ລາວ ແລະ ຍີ່ປຸ່ນ ຢືນຢັນຈະເພີ່ມທະວີການຮ່ວມມື
ໃນວັນທີ 20 ພຶດສະພາ 2009, ພະນະທ່ານ ບົວສອນ ບຸບຜາວັນ, ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະໄດ້ເດີນທາງ ໄປເຖິງ ນະຄອນຫລວງໂຕກຽວ, ປະເທດຍີ່ປຸ່ນ ເພື່ອເຂົ້າຮ່ວມກອງປະຊຸມສາກົນ ຄັ້ງທີ 15 ວ່າດ້ວຍອະນາຄົດອາຊີ ຕາມຄຳເຊີນຂອງ ສຳນັກງານໜັງສືພິມ Nikei, ທີ່ຈັດຂຶ້ນໃນວັນທີ 21-22 ພຶດສະພາ 2009 ນີ້.
ໃນການເຄື່ອນໄຫວຮ່ວມກອງປະຊຸມດັ່ງກ່າວ, ພະນະທ່ານ ບົວສອນ ບຸບຜາວັນ ໄດ້ພົບປະສອງຝ່າຍກັບ ພະນະທ່ານ ອາໂຊະ ຕາໂຣ, ນາຍົກລັດຖະມົນຕີຍີ່ປຸ່ນ ຢູ່ ທຳນຽບລັດຖະບານ. ການພົບປະດັ່ງກ່າວ, ພະນະທ່ານນາຍົກລັດຖະມົນຕີລາວ ແລະ ຍີ່ປຸ່ນ ໄດ້ຕີລາຄາສູງ ຕໍ່ໝາກຜົນຂອງການພົວພັນການຮ່ວມມືລະຫວ່າງສອງປະເທດໃນໄລຍະຜ່ານມາ ເປັນຕົ້ນແມ່ນການໄປມາຫາສູ່ແລກປ່ຽນການຢ້ຽມຢາມເຊິ່ງ ກັນແລະກັນຂອງຄະນະຜູ້ແທນຂັ້ນສູງ ແລະ ຂັ້ນວິຊາການຂອງສອງຝ່າຍ.
ໃນການພົບປະຄັ້ງນີ້, ພະນະທ່ານ ອາໂຊະ ຕາໂຣ ໄດ້ແຈ້ງຄຳເຊື້ອເຊີນຂອງລັດຖະບານຍີ່ປຸ່ນ ຕໍ່ພະນະທ່ານ ຈູມມາລີ ໄຊຍະສອນ, ປະທານປະເທດແຫ່ງ ສປປ ລາວ ເພື່ອຢ້ຽມຢາມ ຍີ່ປຸ່ນ ຢ່າງເປັນທາງການໃນຕົ້ນປີ 2010 ເນື່ອງໃນໂອກາດຄົບຮອບ 55 ປີແຫ່ງການ ສ້າງສາຍພົວພັນການທູດຮ່ວມກັນ, ພ້ອມນັ້ນກໍ່ໄດ້ປະກາດແຜນການຊ່ວຍເຫລືອລາວໃນຕໍ່ໜ້າ ກ່ຽວກັບບາງໂຄງການ ເພື່ອແກ້ໄຂຜົນກະທົບ ຈາກວິກິດການທາງດ້ານການເງິນ ແລະ ເສດຖະກິດຂອງໂລກ.
ພະນະທ່ານ ບົວສອນ ບຸບຜາວັນ ໄດ້ສະແດງຄວາມຂອບໃຈຕໍ່ການເຊື້ອເຊີນ ແລະ ຈະລາຍງານຕໍ່ພະທ່ານປະທານປະເທດຊາບ ແລະ ພິຈາລະນາໃຫ້ຄຳຕອບໃນໄວໆນີ້. ໃນໂອກາດນີ້, ຝ່າຍລາວ ຍັງໄດ້ສະເໜີບາງໂຄງການບູລິມະສິດ ຕໍ່ຝ່າຍຍີ່ປຸ່ນ ເພື່ອການພັດທະນາ ເສດຖະກິດ-ສັງຄົມ ແນໃສ່ແກ້ໄຂຄວາມທຸກຍາກຂອງປະຊາຊົນລາວ, ຊຶ່ງໄດ້ຮັບຄຳເຫັນວ່າຈະມີການພິຈາລະນາໃນທາງບວກ.
ຝ່າຍຍີ່ປຸ່ນ ໄດ້ຖະແຫລງວ່າ ຍິນດີທີ່ຈະສະໜັບສະໜູນຊຸກຍູ້ນັກທຸລະກິດຍີ່ປຸ່ນ ໃຫ້ມາລົງທຶນຢູ່ລາວຫລາຍຂຶ້ນ, ໂດຍທີ່ຝ່າຍລາວຮັບວ່າ ຈະປັບປຸງສະພາບແວດລ້ອມໃຫ້ດີ ພ້ອມທັງຈະປະຕິບັດຕາມກົນໄກການພົບປະ ລະຫວ່າງ ພາກເອກະຊົນຍີ່ປຸ່ນກັບລັດຖະບານໃຫ້ເປັນ ປົກກະຕິ, ແນໃສ່ແກ້ໄຂຂໍ້ສະເໜີຕ່າງໆຮ່ວມກັນ ແລະ ສອງຝ່າຍເຫັນພ້ອມຈະຈັດກອງປະຊຸມວິຊາການລະຫວ່າງພາກລັດຂອງລາວ ແລະ ຍີ່ປຸ່ນ ຄັ້ງທີ 3 ໃນທ້າຍປີ 2009 ນີ້.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
