ໜ້າທຳອິດ | ກະຊວງ |ບົດປາໃສ | ນະໂຍບາຍການຕ່າງປະເທດ | ສາຍພົວພັນການທູດ | ກ່ຽວກັບ ສົນທິສັນຍາ | ຂ່າວຕ່າງໆ | ກ່ຽວກັບກົງສູນ
ພະນະທ່ານ ດຣ.ທອງລຸນ ສີສຸລິດ ເດີນທາງໄປຮ່ວມ ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 42
ໃນວັນທີ 16 ກໍລະກົດ 2009, ຄະນະຜູ້ແທນຂັ້ນສູງຂອງສາທາລະນະລັດ ປະຊາທິປະໄຕ ປະຊາຊົນລາວ ນຳໂດຍພະນະທ່ານດຣ.ທອງລຸນ ສີສຸລິດຮອງ ນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ໄດ້ອອກເດີນທາງໄປຮ່ວມກອງປະຊຸມລັດຖະມົນຕີການຕ່າງປະເທດອາຊຽນ (AMM)ປະຈຳປີທີ່ ພູເກັດ, ຣາຊະອານາຈັກໄທ ເຊິ່ງຈະຈັດຂຶ້ນລະຫວ່າງວັນທີ 16 ຫາ 23 ກໍລະກົດ 2009 ນີ້.
ໃນໂອກາດດຽວກັນ, ນອກຈາກຈະເປັນການເປີດ ກອງປະຊຸມລັດຖະມົນຕີການຕ່າງປະເທດອາຊຽນປະຈຳປີແລ້ວ, ກໍຍັງຈະມີກອງປະຊຸມລະດັບລັດຖະມົນຕີ ຕ່າງປະເທດ ທີ່ກ່ຽວຂ້ອງ ເຊັ່ນ: ກອງປະຊຸມຄັ້ງທີ 2 ຂອງສະພາປະຊາຄົມການເມືອງ ແລະ ຄວາມໝັ້ນຄົງອາຊຽນ(APSC; ກອງປະຊຸມຄັ້ງທີ 4 ຂອງສະພາ ປະສານງານອາຊຽນ (ACC); ກອງປະຊຸມຂອງຄະນະກຳມາທິການຂອງສົນທິສັນຍາ ວ່າດ້ວຍການສ້າງອາຊີຕາເວັນອອກສຽງໃຕ້ ເປັນເຂດປອດອາວຸດນິວເຄຼຍ (SEANWFZ Commission); ກອງປະຊຸມລັດຖະມົນຕີຕ່າງປະເທດ ອາຊຽນ+3 (ASEAN+3ຄັ້ງທີ 10; ກອງປະຊຸມປຶກສາຫາລືບໍ່ເປັນທາງການ ຂອງບັນດາ ລັດຖະມົນຕີຕ່າງປະເທດອາຊີຕາເວັນອອກ (EAS); ກອງປະຊຸມລັດຖະມົນຕີຕ່າງປະເທດອາຊຽນ ກັບແຕ່ລະຄູ່ເຈລະຈາ (PMC) ຄື: ສປ ຈີນ; ຍີ່ປຸ່ນ; ສ.ເກົາຫຼີ; ອິນເດຍ; ອົດສະຕຣາລີ; ນິວຊີແລນ; ອີຢູ; ຣັດເຊຍ; ການາດາ ແລະ ສະຫະລັດອາເມລິກາ.
ນອກນັ້ນ, ພະນະທ່ານ ດຣ.ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຈະໄດ້ເຂົ້າຮ່ວມກອງປະຊຸມເວທີພາກພື້ນ ອາຊຽນ (ARF) ຄັ້ງທີ 16, ເຊິ່ງເປັນກອງປະຊຸມພົບປະລະຫວ່າງ ລັດຖະມົນຕີຕ່າງປະເທດອາຊຽນ ກັບຄະນະສະເພາະກິດລະດັບສູງ ເພື່ອຮ່າງພາລະບົດບາດຂອງ ອົງກອນສິດ ທິມະນຸດອາຊຽນ; ກັບຄະນະຊ່ຽວຊານກົດໝາຍລະດັບສູງຂອງອາຊຽນ ເພື່ອຈັດຕັ້ງປະຕິບັດກົດບັດອາຊຽນ ລວມທັງໝົດ 19 ກອງປະຊຸມ.ພ້ອມກັນນີ້, ທ່ານ ດຣ.ທອງລຸນສີສຸລິດ ຍັງຈະເຂົ້າຮ່ວມພົບປະຄັ້ງທຳອິດຂອງບັນດາປະເທດສະມາຊິກຂອງ ຄະນະກຳມາທິການແມ່ນ້ຳຂອງ ກັບ ສະຫະລັດອາເມລິກາ ແລະ ຈະມີການພົບປະສອງ ຝ່າຍກັບລັດ ຖະມົນຕີຕ່າງປະເທດຈຳນວນໜຶ່ງ.
