ສະເຫລີມສະຫລອງວັນຊາດສິງກະໂປ ຄົບຮອບ 43 ປີ

ທ່ານ ເຈຢາຣະ ເບັນຈາມິນ ວິລລຽມ ( Mr. Jeyaraj Benjamin William), ເອກອັກ ຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສິງກະໂປ ປະຈຳ ສປປ ລາວ ໄດ້ຈັດງານລ້ຽງຮັບຮອງເພື່ອສະເຫລີມສະຫລອງວັນຊາດ ຄົບຮອບ 43 ປີ, ໃນວັນທີ 8 ສິງຫາ 2008, ຢູ່ທີ່ໂຮງແຮມ ໂນໂວແທວ, ນະຄອນຫລວງວຽງຈັນ ໂດຍການເຂົ້າຮ່ວມເປັນກຽດຂອງທ່ານ ດຣ. ທອງລຸນ ສີສຸລິດ, ຮອງນາຍົກລັດ ຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ບັນດາລັດຖະມົນຕີວ່າການ ແລະ ຊ່ວຍວ່າການ, ບັນດາທູຕານຸທູດຕ່າງປະເທດ ແລະ ອົງການຈັດຕັ້ງສາກົນປະຈຳລາວ ຕະຫລອດເຖິງບັນດາ ພະນັກງານຂັ້ນສູງທີ່ກ່ຽວຂ້ອງຈຳນວນຫນຶ່ງ.
ສິງກະໂປ ແລະ ສປປ ລາວ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 2 ທັນວາ 1974, ຂະນະທີ່ ສິງກະໂປ ໄດ້ສົ່ງເອກອັກຄະລັດຖະທູດມາປະຈຳຢູ່ ສປປ ລາວ ເມື່ອເດືອນກຸມພາ 1997 ແລະ ສປປ ລາວ ກໍໄດ້ສົ່ງເອກອັກຄະລັດຖະທູດໄປປະຈຳຢູ່ ສິງກະໂປ ໃນເດືອນ ມິຖຸນາ 1997. ມາເຖິງປະຈຸບັນ ສະພາບການພົວພັນ ແລະ ການຮ່ວມມືລະຫວ່າງ ລາວ ແລະ ສິງກະໂປ ໄດ້ມີທ່າຂະຫຍາຍຕົວເປັນກ້າວໆດັ່ງປະກົດໃນການຢ້ຽມຢາມຂອງຄະນະຜູ້ແທນຂັ້ນຕ່າງໆທັງສອງປະເທດ ແລະ ການຮ່ວມມືຊ່ວຍເຫລືອໃນດ້ານຕ່າງໆ.