|
|
|
|
ການພົວພັນເສດຖະກິດ ລາວ-ລັດເຊຍໄດ້ຮັບການຟື້ນຟູ ແລະ ມີບັນຍາກາດໃໝ່
ຄະນະຜູ້ແທນຂັ້ນສູງ ຂອງ ສປປ ລາວ ນຳໂດຍ ທ່ານ ດຣ. ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ປະທານຄະນະກຳມາທິການຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລາວ-ລັດເຊຍ ໄດ້ທຳການຢ້ຽມຢາມ ແລະ ເຂົ້າຮ່ວມກອງປະຊຸມຂອງ ຄະນະກຳມາທິການຮ່ວມມືດັ່ງກ່າວ ຄັ້ງທີ່ VII ທີ່ນະຄອນຫລວງມົດສະກູ ໃນລະຫວ່າງວັນທີ 18-19 ມິຖຸນາ 2009. ຫົວໜ້າຄະນະຜູ້ແທນຝ່າຍລາວນຳໂດຍ ທ່ານ ດຣ. ທອງລຸນ ສີສຸລິດ ແລະ ຝ່າຍລັດເຊຍນຳໂດຍທ່ານ ວະລາດີເມັຍ ເລໂອນີເດວິດ ໂຊໂກລິນ, ປະທານສະຫະພັນສະຖິຕິແຫ່ງລັດ, ປະທານຄະນະກຳມາທິການຮ່ວມມືຝ່າຍລັດເຊຍ, ໃນກອງປະຊຸມສອງຝ່າຍໄດ້ມີການແຈ້ງສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດໃຫ້ກັນຊາບ ແລະ ສັງເກດຕີລາຄາການຮ່ວມມືສອງຝ່າຍໃນໄລຍະທີ່ຜ່ານມານັບແຕ່ກອງປະຊຸມຂອງຄະນະກຳ ມາທິການຮ່ວມມື ຄັ້ງທີ່ VI ເປັນຕົ້ນມາ, ຊຶ່ງໃນນັ້ນໄດ້ເປັນເອກະພາບກັນວ່າ: ການພົວພັນທາງດ້ານເສດຖະກິດ-ການຄ້າ ລະ ຫວ່າງສອງປະເທດໄດ້ຮັບການຟື້ນຟູເປັນລຳດັບ ແລະ ມີບັນຍາກາດອັນໃໝ່, ມີການຂະຫຍາຍຕົວດ້ວຍໃນຈັງຫວະທີ່ດີສົມຄວນ, ເຖິງວ່າດ້ານປະລິມານ ຍັງບໍ່ທັນສົມດູນກັບຄວາມອາດສາມາດບົ່ມຊ້ອນຂອງສອງປະເທດ. ໄລຍະ 4 ເດືອນຕົ້ນປີ 2009 ການແລກ ປ່ຽນສິນຄ້າສອງຝ່າຍມີ ມູນຄ່າ 3,8 ລ້ານໂດລາສະຫະລັດ, ທຽບໃສ່ໄລຍະດຽວຂອງປີກ່ອນ ແມ່ນເພີ່ມຂຶ້ນ 483,4%. ໃນດ້ານ ການລົງທຶນ, ລັດເຊຍ ຖຶກຈັດຢູ່ໃນອັນດັບທີ່ 13 ຂອງການລົງທຶນຕ່າງປະເທດຢູ່ລາວ. ໃນໄຕມາດທີ I ຂອງປີນີ້ ການລົງທຶນຂອງ ລັດເຊຍ ຢູ່ລາວມີ 12 ໂຄງການລວມມູນຄ່າທັງໝົດ 52 ລ້ານໂດລາສະຫະລັດ ໂດຍເລັ່ງໃສ່ຂົງເຂດບໍ່ແຮ່, ພະລັງງານໄຟຟ້າ, ການບໍລິການ, ອຸດສາຫະກຳ ແລະ ຫັດຖະກຳ.
