|
|
|
|
ການຊ່ວຍເຫລືອຈາກສາກົນ ປະກອບສ່ວນໃນການພັດທະນາຢູ່ລາວ
ທ່ານ ຫຽມ ພົມມະຈັນ, ລັດຖະມົນຕີຊ່ວຍວ່າການກະຊວງການຕ່າງປະເທດ ໄດ້ລາຍງານຕໍ່ກອງປະຊຸມສຳມະນາ ວິທະຍາສາດ ທີ່ໄດ້ຈັດ ຂຶ້ນໃນອາທິດທີ່ຜ່ານມາ ຢູ່ນະຄອນຫລວງວຽງຈັນ, ໂດຍທ່ານໄດ້ຍົກໃຫ້ເຫັນວ່າ: ການຊ່ວຍເຫລືອຈາກ ສາກົນ ໄດ້ປະກອບສ່ວນສຳຄັນເຂົ້າ ໃນການຮັບປະກັນໃຫ້ເສດຖະກິດ ຂອງລາວຂະຫຍາຍຕົວຢ່າງຕໍ່ເນື່ອງ ໂດຍສະເພາະຜົນສຳເລັດ ໃນການເຄື່ອນໄຫວ ຍາດແຍ່ງການຊ່ວຍເຫລືອ, ຊຶ່ງ ລາວເຮົາໄດ້ເປັນເຈົ້າພາບຈັດກອງປະຊຸມໂຕະມົນຄັ້ງທີ່ 9 ທີ່ນະຄອນ ຫລວງວຽງຈັນ, ເພື່ອລະດົມທຶນຊ່ວຍເຫລືອຈາກບັນດາປະເທດ ແລະ ອົງການຈັດຕັ້ງສາກົນ, ສະຖາບັນການເງິນສາກົນຕ່າງໆ ເພື່ອ ໃຊ້ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ, ບັນດາຜູ້ໃຫ້ທຶນລ້ວນແຕ່ຕີລາຄາສູງ ແລະ ປະກາດໃຫ້ ການຊ່ວຍເຫລືອແກ່ລາວ. ນອກນີ້ ລັດຖະບານຍັງໄດ້ລົງນາມຮ່ວມກັບບັນດາຜູ້ໃຫ້ທຶນ ໃນຖະແຫລງການວຽງຈັນ ວ່າດ້ວຍການເຮັດ ໃຫ້ການຊ່ວຍເຫລືອມີປະສິດທິຜົນອີກດ້ວຍ, ທັງນີ້ ກໍເພື່ອຮັບປະກັນໃຫ້ການຄຸ້ມຄອງ ແລະ ນຳໃຊ້ທຶນຊ່ວຍເຫລືອທາງການພັດທະ ນາເກີດຜົນປະໂຫຍດສູງສຸດ.
ຜ່ານມາ ລາວເຮົາສາມາດຍາດແຍ່ງການຊ່ວຍເຫລືອ ເພື່ອການພັດທະນາທັງໃນຂອບສອງຝ່າຍ ແລະ ຫລາຍຝ່າຍ ເປັນມູນຄ່າທັງໝົດປະມານ 2.007,4 ລ້ານໂດລາສະຫະລັດ ເພື່ອປະຕິບັດ 2.094 ໂຄງການ ໃນນີ້ການຊ່ວຍເຫລືອລ້າມີປະມານ 1.294,47 ລ້ານໂດລາສະຫະລັດ, ສະເລ່ຍແຕ່ລະປີສາມາດຍາດແຍ່ງການຊ່ວຍເຫລືອໄດ້ກວ່າ 400 ລ້ານໂດລາສະຫະລັດ. ສຳ ລັບສົກປີ 2008-2009 ສາມາດບັນລຸໄດ້ 559,17 ລ້ານໂດລາສະຫະລັດ. ໃນຊຸມປີຕໍ່ໜ້າ ອາດມີບາງປະເທດຈະຫລຸດການຊ່ວຍ ເຫລືອ ດ້ວຍເຫດຜົນຕ່າງໆ, ບາງປະເທດຈະຫລຸດການຊ່ວຍເຫລືອ ແຕ່ຈະເພີ່ມການໃຫ້ກູ້ຢືມ ແລະ ການລົງທຶນໂດຍກົງເຂົ້າລາວ ຫລາຍຂຶ້ນ, ບາງປະເທດ ຍັງຈະສືບຕໍ່ໃຫ້ການຊ່ວຍເຫລືອ ແລະ ເພີ່ມການລົງທຶນ ເປັນຕົ້ນ ປະເທດຍີ່ປຸ່ນ ແລະ ບາງປະເທດ ກໍຍັງສຶບຕໍ່ ໃຫ້ການຊ່ວຍເຫລືອໂດຍຜ່ານ NGOs ຢູ່ລາວຫລາຍຂຶ້ນ, ແຕ່ເຖິງຢ່າງໃດກໍຕາມໃນທ່າອ່ຽງລວມລາວເຮົາຍັງມີຄວາມ ອາດສາມາດ ຍາດແຍ່ງ ການຊ່ວຍເຫລືອ ທາງການເພື່ອ ການພັດທະນາໄດ້ຫລາຍກວ່າເກົ່າ.
ທ່ານ ລັດຖະມົນຕີຊ່ວຍວ່າການກະຊວງການຕ່າງປະເທດ ຍັງໄດ້ຍົກໃຫ້ເຫັນເຖິງຂໍ້ຄົງຄ້າງທີ່ຕ້ອງໄດ້ສືບຕໍ່ແກ້ໄຂຢ່າງ ຮີບດ່ວນເປັນຕົ້ນ: ການກຳນົດແຜນຍຸດທະສາດຍາດແຍ່ງການຊ່ວຍເຫລືອໄລຍະຍາວ ແລະ ການຫັນແຜນການພັດທະນາເປັນໂຄງ ການລະອຽດ, ບັນຫາ ການການຈັດລຽນໂຄງການບູລີມະສິດ, ການຈັດຕັ້ງປະຕິບັດ, ການຄຸ້ມຄອງ, ການຕິດຕາມປະເມີນຜົນໂຄງ ການ, ການປັບປຸງການ ປະສານງານຢູ່ພາຍໃນ, ປັບປຸງກົງຈັກສາຍຕັ້ງດ້ານວິຊາການຢູ່ຂະແໜງການ ແລະ ທ້ອງຖິ່ນ ອັນເຮັດໃຫ້ ການປະຕິບັດດຳລັດ ແລະ ບົດແນະນຳ ທີ່ກ່ຽວຂ້ອງໃຫ້ທົ່ວເຖິງ ແລະ ເຂັ້ມງວດ.
ທີ່ຢູ່: ຖະໜົນ 23 ສິງຫາ, ບ້ານ ໂພນໄຊ , ເມືອງໄຊເສດຖາ, ນະຄອນຫລວງວຽງຈັນ,ສປປ ລາວ , ຕູ້ໄປສະນິ ,ອີເມວ : ict@mofa.gov.la
