ພະນະທ່ານປະທານປະເທດ ສຳເລັດການຢ້ຽມຢາມທາງລັດຖະກິດ ຣາຊະອານາຈັກໄທ
ພະນະທ່ານ ຈູມມາລີ ໄຊຍະສອນ, ປະທານປະເທດແຫ່ງ ສປປ ລາວ ພ້ອມພັນລະຍາ ແລະ ຄະນະໄດ້ສິ້ນສຸດການຢ້ຽມຢາມ ຣາຊະອານາຈັກໄທ ທາງລັດຖະກິດໃນຖານະພະຣາຊະອະຄັນຕຸກະຂອງ ພະເຈົ້າມະຫາຊີວິດ ພູມີພົນ ອະດຸນຍະເດດ ແລະ ສົມເດັດ ພະຣາຊິນີແຫ່ງ ຣາຊະອານາຈັກໄທ ເປັນເວລາ 3 ວັນ ແລະ ໄດ້ເດີນທາງກັບປະເທດດ້ວຍຄວາມສະຫວັດດີພາບໃນຕອນຄໍ່າຂອງວັນທີ 14 ພຶດສະພາ 2009, ຊຶ່ງພິທີຕ້ອນຮັບໄດ້ຈັດຂຶ້ນຢູ່ ຫໍຄຳ, ມີບັນດາກຳມະການກົມການເມືອງສູນກາງພັກ, ລັດຖະມົນຕີ, ສະມາຊິກສະພາ ແຫ່ງຊາດ, ຄະນະຜູ້ແທນທາງການ ແລະ ອຸປະທູດແຫ່ງ ຣາຊະອານາຈັກໄທ ປະຈຳລາວເຂົ້າຮ່ວມ.
ສຳລັບພາລະກິດໃນການຢ້ຽມຢາມ ຣາຊະອານາຈັກໄທ ໃນວັນທີ 14 ພຶດສະພາ 2009, ພະນະທ່ານປະທານປະເທດ ຈູມມາລີ ໄຊຍະສອນ ໄດ້ໄປຢ້ຽມຊົມໂຄງການແກັມລິງ ເພື່ອປ້ອງກັນໄພນ້ຳຖ້ວມເຂດປຣະເວດ ແລະ ໄດ້ຮັບຟັງການລາຍງານ ກ່ຽວກັບ ການປະຕິ ບັດໂຄງການດັ່ງກ່າວ ພ້ອມທັງຢ້ຽມຊົມສະຖານທີ່ສູບນ້ຳບຶງໜອງບອນ. ຫລັງຈາກນັ້ນ, ພະນະທ່ານ ປະທານປະເທດ ພ້ອມພັນລະຍາ ແລະ ຄະນະໄດ້ເດີນທາງຢ້ຽມຊົມສວນຈິດລະດາ ຊຶ່ງເປັນໂຄງການສ່ວນພະອົງຂອງ ພະເຈົ້າມະຫາຊີວິດແຫ່ງ ຣາຊະອານາຈັກໄທ. ນອກນັ້ນ, ກໍ່ໄດ້ເດີນທາງໄປທ່າເຮືອ ທ່າວາສຸກຣີ ແລະ ລົງເຮືອອັງສະນາ ແລ້ວລ່ອງເພື່ອໄປຕາມແມ່ນ້ຳເຈົ້າພະຍາ ພ້ອມທັງຮັບປະທານອາຫານທ່ຽງ ຢູ່ໃນເຮືອລຳດັ່ງກ່າວ.
ພາຍຫລັງທີ່ ພະນະທ່ານ ຈູມມາລີ ໄຊຍະສອນ, ປະທານປະເທດແຫ່ງ ສປປ ລາວ ແລະ ພັນລະຍາ ໄດ້ສຳເລັດການຢ້ຽມຢາມທາງ ລັດຖະກິດ, ຝ່າຍຣາຊະອານາຈັກໄທ ໄດ້ຈັດພິທີສົ່ງຢ່າງສົມກຽດ ໂດຍສົມເດັດ ພະບໍຣົມໂອລະສາທິຣາດ ສະຫຍາມມົງກຸດຣາຊະກຸມານ ແລະ ສົມເດັດພຣະເທບຣັດຕະນະ ຣາຊະສຸດາ ສະຫຍາມບໍຣົມຣາຊະກຸມາຣີ, ສະເດັດອອກສົ່ງ ພະນະທ່ານ ປະທານປະເທດ ຈູມມາລີ ໄຊຍະສອນ ແລະ ພັນລະຍາ ທີ່ສະໜາມບິນ ກອງບັນຊາການກອງທັບອາກາດ ດອນເມືອງ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
