ຄະນະຜູ້ແທນຂັ້ນສູງຂອງພັກປະຊາຊົນ ປະຕິວັດລາວ ສຳເລັດການຢ້ຽມຢາມ ສປປ ເກົາຫລີ

ຕອບສະໜອງຕາມຄຳເຊີນຂອງ ສູນກາງພັກແຮງງານເກົາຫລີ, ຄະນະຜູ້ແທນຂັ້ນສູງຂອງ ພັກປະຊາຊົນ ປະຕິວັດລາວ ນຳໂດຍທ່ານ ທອງລຸນ ສີສຸລິດ, ກຳມະການກົມການ ເມືອງສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ໄດ້ທຳການຢ້ຽມຢາມ ສປປ ເກົາຫລີ ຢ່າງເປັນທາງການເປັນເວລາ 3 ວັນ, ນັບແຕ່ວັນທີ 21-23 ຕຸລາ 2008 ນີ້.

ການຢ້ຽມຢາມ ສປປ ເກົາຫລີ ຂອງຄະນະໃນຄັ້ງນີ້, ເປັນການປະຕິບັດແຜນການຮ່ວມມື ແລະ ແລກປ່ຽນຄະນະຜູ້ແທນຂອງສອງພັກໃນປີ 2008 ແລະ ເພື່ອຮັດແໜ້ນສາຍພົວພັນມິດຕະພາບອັນເປັນມູນເຊື້ອອັນດີງາມລະຫວ່າງ ສປປ ລາວ-ສປປ ເກົາຫລີ ແລະ ປຶກສາຫາລືແຜນການຮ່ວມມື ແລະ ແລກປ່ຽນຄະນະຜູ້ແທນລະຫວ່າງ ພັກປະຊາຊົນ ປະຕິວັດລາວ ແລະ ພັກແຮງງານເກົາຫລີ ໃນຊຸມປີຕໍ່ໜ້າ.

ນອກນີ້, ຍັງໄດ້ມີການພົບປະການນຳຂັ້ນສູງຂອງພັກແຮງງານເກົາຫລີ ແລະ ເປັນກຽດເຂົ້າ ຢ້ຽມຂໍ່ານັບສະຫາຍ ກິມ ເຢິງນາມ, ປະທານຄະນະປະທານສະພາປະຊາຊົນສູງສຸດ ແຫ່ງ ສປປ ເກົາຫລີ ແລະ ໄດ້ຮັບການຕ້ອນຮັບອັນສະໜິດສະໜົມຖານເພື່ອນມິດສະຫາຍຈາກ ສູນກາງພັກແຮງງານເກົາຫລີ.

ໃນໂອກາດດັ່ງກ່າວ, ສອງຝ່າຍໄດ້ລົງນາມໃນຂໍ້ຕົກລົງວ່າດ້ວຍການຮ່ວມມື ແລະ ການແລກປ່ຽນຄະນະຜູ້ແທນສຳລັບໄລຍະປີ 2008-2010, ເຊິ່ງການຢ້ຽມຢາມດັ່ງກ່າວ ໄດ້ຮັບຜົນສຳເລັດຕາມຈຸດປະສົງລະດັບຄາດໝາຍ.