ໜ້າທຳອິດ | ກະຊວງ |ບົດປາໃສ | ນະໂຍບາຍການຕ່າງປະເທດ | ສາຍພົວພັນການທູດ | ກ່ຽວກັບ ສົນທິສັນຍາ | ຂ່າວຕ່າງໆ | ກ່ຽວກັບກົງສູນ
ທ່ານປະທານປະເທດ ແຫ່ງ ສປປ ລາວ ຕີລາຄາສູງການຮ່ວມມືຂອງ
ສູນກາງສະຫະພັນແມ່ຍິງ ລາວ-ຫວຽດນາມໃນວັນທີ 16 ກໍລະກົດ 2009, ຢູ່ທີ່ສຳນັກງານປະທານປະເທດ, ພະນະທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນສະຫະພັນແມ່ຍິງ ສສ.ຫວຽດນາມ ຊຶ່ງນຳໂດຍ ທ່ານ ນາງ ຫວຽນ ທິແທງ ຮົວ, ປະທານສະຫະພັນ ແມ່ຍິງ ຫວຽດນາມ ໃນໂອກາດທີ່ຄະນະຜູ້ແທນ ດັ່ງກ່າວເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 13-17 ກໍລະກົດ 2009.
ໃນໂອກາດດັ່ງກ່າວ, ທ່ານ ນາງ ຫວຽນ ທິແທງ ຮົວ ໄດ້ລາຍງານຈຸດປະສົງຂອງການຢ້ຽມຢາມລາວໃນຄັ້ງນີ້ ແລະ ລາຍງານກ່ຽວກັບ ການພົວພັນ ຮ່ວມມື ລະຫວ່າງສູນກາງສະພັນແມ່ຍິງລາວ ກັບ ສູນກາງສະຫະພັນແມ່ຍິງຫວຽດນາມ ໃນໄລຍະຜ່ານມາ, ຊຶ່ງເຫັນວ່າມີຜົນສຳເລັດຫລາຍດ້ານ ເປັນຕົ້ນແມ່ນ ການແລກປ່ຽນບົດຮຽນດ້ານວຽກງານສົ່ງເສີມ ແລະ ພັດທະນາແມ່ຍິງ, ວຽກງານສ້າງຕັ້ງກອງທຶນຂະໜາດນ້ອຍສຳຫລັບແມ່ຍິງ, ການກໍ່ສ້າງຖັນແຖວ ພະນັກງານ ເພດຍິງ ແລະ ວຽກງານອື່ນໆ ເພື່ອຊຸກຍູ້ສົ່ງເສີມຖານະບົດບາດຂອງແມ່ຍິງໃຫ້ສູງຂຶ້ນໃນສັງຄົມ.
ພະນະທ່ານປະທານປະເທດ ຈູມມາລີ ໄຊຍະສອນ ກໍໄດ້ສະແດງຄວາມຍ້ອງຍໍຊົມເຊີຍ ແລະ ໄດ້ຕີລາຄາສູງຕໍ່ຜົນສຳເລັດການພົວພັນ ຮ່ວມມື ຂອງອົງການ ຈັດຕັ້ງສະຫະພັນແມ່ຍິງທັງສອງປະເທດ ແລະ ສະແດງຄວາມຂອບໃຈ ຕໍ່ການອຸ້ມຊູຊ່ວຍເຫລືອຂອງ ສສ.ຫວຽດນາມ ທີ່ມີຕໍ່ ສປປ ລາວ, ໂດຍສະເພາະ ແມ່ນການຊ່ວຍກໍ່ສ້າງພະນັກງານເພດຍິງຮຸ້ນສືບທອດ ໃຫ້ເຕັມໄປດ້ວຍຄວາມຮູ້ຄວາມສາມາດ, ອັນເປັນການປະກອບ ສ່ວນທີ່ສຳຄັນ ເຂົ້າໃນການສ້າງສາ ພັດທະນາປະເທດຊາດ. ໃນໄລຍະດຳເນີນການຢ້ຽມຢາມ ສປປ ລາວ ຄັ້ງນີ້, ຄະນະຜູ້ແທນຂັ້ນສູງສະຫະພັນແມ່ຍິງ ສສ.ຫວຽດນາມ ຍັງໄດ້ເຄື່ອນໄຫວ ຢ້ຽມຢາມ ແລະ ພົບປະກັບການນຳຂັ້ນສູງຂອງພາກສ່ວນກ່ຽວຂ້ອງອື່ນອີກດ້ວຍ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
