ລັດຖະມົນຕີວ່າການກະຊວງການຕ່າງປະເທດ ຕ້ອນຮັບການເຂົ້າຢ້ຽມອຳລາຂອງທ່ານທູດອີຕາລີ
ໃນວັນທີ 20 ພຶດສະພາ 2009, ທີ່ກະຊວງການຕ່າງປະເທດ, ທ່ານ ດຣ.ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອຳລາຂອງທ່ານ ອິກນາຊິໂອ ດີປາສ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງປະເທດອີຕາລີ ປະຈຳ ສປປ ລາວ, ຊຶ່ງມີສຳນັກງານຕັ້ງຢູ່ບາງກອກ, ປະເທດໄທ ໃນໂອກາດທີ່ທ່ານມາປະຕິບັດໜ້າທີ່ເປັນທູດຢູ່ລາວ ເປັນເວລາ 5 ປີ.
ທ່ານ ດຣ.ທອງລຸນ ສີສຸລິດ ໄດ້ສະແດງຄວາມຍ້ອງຍໍຊົມເຊີຍຕໍ່ທ່ານທູດອີຕາລີ ທີ່ໄດ້ປະຕິບັດໜ້າທີ່ວຽກງານຢ່າງສຳເລັດຜົນດ້ວຍດີ ແລະ ອວຍພອນໃຫ້ທ່ານທູດ ເດີນທາງກັບຄືນປະເທດດ້ວຍຄວາມປອດໄພ ແລະ ປະສົບຜົນສຳເລັດໃນໜ້າທີ່ໃໝ່ຂອງທ່ານ.
ໃນໄລຍະຜ່ານມາ, ການພົວພັນ ແລະ ຮ່ວມມືລະຫວ່າງ ລາວ-ອີຕາລີ ໄດ້ມີການຂະຫຍາຍຕົວຫລາຍດ້ານເຊັ່ນ: ຍອດມູນຄ່າການລົງທຶນ ຂອງ ອີຕາລີ ຢູ່ ລາວ ມີທັງໝົດ 1.973.000 ໂດລາສະຫະລັດ, ໃນປີ 1996 ທ່ານເອກອັກຄະລັດຖະທູດລາວ ປະຈຳອີຕາລີ ສຳນັກງານ ຕັ້ງຢູ່ ປາຣີ ປະເທດຝຣັ່ງ ໄດ້ຕາງໜ້າໃຫ້ລັດຖະບານ ສປປ ລາວ ເຊັນສັນຍາກັບ ລັດຖະບານອີຕາລີ ໃນໂຄງການບູລະນະປະຕິສັງຂອນ ວັດພູຈຳປາສັກ; ສົກປີ 2003 ອີຕາລີ ໄດ້ຊ່ວຍເຫລືອດ້ານສະບຽງອາຫານແກ່ ສປປ ລາວ ມູນຄ່າ 451.796 ໂດລາສະຫະລັດ; ໂຄງການສູນຊີວະນາໆພັນ ຢູ່ແຂວງບໍລິຄຳໄຊ ມູນຄ່າ 135.000 ໂດລາສະຫະລັດ, ໄດ້ມີການແລກປ່ຽນການຢ້ຽມຢາມຂອງຄະນະ ຜູ້ແທນນຳກັນ ແລະ ມີການຮ່ວມມືໃນວຽກງານດ້ານອື່ນໆອີກ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
