແມ່ນການພົວພັນຮ່ວມມືລະຫວ່າງນະຄອນ ຫລວງວຽງຈັນ ແລະ ແຂວງດົງນາຍ ໃຫ້ນັບມື້ແໜ້ນແຟ້ນຍິ່ງໆຂຶ້ນ.

01004, 23 Singha Road, Vientiane Capital, Lao PDR, Tel:856 21 413148, Fax: 856 21 414009 Email: ict@mofa.gov.la