ຊາວລາວຢູ່ບັນດາປະເທດເອີຣົບເຮັດບຸນທອດຜ້າປ່າສາມັກຄີ
ວັນທີ 22 ມິຖຸນາ 2008, ສະຖານທູດລາວ ທີ່ບຣຸກແຊນ, ປະເທດແບນຊິກ ຮ່ວມກັບສະມາຄົມວັດລາວໄດ້ຈັດຕັ້ງ, ນຳພາ ແລະ ເຕົ້າໂຮມຍາດຕິພີ່ນ້ອງຊາວລາວເຮັດບຸນທອດຜ້າປ່າຂຶ້ນ, ຊຶ່ງການເຮັດບຸນທອດຜ້າປ່າຄັ້ງນີ້ໄດ້ມີ ຊາວລາວ ຈາກປະເທດ ຝຣັ່ງ, ລຸກຊຳບວກ, ເຢຍລະມັນ ແລະ ຢູ່ປະເທດແບນຊິກເອງຈຳນວນປະມານ 200 ຄົນ ເຂົ້າຮ່ວມ ແລະ ມີພຣະອາຈານ ຈາກປະເທດຝຣັ່ງເສດ ສອງອົງເດີນທາງມາດຳເນີນສາສະກິດດັ່ງກ່າວຮ່ວມກັບ ພຣະອາຈານທີ່ບຣຸກແຊນ. ຜ່ານການບໍລິຈາກຮ່ວມກອງບຸນໄດ້ມີພຸດທະສາດສະນິກກະຊົນສັດທາບໍລິຈາກທານ ລວມເປັນເງິນທັງຫມົດໄດ້ປະມານ 5000 ເອີໂຣ, ຊຶ່ງເງິນ ຈຳນວນດັ່ງ ກ່າວໄດ້ມອບໃຫ້ເປັນການປະກອບສ່ວນ ປະຕິສັງຂອນຄໍ້າຊູວັດລາວທີ່ບຣຸກແຊນ ແລະ ວັດລາວທີ່ປະເທດຝຣັ່ງ ຕາມຈິດໃຈສັດທາ ຂອງພີ່ນ້ອງຊາວລາວ.

ໃນໂອກາດດັ່ງກ່າວ, ທ່ານ ສຸທຳ ສາກົນນິຍົມ,​ ເອອັກຄະລາດດສະທູດລາວ ປະຈຳປະເທດແບນຊິກ ໄດ້ໂອ້ລົມກັບ ພີ່ນ້ອງຊາວລາວເຖິງຄວາມຫມາຍຄວາມສຳຄັນຂອງພຸດທະສາສະຫນາຕໍ່ວິຖີວິດຂອງຊາວລາວເຮົາມາຢ່າງຍາວນານ ແລະ ໃນການປະກອບສ່ວນໃຫ້ແກ່ພາລະກິດທີ່ຕິດພັນກັບການຕໍ່ສູ້ປົດປ່ອຍຊາດ ແລະ ຍັງໄດ້ຍ້ອງຍໍຊົມເຊີຍພີ່ ນ້ອງຊາວລາວໃນຕ່າງ ປະເທດທີ່ຍັງຢຶດຫມັ້ນໃນຮີດຄອງປະເພນີ ແລະ ສາສະຫນາ. ພ້ອມກັນນັ້ນ ກໍ່ຮຽກຮ້ອງ ໃຫ້ທຸກຄົນສືບຕໍ່ຈິດໃຈດັ່ງກ່າວໂດຍສຶກສາອົບຮົມລູກຫລານ, ຄົນລາວລຸ້ນໃຫມ່ໃຫ້ຮັກຫອມ ແລະ ປົກປັກຮັກສາ ສາດສະຫນາພຸດສືບຕໍ່ໄປພາຍຫນ້າ.

ການຈັດທອດຜ້າປ່າສາມັກຄີດັ່ງກ່າວທີ່ປະເທດເອີຣົບນີ້ ຖືວ່າເປັນຄັ້ງທຳອິດ ແລະ ໃນອະນາຄົດສະຖານທູດລາວ ທີ່ ບຣຸກແຊນໄດ້ມີແຜນການຈະຈັດຂຶ້ນອີກ ແລະ ຈະນຳເງິນທຶນບໍລິຈາກເພື່ອມາຊ່ວຍວັດວາອາຮາມ ຫລື ສະຖານ ທີ່ສາທາລະນະບ່ອນໃດຫນຶ່ງທີ່ມີຄວາມຕ້ອງການຢູ່ໃນ ສປປ ລາວ, ອີງໃສ່ຄວາມຫມາຍຄວາມສຳຄັນດັ່ງກ່າວ ແລະ ເພື່ອເປັນການປຸກລະດົມຈິດໃຈຊຸກຍູ້ການເຕົ້າໂຮມຄວາມສາມັກຄີຂອງພີ່ນ້ອງຊາວລາວຢູ່ຕ່າງປະເທດ.