|
|
|
|
ການພົວພັນ ສປປ ລາວ ແລະ ສປປ ເກົາຫລີ ກ້າວເຂົ້າສູ່ສັງກາດໃໝ່ ການຮ່ວມມືສອງປະເທດນັບມື້ໄດ້ຮັບການເປີດກ້ວາງ
ໃນວັນທີ 24 ມີຖຸນາ 2009 ນີ້ ຢູ່ທີ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ, ໄດ້ມີການຈັດງານໂຮມຊຸມນຸມ ສະເຫລີມສະຫລອງການສ້າງຕັ້ງສາຍພົວພັນການທູດ ສປປ ລາວ - ສປປ ເກົາຫລີ ຄົບຮອບ 35 ປີ (24/6/1974-24/6/2009). ໂດຍເປັນກຽດເຂົ້າຮ່ວມຂອງ ທ່ານ ສີສະຫວາດ ແກ້ວບຸນພັນ, ກຳມະການກົມ ການເມືອງສູນກາງພັກ, ປະທານສູນກາງ ແນວລາວສ້າງຊາດ, ຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນສູນກາງ, ທ່ານ ສົມບັດ ເຢຍຣີເຮີ, ກຳມະການສູນກາງພັກ, ເລຂາ ຄະນະພັກ, ເຈົ້າຄອງນະຄອນຫລວງວຽງຈັນ, ທ່ານ ຫຽມ ພົມມະຈັນ, ລັດຖະມົນຕີຊ່ວຍວ່າການກະຊວງການຕ່າງປະເທດ, ທ່ານ ປັກ ມົງກູ, ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປປ ເກົາຫລີ ປະຈຳລາວ. ນອກຈາກນັ້ນກໍ່ຍັງມີບັນດາລັດຖະ ມົນຕີ, ຫົວໜ້າກົມ, ຮອງກົມພ້ອມດ້ວຍພະນັກງານ, ທະຫານ, ຕຳຫລວດ, ນັກຮຽນນັກສຶກສາ ແລະ ພະນັກງານທີ່ກ່ຽວຂ້ອງເຂົ້າ ຮ່ວມອີກດ້ວຍ.
ທ່ານ ຫຽມ ພົມມະຈັນ, ລັດຖະມົນຕີຊ່ວຍວ່າການກະຊວງການຕ່າງປະເທດ ໄດ້ກ່າວໃນງານໂຮມຊຸມ ຄັ້ງນີ້ວ່າ: ສປປ ລາວ ແລະ ສປປ ເກົາຫລີ ໄດ້ມີມູນເຊື້ອການພົວພັນມິດຕະພາບມາແຕ່ດົນນານ ນັບແຕ່ໄລຍະຕໍ່ສູ້ປົດປ່ອຍຊາດຂອງ ສປປ ລາວ, ພັກ-ລັດຖະບານປະຊາຊົນ ສປປ ເກົາຫລີ ອ້າຍນ້ອງກໍ່ໄດ້ໃຫ້ການສະໜັບສະໜູນທາງດ້ານວັດຖຸ ແລະ ຈິດໃຈ ແກ່ພາລະກິດຕໍ່ສູ້ອັນ ເປັນທຳຂອງ ປະຊາຊົນລາວ ຈົນກ້າວຂຶ້ນໄດ້ຮັບໄຊຊະນະອັນສົມບູນ ແລະ ສະຖາປະນາ ສປປ ລາວ ໃນປີ 1975. ພາຍຫລັງ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ, ການພົວພັນລະຫວ່າງ ສປປ ລາວ ແລະ ສປປ ເກົາຫລີ ກໍ່ໄດ້ ກ້າວເຂົ້າສູ່ສັງກາດໃໝ່, ອັນໄດ້ເຮັດໃຫ້ການຮ່ວມມືລະຫວ່າງສອງປະເທດ ນັບມື້ໄດ້ຮັບການເປີດກ້ວາງ, ຊຶ່ງມັນໄດ້ສະແດງອອກໃນ ການຢ້ຽມຢາມ ສປປ ເກົາຫລີ ຢ່າງເປັນທາງການຂອງທ່ານ ໄກສອນ ພົມວິຫານ ໃນເດືອນມີຖຸນາ ປີ 1977, ອັນເປັນການປູ ພື້ນຖານອັນແໜ້ນແກ່ນໃຫ້ແກ່ການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ. ຕະຫລອດໄລຍະ 35 ປີທີ່ຜ່ານມາ, ການພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງ ສປປ ລາວ ແລະ ສປປ ເກົາຫລີ ໄດ້ຮັບການເພີ່ມ ພູນຄູນສ້າງ ແລະ ຂະຫຍາຍຕົວເປັນກ້າວໆມາ, ຄະນະຜູ້ແທນຂອງພັກ-ລັດ ແລະ ອົງການຈັດຕັ້ງມະຫາຊົນຂອງ ສອງປະເທດໄດ້ ໄປມາຫາສູ່ກັນຢ່າງເປັນປົກກະຕິ ແລະ ໃຫ້ການສະໜັບສະໜູນເຊິ່ງກັນແລະກັນບໍ່ວ່າຈະຢູ່ໃນເວທີພາກພື້ນຫຼືສາກົນ.
ໃນຂະນະດຽວກັນ ທ່ານຍັງໄດ້ສະແດງຄວາມເຊື່ອໝັ້ນວ່າ: ພາຍໃຕ້ການນຳພາຂອງພັກແຮງງານເກົາ ຫລີ ໂດຍ ມີ ທ່ານ ກິມ ອິນ ຊຸງ ຜູ້ນຳທີ່ຍິ່ງໃຫຍ່ຂອງປະຊາຊົນ ເກົາຫລີ ໃນເມື່ອກ່ອນກໍຄືທ່ານ ກິມ ເຈິງ ອິນ, ຜູ້ນຳທີ່ຍິ່ງໃຫຍ່ຂອງ ປະຊາຊົນເກົາຫລີ ໃນປັດຈຸບັນ, ປະຊາຊົນເກົາຫລີອ້າຍນ້ອງໄດ້ຮັບຜົນສຳເລັດອັນໃຫຍ່ຫລວງໃນພາລະກິດປົກປັກຮັກສາ ແລະ ສ້າງສາປະເທດຊາດ, ອັນໄດ້ເຮັດໃຫ້ ສປປ ເກົາ ຫລີ ມີສະເຖຍລະພາບດ້ານການເມືອງ, ມີຄວາມເປັນລະບຽບຮຽບຮ້ອຍທາງສັງຄົມ, ມີຄວາມເຂັ້ມແຂງ ທາງດ້ານປ້ອງກັນຊາດ ແລະ ປ້ອງກັນຄວາມສະຫງົບ ແລະ ຊີວິດການເປັນຢູ່ຂອງ ປະຊາຊົນ ສປປ ເກົາຫລີ ໄດ້ຮັບການ ປັບປຸງດີຂຶ້ນເລື້ອຍໆ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