ການຮ່ວມມືດ້ານສຶກສາ, ວັດທະນະທຳ, ການທະຫານ ແລະ ອື່ນໆ ກໍ່ໄດ້ຮັບການເສີມຂະຫຍາຍຂຶ້ນເປັນລຳດັບ. ພ້ອມກັນນີ້, ທັງສອງຝ່າຍຍັງໄດ້ປຶກສາກັນ ເພື່ອຮ່ວມກັນຊອກຫາຊ່ອງທາງແກ້ໄຂບັນຫາທາງການຄ້ານຳກັນ ແລະ ເຫັນວ່າບັນຫາຄ້າງຄາເຫລົ່າ ນີ້, ກໍ່ໄດ້ຮັບການແກ້ໄຂທາງດ້ານຫລັກການແລ້ວ ຊຶ່ງເປັນທີ່ເພິ່ງພໍໃຈໃຫ້ແກ່ທັງສອງຝ່າຍ. ໃນໄລຍະເຂົ້າຮ່ວມກອງປະຊຸມດັ່ງກ່າວ ທ່ານຮອງນາຍົກລັດຖະມົນຕີ ດຣ. ທອງລຸນ ສີສຸລິດ ຍັງໄດ້ພົບປະກັບທ່ານ ອາເລັກຊັນເດີ ກູດຣິນ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ເຊຣເກລາວະລົບ, ລັດຖະມົນຕີຊ່ວຍວ່າການກະຊວງການຕ່າງປະເທດ ລັດເຊຍ, ຊຶ່ງໃນນັ້ນທັງ ສອງຝ່າຍໄດ້ຕີລາຄາສູງໝາກຜົນຂອງການຮ່ວມມື ແລະ ການສະໜັບສະໜູນ ເຊິ່ງກັນ ແລະ ກັນ ຕະຫລອດມາໃນເວທີພາກພື້ນ ແລະ ສາກົນ. ຫວ່າງບໍ່ດົນມານີ້, ສປປ ລາວ ກໍ່ໄດ້ສະໜັບສະໜູນ ລັດເຊຍ ທີ່ສະໝັກເຂົ້າເປັນສະມາຊິກອາເຊັມ. ນອກຈາກນີ້, ສປປ ລາວ ຍັງໄດ້ຕີລາຄາສູງການປະກອບສ່ວນຫ້າວຫັນຂອງ ລັດເຊຍ ໃນການສົ່ງເສີມການຮ່ວມມືກັບອາຊຽນ.
ພ້ອມດຽວກັນນີ້, ທ່ານລັດຖະມົນຕີກະຊວງການເງິນ ແລະ ກະຊວງການຕ່າງປະເທດລັດເຊຍ, ກໍ່ຢືນຢັນທີ່ຈະຊຸກຍູ້ໃຫ້ນັກລົງ ທຶນລັດເຊຍ ເຂົ້າມາລົງທຶນຢູ່ ສປປ ລາວຫລາຍຂຶ້ນຕຶ່ມ.
ກອງປະຊຸມຄະນະກຳມະທິການຮ່ວມມືລາວ - ລັດເຊຍ ຄັ້ງນີ້ ໄດ້ດຳເນີນໄປດ້ວຍຜົນສຳເລັດອັນຈົບ ງາມ, ເຊິ່ງໃນນັ້ນປະທານ ຮ່ວມທັງສອງຝ່າຍໄດ້ຮ່ວມກັນລົງນາມໃນບົດບັນທຶກກອງປະຊຸມ, ແລະຜູ້ຕາງໜ້າແຕ່ລະຝ່າຍຍັງຮ່ວມກັນລົງນາມໃນສັນຍາ ເພື່ອພັດ ທະນາໂຄງການໄຟຟ້ານ້ຳຕົກ 1 ແຫ່ງຢູ່ພາກໃຕ້ຂອງລາວ. ພິເສດ, ທ່ານຮອງນາຍົກລັດຖະມົນຕີ, ຍັງໄດ້ຖືເອົາໂອກາດນີ້ ພົບປະ ກັບສະມາຄົມມິດຕະພາບລັດເຊຍ-ລາວ ອີກດ້ວຍ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
