|
|
|
|
ທ່ານ ນາຍົກລັດຖະມົນຕີ
ສປປ ລາວ ຕ້ອນຮັບທ່ານທູດ
ບຣູໄນ
ເຂົ້າຢ້ຽມອຳລາ
ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບອຳລາຂອງ ທ່ານ H.E.Mr.Johan Thanl Biji Haji Addullah, ເອກອັກຄະລັດຖະທູດ ບຣູໄນ ດາຣູຊາລາມ ປະຈຳ ສປປ ລາວ ໃນຕອນແລງຂອງວັນທີ 19 ມີຖຸນາ 2009 ທີ່ສຳນັກງານນາຍົກລັດຖະມົນຕີ, ນະຄອນຫຼວງວຽງຈັນ ໃນໂອກາດທີ່ທ່ານໄດ້ສຳເລັດການປະຕິບັດໜ້າທີ່ການທູດຢູ່ ສປປ ລາວ.
ທ່ານນາຍົກລັດຖະມົນຕີ ບົວສອນ ບຸບຜາວັນ ໄດ້ສະແດງຄວາມຊົມເຊີຍຕໍ່ຜົນງານຂອງທ່ານທູດ ບຣູໄນ ໃນໄລຍະດຳລົງຕຳແໜ່ງ ເປັນທູດປະຈຳ ສປປ ລາວ. ສປປ ລາວ ແລະ ບຣູໄນດາຣູຊາລາມ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 23 ກໍລະກົດ 1993, ນັບແຕ່ນັ້ນມາ ສປປ ລາວ ແລະ ບຣູໄນດາຣູຊາລາມໄດ້ມີການແລກປ່ຽນ ການຢ້ຽມຢາມຄະນະ ຜູ້ແທນຂັ້ນສູງຂອງທັງສອງ ຝ່າຍເປັນປະຈຳ ແລະ ໃນໂອກາດທີ່ ສປປ ລາວ ເປັນເຈົ້າພາບຈັດງານມະຫະກຳກິລາຊີເກມ ຄັ້ງທີ່ 25 ປີ 2009ນີ້ ທ່ານທູດກໍ່ໄດ້ ແຈ້ງໃຫ້ຊາບວ່າ: ລັດຖະບານ ບຣູໄນ ຕົກລົງເຫັນດີອະນຸມັດເງີນຊ່ວຍເຫຼືອຂອງ ກະສັດ ຊູຕານ ມູນຄ່າ 1,7 ລ້ານໂດລາສະຫະລັດ ສຳລັບການສ້າງສະ ໜາມກິລາໃນຮົ່ມຄົບວົງຈອນ ເພື່ອຮັບໃຊ້ຊີເກມ ຄັ້ງທີ່ 25 ທີ່ຈະມາເຖິງນີ້.
ໃນໂອກາດດຽວກັນນີ້ ທ່ານທູດ ກໍ່ໄດ້ສະແດງຄວາມຂອບໃຈຢ່າງສູງຕໍ່ທ່ານ ບົວສອນ ບຸບຜາວັນ, ນາຍົກລັດຖະ ມົນຕີແຫ່ງ ສປປ ລາວທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ໃນຄັ້ງນີ້.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
