ສານອວຍພອນວັນຊາດສະຫະຣາຊະອານາຈັກອັງກິດ ແລະ ອຽກລັງເໜືອ
ໃນວັນທີ 9 ມິຖຸນາ 2009, ພະນະທ່ານ ຈູມມາລີ ໄຊຍະສອນ, ປະທານປະເທດແຫ່ງ ສປປ ລາວ ໄດ້ສົ່ງສານອວຍພອນເຖິງ ສົມເດັດພະຣາຊິນີ ເອລີຊາເບັດ ທີ II ແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ທີ່ ລອນດອນ ເນື່ອງໃນໂອກາດວັນຊາດ ໃນວັນທີ 11/06/2009. ເຊິ່ງສານມີເນື້ອໃນວ່າ: ເນື່ອງໃນວັນພະຣາຊາສົມບົດຂອງ ພຣະຣາຊິນີ, ຂ້າພະເຈົ້າຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງສົມເດັດພຣະຣາຊິນີ ແລະ ປະຊາຊົນອັງກິດ ແລະ ອຽກລັງເໜືອທຸກທົ່ວໜ້າ. ຂໍໃຫ້ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດພວກເຮົາຈົ່ງໄດ້ຮັບການເສີມຂະຫຍາຍຂຶ້ນໄປເລື້ອຍໆ ເພື່ອຜົນປະໂຫຍດ ຂອງປະຊາຊົນສອງຊາດ ແລະ ເພື່ອສັນຕິພາບໂລກ.
ໃນວັນດຽວກັນ ພະນະທ່ານ ບົວສອນ ບຸບຜາວັນ, ນາຍົກລັດຖະມົນຕີແຫ່ງ ສປປ ລາວ ກໍ່ໄດສົ່ງສານອວຍພອນເຖິງ ພະນະທ່ານ ດຣ.ກໍດອນ ບຣາວ, ນາຍົກລັດຖະມົນຕີແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ທີ່ລອນດອນ ໂດຍມີເນື້ອໃນ:
ເນື່ອງໃນໂອກາດວັນຊາດແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ, ໃນນາມລັດຖະບານແຫ່ງ ສປປ ລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງພະນະທ່ານ ແລະ ໂດຍຜ່ານພະນະທ່ານໄປຍັງ ລັດຖະບານ ແລະ ປະຊາຊົນອັງກິດ ແລະ ອຽກລັງເໜືອທຸກທົ່ວໜ້າ.
ຂ້າພະເຈົ້າຫວັງວ່າສາຍພົວພັນມິດຕະພາບ ແລະ ການ ຮ່ວມມືລະຫວ່າງສອງປະເທດພວກເຮົາຈະໄດ້ຮັບການສືບຕໍ່ເສີມຂະຫຍາຍ ເພື່ອຜົນປະໂຫຍດລວມຂອງປະຊາຊົນສອງຊາດພວກເຮົາ ແລະ ເພື່ອການຮ່ວມມືສາກົນ, ເພື່ອການພັດທະນາ.
ພະນະທ່ານ ດຣ.ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ ກໍ່ໄດ້ສົ່ງສານເຖິງພະນະທ່ານ ເດວິດ ມີລີແບນ, ລັດຖະມົນຕີວ່າການກະຊວງການຕ່າງປະເທດແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ເພື່ອອວຍພອນໃນໂອກາດນີ້ເຊັ່ນດຽວກັນ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