ບັນດາກອງປະຊຸມທີ່ກ່າວມາຂ້າງເທິງ ແມ່ນໄດ້ຈັດຂຶ້ນທ່າມກາງສະພາບແວດລ້ອມຂອງພາກພື້ນ ແລະ ຂອງໂລກທີ່ມີຄວາມຫຍຸ້ງຍາກສັບສົນ ແລະມີການຜັນແປຢ່າງ ໄວວາ,ອັນໄດ້ສ້າງທັງກາລະໂອກາດ ແລະ ສິ່ງທ້າທາຍໃໝ່ຕໍ່ການຮ່ວມມືພາຍໃນອາຊຽນ ແລະ ລະຫວ່າງອາຊຽນກັບພາຍນອກ. ດັ່ງນັ້ນ, ບັນດາກອງປະຊຸມ ຄັ້ງນີ້ ເຫລົ່ານີ້ ຈຶ່ງມີຄວາມໝາຍ ແລະ ຄວາມສຳຄັນຢ່າງຍິ່ງຕໍ່ອາຊຽນ, ຕໍ່ບັນດາປະເທດຄູ່ເຈລະຈາ ກໍຄືປະເທດຜູ້ເຂົ້າຮ່ວມ ARS, ເພາະເປັນໂອກາດອັນດີເພື່ອທົບທວນ ແລະປຶກສາຫາລືທິດທາງການຮ່ວມມືກັນໃນອະນາຄົດ. ທັງນີ້ເພື່ອໃຫ້ສອດຄ່ອງກັບສະພາບພາກພື້ນ ແລະ ສາກົນໃນປັດຈຸບັນ.ໃນບັນດາກອງປະຊຸມພາຍໃນອາຊຽນ, ບັນດາລັດຖະມົນຕີຕ່າງປະເທດອາຊຽນ ຈະໄດ້ພ້ອມກັນທົບທວນຄືນຄວາມຄືບໜ້າໃນການສ້າງປະຊາຄົມອາຊຽນ ການຈັດຕັ້ງປະຕິບັດກົດບັດອາຊຽນ ກໍຄືຂໍ້ຕົກລົງຕ່າງໆ ຂອງກອງປະຊຸມສຸດຍອດອາຊຽນ ຄັ້ງທີ 14 ຜ່ານມາ. ພ້ອມດຽວກັນນີ້,ບັນດາລັດຖະມົນຕີຕ່າງປະເທດອາຊຽນ ຍັງຈະໄດ້ປຶກສາຫາລື ແລະ ແລກປ່ຽນຄຳຄິດ ກ່ຽວກັບ ຄຳເຫັນກັນສະພາບການທີ່ພົ້ນເດັ່ນໃນພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.ໃນບັນດາກອງປະຊຸມກັບຄູ່ເຈລະຈາກອງປະຊຸມລັດຖະມົນຕີຕ່າງປະເທດອາຊຽນ+3;
ກອງປະຊຸມປຶກສາຫາລືບໍ່ເປັນທາງການຂອງບັນດາລັດຖະມົນຕີຕ່າງປະເທດ EAS ແລະ ກອງປະຊຸມເວທີພາກພື້ນອາຊຽນ(ARF) ບັນດາລັດຖະມົນຕີຕ່າງປະເທດ ອາຊຽນ ຄູ່ເຈລະຈາ ແລະ ປະເທດຜູ້ເຂົ້າຮ່ວມ ARF ຈະໄດ້ພ້ອມກັນທົບທວນການຮ່ວມມືຂອງຕົນໃນໄລຍະ 1 ປີຜ່ານມາ ແລະວາງທິດທາງ ການຮ່ວມ ມືໃນ ຕໍ່ໜ້າ, ພ້ອມກັນນັ້ນ ກໍຈະໄດ້ປຶກສາຫາລືແລກປ່ຽນຄຳຄິດຄຳເຫັນນຳກັນກ່ຽວກັບສະພາບການທີ່ພົ້ນເດັ່ນໃນພາກພື້ນ ແລະ ໃນໂລກທີ່ມີຄວາມສົນໃຈຮ່ວມກັນ.
ສຳລັບ ສປປ ລາວ ການເຂົ້າຮ່ວມບັນດາກອງປະຊຸມຄັ້ງນີ້ ນອກຈາກເປັນໂອກາດອັນດີ ເພື່ອສືບຕໍ່ສະເໜີເຜີຍແຜ່ນະໂຍບາຍການຕ່າງປະເທດແຫ່ງ ສັນຕິພາບ ເອກະລາດ ມິດຕະພາບ ແລະການຮ່ວມມື ຂອງຕົນ ແລະ ເພື່ອຂົນຂວາຍຍາດແຍ່ງການສະໜັບສະໜູນຊ່ວຍເຫຼືອຈາກເພື່ອນສະມາຊິກຂອງອາຊຽນ ແລະ ຈາກບັນດາຄູ່ເຈລະຈາ ທັງໃນຂອບສອງຝ່າຍ ແລະ ຫຼາຍຝ່າຍເພື່ອມາປະກອບສ່ວນເຂົ້າໃນການພັດທະນາເສດຖະກິດສັງຄົມຂອງພວກເຮົາແລ້ວ, ນີ້ຍັງເປັນ ໂອກາດອັນດີສຳລັບ ສປປ ລາວ ເພື່ອປະກອບສ່ວນເຂົ້າໃນການເພີ່ມທະວີການຮ່ວມມືພາຍໃນອາຊຽນ ແລະ ການຮ່ວມມືລະຫວ່າງອາຊຽນກັບບັນດາຄູ່ເຈລະຈາ ແລະ ບັນດາປະເທດເຂົ້າຮ່ວມ ARF, ເຊິ່ງຈະເປັນການປະກອບສ່ວນເຂົ້າໃນການສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງ ກໍຄືການເພີ່ມທະວີການຮ່ວມມືເພື່ອ ການພັດທະນາໃນພາກພື້ນ ແລະ ໃນໂລກ ໂດຍລວມອີກດ້ວຍ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
