ນາຍົກລັດຖະມົນຕີແຫ່ງ ສປປ ລາວ ສົ່ງສານສະແດງຄວາມຊົມເຊີຍເຖິງ ນາຍົກລັດຖະມົນຕີແຫ່ງ ສ.ອິນເດຍ
ໃນວັນທີ 27 ພຶດສະພາ 2009, ພະນະທ່ານ ບົວສອນ ບຸບຜາວັນ, ນາຍົກລັດຖະມົນຕີແຫ່ງ ສປປ ລາວ ໄດ້ສະແດງຄວາມຊົມເຊີຍເຖິງ ພະນະທ່ານ ດຣ.ມັນມຸຮານຊິງ, ນາຍົກລັດຖະມົນຕີແຫ່ງ ສ.ອິນເດຍ ທີ່ນິວເດນລີ ຊຶ່ງສານມີເນື້ອໃນສຳຄັນວ່າ: ພະນະທ່ານ ເນື່ອງໃນ ໂອກາດທີ່ພະນະທ່ານຖືກເລືອກຄືນໃໝ່ໃຫ້ເປັນ ນາຍົກລັດຖະມົນຕີແຫ່ງ ສ.ອິນເດຍ, ໃນນາມລັດຖະບານ ແລະ ປະຊາຊົນແຫ່ງ ສປປ ລາວ ແລະ ໃນນາມສ່ວນຕົວ, ຂ້າພະເຈົ້າຂໍສົ່ງຄຳຊົມເຊີຍຢ່າງຈິງໃຈ ແລະ ພອນໄຊອັນປະເສີດມາຍັງພະນະທ່ານ, ຂໍໃຫ້ພະນະທ່ານຈົ່ງມີ ພະລານາໄມສົມບູນ ແລະ ໄດ້ຮັບຜົນສຳເລັດຢ່າງສະຫງ່າງາມໃນການດຳເນີນພາລະກິດອັນສູງສົ່ງຂອງພະນະທ່ານ.
ຂ້າພະເຈົ້າຫວັງວ່າ ຈະໄດ້ຮັບການຮ່ວມມືກັບພະນະທ່ານ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດເຮົາ ເພື່ອຜົນປະໂຫຍດຂອງປະຊາຊົນສອງຊາດ ລາວ ແລະ ອິນເດຍ ກໍ່ເພື່ອພາລະກິດສັນຕິພາບ, ສະຖຽນລະພາບ ແລະ ການຮ່ວມມືພັດທະນາໃນພາກພື້ນ ແລະ ໃນໂລກ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
