ລັດຖະມົນຕີການຕ່າງປະເທດຮ່ວມຫາລືເພື່ອຊ່ວຍເຫລືອມຽນມາ
ທ່ານ ດຣ ທອງລຸນ ສີສຸລິດ, ຮອງນາຍົກລັດຖະມົນຕີ,
ລັດຖະມົນຕີວ່າການກະຊວງ ການຕ່າງປະເທດ ແຫ່ງ ສປປ ລາວ
ພ້ອມດ້ວຍຄະນະ ໄດ້ເດີນທາງຈາກ ນະຄອນຫລວງ ວຽງຈັນ ໃນຕອນບ່າຍຂອງວັນທີ
18 ພຶດສະພາ 2008 ເພື່ອເຂົ້າຮ່ວມ ກອງປະຊຸມ ລັດຖະມົນຕີຕ່າງປະເທດ
ອາຊຽນສະໄໝພິເສດ ເພື່ອຊ່ວຍເຫລືອ ສະຫະພາບມຽນມາ ຊຶ່ງຈັດຂຶ້ນໃນວັນທີ
19 ພຶດສະພາ 2008 ທີ່ປະເທດ ສິງກະໂປ.
ກອງປະຊຸມດັ່ງກ່າວໄດ້ມີການປຶກສາຫາລື
ແລະ ແລກປ່ຽນຄວາມຄິດຄວາມເຫັນ ເພື່ອຫາ ທາງຊ່ວຍເຫລືອສະຫະພາບມຽນມາ
ພາຍຫລັງທີ່ໄດ້ຮັບຜົນກະທົບຢ່າງໜັກໜ່ວງ ຈາກພາຍຸນາກິດສ
ອາຊຽນ ຈະໃຫ້ການຊ່ວຍເຫລືອດ້ານຕ່າງໆ ໂດຍສະເພາະດ້ານບັນເທົາທຸກ
ແລະ ການຟຶ້ນຟູລະບົບ ໂຄງລ່າງ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນມຽນມາ
ທີ່ໄດ້ຮັບຜົນກະທົບຈາກພາຍຸດັ່ງກ່າວ ໃຫ້ກັບຄືນສູ່ສະພາບປົກກະຕິ.
ຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ ຍັງໄດ້ຮັບຟັງການລາຍງານຂອງ ທ່ານ ນຽນວິນ, ລັດຖະມົນຕີ ວ່າການກະຊວງການຕ່າງປະເທດ
ມຽນມາ ກ່ຽວກັບການປະເມີນຄວາມເສຍຫາຍ ແລະ ຄວາມຕ້ອງການ ການຊ່ວຍເຫລືອ;
ການລາຍງານຂອງ ທ່ານ ດຣ ສຸຣິນ ພິດສຸວັນ, ເລຂາທິການ ໃຫຍ່ອາຊຽນ
ກ່ຽວກັບການປະກອບສ່ວນ ເພື່ອບັນເທົາທຸກແກ່ມຽນມາ ແລະ
ການລາຍງານຂອງ ປະທານຄະນະ ກຳມະການຄຸ້ມຄອງໄພພິບັດອາຊຽນ
ກ່ຽວກັບຄວາມພະຍາຍາມໃນການບັນເທົາທຸກ.
