ສັນຕິພາບ ເອກະລາດ ມິດຕະພາບ ການຮ່ວມມື

ຕີ​ລາຄາໝາກຜົນ​ແຫ່ງ​ການ​ຮ່ວມ​ມືສອງ​ຝ່າຍ ລາວ​-ບຣູ​ໄນ

ທ່ານ ດຣ. ທອງ​ລຸນ ສີ​ສຸ​ລິດ, ຮອງ​ນາຍົກ ລັດຖະມົນຕີ, ລັດຖະມົນຕີ​ວ່າການ​ກະຊວງ​ການ​ຕ່າງ ປະ​ເທດ ​ໄດ້​ກ່າວ​ສະ​ແດງ​ຄວາມ​ຍ້ອງຍໍຊົມ​ເຊີຍ ​ແລະ​ ຕີ​ລາຄາ​ສູງ​ຕໍ່​ໝາກຂອງຜົນ​ບັນດາ​ຂໍ້​ຕົກລົງ ​ແລະ​ ຮ່ວມ​ກັນ​ຜັນ​ຂະຫຍາຍ ​ ລະຫວ່າງ ສປປ ລາວ ​ແລະ ບຣູ​ໄນ ດາ​ລູຊາ​ລຳ ໃນ​ໄລຍະ ​ຜ່ານ​ມາ ​ເປັນຕົ້ນ​ແມ່ນ​ຫມາກຜົນ​ການ​ຢ້ຽມຢາມ ບຣູ​ໄນ ຂອງ​ທ່ານປະທານ​ປະ​ເທດ ​ແຫ່ງ ສປປ ລາວ

ທ່ານ ຈູມ​ມາລີ ໄຊ​ຍະ​ສອນ ເມື່ອວັນ​ທີ 11-13 ມິຖຸນາ 2008 ກໍ​ຄື​ໝາກຜົນ​ຂອງ​ການ​ ຢ້ຽມຢາມ ​ບັນດາ​ການ​ນຳ​ຂັ້ນຕ່າງໆຂອງ​ສອງ​ປະ​ເທດ ລວມທັງ​ຂໍ້​ຕົກລົງ ການຍົກ​ເວັ້ນວີ​ຊາ​ທາງ ລັດຖະການ ແລະ​ ການ​ທູດ, ​ສັນຍາ​ວ່າ​ດ້ວຍ​ການ​ຂົນ​ສົ່ງ​ທາງ​ອາກາດ, ການ​ແລກປ່ຽນ​ທີ່ດິນ ຊຶ່ງ​ກັນ ​ແລະ​ ກັນສຳລັບ​ການ​ກໍ່ສ້າງ​ສຳນັກງານ​ສະຖານທູດ, ບົດ​ບັນທຶກ​ຄວາມ​ເຂົ້າ​ໃຈກ່ຽວ​ກັບ​ການ​ ສ້າງຕັ້ງ ຄະນະ​ກຳມາ​ທິການຮ່ວມວ່າ​ດ້ວຍ​ການ​ຮ່ວມ​ມື​ສອງ​ຝ່າຍ, ການ​ຍົກ​ເວັ້ນວີ​ຊາສຳລັບ​ຜູ້​ຖື​ ໜັງສືຜ່ານ​ແດນທຳ​ມະ​ດາ ​ແລະ​ ສັນຍາ​​ຍົກ​ເວັ້ນການ​ເກັບ​ອາກອນ​ຊ້ຳ​ຊ້ອນ.

ໃນລະຫວ່າງ​ການ​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ ຂອງ​ທ່ານ ໂຈ​ຮານ ຕາ​ນີ ອັບ​ດຸນ​ລາ, ​ເອກ​ອັກ ຄະ​ຣາຊະທູດ​ວິສາມັນ ຜູ້​ມີ​ອຳນາດ​ເຕັມ ​ແຫ່ງ ບຣູ​ໄນ ດາ​ລູຊາ​ລຳ ປະຈຳ ສປປ ລາວ, ​ໃນ​ວັນ​ທີ 26 ມິຖຸນາ 2008 ທີ່​ກະຊວງ​ການ​ຕ່າງປະ​ເທດ​​ລາວ, ທ່ານ​ຮອງ​ນາຍົກລັດຖະມົນຕີ ດຣ.ທອງ​ລຸນ ສີ​ສຸ​ລິດ ​ໄດ້​ຕາງໜ້າ​ໃຫ້​ລັດຖະບານ​ລາວ ກໍ​ຄື​ປະຊາຊົນ​ລາວ ​ພ້ອມຈະ​ສືບຕໍ່​ການ​ພົວພັນ​ຮ່ວມ​ມື​ ຢ່າງ​ໃກ້​ຊິດ ​ເພື່ອ​ນຳ​ຜົນ​ປະ​ໂຫຍ​ດມາສູ່​ສອງ​ຝ່າຍ.

ທ່ານ ໂຈ​ຮານ ຕາ​ນີ ອັບ​ດຸນ​ລາ ກໍ​ໄດ້​ກ່າວ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ ຕໍ່​ການ​ຮ່ວມ​ມື​ ໃນ​ຂໍ້​ຕົກລົງ ທີ່​ຕ່າງ​ຝ່າຍ​ຕ່າງ​​ໄດ້​ໃຫ້​ຄວາມ​ສຳຄັນ ແລະ ໄດ້​ຮັບ​ຜົນສຳ​ເລັດ​ໃນ​ຫລາຍ​ດ້ານ​ ຊຶ່ງໄດ້​ ນຳ​ຜົນ​ປະ​ໂຫຍ​ດມາ​ໃຫ້ປະຊາຊົນ ກໍ​ຄື​ຜົນ​ປະ​ໂຫຍ​ດລວມຂອງສອງ​ປະ​ເທດ ບຣູ​ໄນ-ລາວ ​ແລະ​ ໃນຕໍ່ໜ້າ​ທັງ​ສອງ​ຝ່າຍ ກໍ​ຈະ​ໄດ້​ມີ​ຂໍ້​ຕົກລົງ​ການ​ຮ່ວມ​ມື​ວ່າ​ດ້ວຍ​ການ​ສົ່ງ​ເສີມ ​ແລະ ປົກ​ປ້ອງ​ການ​ ລົງທຶນ ແລະ​ ຈະ​ຮ່ວມ​ປຶກສາ​ຫາລື​ບັນຫາ​ຕ່າງໆ​ຕື່ມ​ອີກ ລະຫວ່າງ​ສອງ​ປະ​ເທດ ​ເພື່ອ​ຮັດ​ແໜ້ນ​ ການ​ຮ່ວມ​ມື​ອັນ​ເປັນມູນ​ເຊື້ອມາຍາ​ວນານ.