ທ່ານນາຍົກລັດຖະມົນຕີ ຕ້ອນຮັບທູດຕີມໍແລັສເຕ ແລະ ທູດເກຣັກ
ໃນວັນທີ 28 ພຶດສະພາ 2009, ທີ່ສຳນັກງານນາຍົກລັດຖະມົນຕີ, ພະນະທ່ານ ບົວສອນ ບຸບຜາວັນ, ນາຍົກລັດຖະມົນຕີແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນິໂຄລາສ ແວມໂວນາກີ, ເອກອັກຄະລັດຖະທູດປະເທດເກຣັກ ຄົນໃໝ່ປະຈຳລາວ ແລະ ໄດ້ຕ້ອນຮັບທ່ານໂຈອາວ ເຟຣດຕຣາສເດີ ກາມາຣາ, ເອກອັກຄະລັດຖະທູດແຫ່ງ ຕີມໍແລັສເຕ ຄົນໃໝ່ປະຈຳລາວ ເຊິ່ງມີສຳນັກງານຕັ້ງຢູ່ ບາງກອກ ປະເທດໄທເຊັ່ນດຽວກັນ.
ໃນໂອກາດຕ້ອນຮັບການເຂົ້າຢ້ຽມຂໍ່ານັບຂອງທ່ານທູດທັງສອງໃນຄັ້ງນີ້, ທ່ານນາຍົກລັດຖະມົນຕີ ໄດ້ກ່າວສະແດງຄວາມຕ້ອນຮັບ ແລະ ຊົມເຊີຍຕໍ່ບັນດາທ່ານທູດທີ່ຖືກແຕ່ງຕັ້ງມາດຳລົງຕຳແໜ່ງເປັນເອກອັກຄະລັດຖະທູດປະຈຳລາວ ແລະ ຫວັງວ່າທ່ານທູດແຕ່ລະທ່ານ ຈະຕັ້ງໜ້າປະກອບສ່ວນໃນການຮັດແໜ້ນສາຍພົວພັນຮ່ວມມືລະຫວ່າງ ສປປ ລາວ ແລະ ປະເທດຂອງຕົນໃຫ້ນັບມື້ນັບແໜ້ນແຟ້ນຂຶ້ນ.
ນອກນີ້, ໃນວັນດຽວກັນ ທ່ານ ທອງສິງ ທຳມະວົງ, ປະທານສະພາແຫ່ງ ສປປ ລາວ ກໍ່ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານໂຈອາວ ເຟຣດຕຣາສເດີ ກາມາຣາ, ເອກອັກຄະລັດຖະທູດແຫ່ງ ຕີມໍແລັສເຕ ຄົນໃໝ່ປະຈຳລາວ ພ້ອມທັງຕີລາຄາສູງການມາປະຕິບັດໜ້າທີ່ ຂອງທ່ານທູດໃນຄັ້ງນີ້ດ້ວຍ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
