ພະນະທ່ານ ບົວສອນ ບຸບຜາວັນ ນາຍົກລັດຖະມົນຕີແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈເຖິງ ພະນະທ່ານ ສົມຊາຍ ວົງສະຫວັດ, ນາຍົກລັດຖະມົນຕີແຫ່ງ ຣາຊະອານາຈັກໄທ ທີ່ບາງກອກ ເຊິ່ງມີເນື້ອໃນວ່າ: ຂ້າພະເຈົ້າ ໄດ້ຊາບຂ່າວອຸທົກກະໄພໃນ 12 ຈັງຫວັດຂອງ ຣາຊະອານາຈັກໄທ ຊຶ່ງໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນໄທຢ່າງຫລວງຫລາຍ.

ໃນນາມລັດຖະບານ ແລະ ປະຊາຊົນແຫ່ງ ສປປ ລາວ ກໍ່ຄືໃນນາມສ່ວນຕົວ, ຂ້າພະເຈົ້າຂໍສະແດງຄວາມເຫັນໃຈຢ່າງຈິງໃຈມາຍັງພະນະທ່ານ ແລະ ປະຊາຊົນໄທ ໂດຍສະເພາະບັນດາຄອບຄົວທີ່ໄດ້ຮັບຄວາມເສຍຫາຍໃນຄັ້ງນີ້. ຂ້າພະເຈົ້າເຊື່ອຫມັ້ນວ່າດ້ວຍຄວາມເອົາໃຈໃສ່ ແລະ ການຊ່ວຍເຫລືອຂອງລັດຖະບານແຫ່ງຣາຊະອານາຈັກໄທ, ສະພາບການ ແລະ ຊີວິດການເປັນຢູ່ຂອງປະຊາຊົນໃນຈັງຫວັດເຫລົ່ານັ້ນຈະກັບຄືນສູ່ສະພາບປົກກະຕິໂດຍໄວ.