ຄະນະນຳກະຊວງ
/
ຄະນະກົມ
/
ຊື່ບັນດາກົມຕ່າງໆ
/
ລັດຖະມົນຕີປະຈຳສຳນັກງານປະທານປະເທດ
ສຳເລັດການຢ້ຽມຢາມອາເມລິກາ
ໃນລະຫວ່າງວັນທີ 12-23 ເມສາ 2008, ທ່ານສຸບັນ ສຣິດທິລາດ,
ລັດຖະມົນຕີປະຈຳສຳນັກງານປະທານ ປະເທດ,
ປະທານຄະນະກຳມະການຄວບຄຸມຢາເສບຕິດ ຂັ້ນສູນກາງໄດ້ເດີນທາງ
ໄປຢ້ຽມຢາມ ສະຫະລັດອາມເລິກາ, ເພື່ອແຈ້ງສະພາບການລົບລ້າງການປູກຟິ່ນຢູ່ລາວ
ແລະ ສະແດງຄວາມຂອບໃຈຕໍ່ ລັດຖະບານອາເມລິກາ
ທີ່ໄດ້ໃຫ້ການ ຊ່ວຍເຫຼືອຈົນເຮັດໃຫ້ໄດ້ຮັບຜົນສຳເລັດ
ແລະ ເພື່ອຂົນຂວາຍຍາດແຍ່ງການຊ່ວຍເຫຼືອ ແລະ ຮ່ວມມືຈາກລັດຖະບານ
ສະຫະລັດ, ເພື່ອແກ້ໄຂຄວາມທຸກຍາກຂອງປະຊາຊົນ 1.100
ບ້ານ ພາຍຫຼັງຢຸດເຊົາການປູກຝິ່ນ ແລະ ຮັບປະກັນ ຄວາມຍືນຍົງຂອງການລົບລ້າງການປູກຟິ່ນ
ພ້ອມທັງບັນຫາຢາເສບຕິດປະເພດອື່ນໆທີ່ມີຢູ່ລາວ.
ທ່ານ ສຸບັນ ສຣິດທິລາດ ໄດ້ພົບປະຢ້ຽມຢາມທ່ານ ດຣ ຈອນ ພ
ວອນເຕີ( DR john P Walter), ຜູ້ອຳ ນວຍການຫ້ອງການນະໂຍບາຍຄວບຄຸມຢາເສບຕິດ
ຂອງທຳນຽບຂາວ ແລະ ເຈົ້າໜ້າທີ່ຂັ້ນສູງຂອງກະຊວງການຕ່າງ
ປະເທດ, ກະຊວງປ້ອງກັນປະເທດ, ກະຊວງຍຸຕິທຳ ແລະ ສູນຄວບຄຸມຢາເສບຕິດ
ແລະ ຕ້ານອາດຊະຍາກຳ ແລະ ອົງການຈັດຕັ້ງອື່ນໆທີ່ກ່ຽວຂ້ອງ
ກັບການຄວບຄຸມຢາເສບຕິດ ຢູ່ນະຄອນຫລວງວໍຊິງຕັນ,
ນະຄອນນີວຢອກ, ເມືອງ ລອດແອນເຈີລິດ ແລະ ເມືອງຮາວາຍ.
ໃນເວລາການເຄື່ອນໄຫວວຽກງານຢູ່ນີວຢອກ, ທ່ານສຸບັນ
ສຣິດທິລາດ ກໍໄດ້ໃຫ້ສຳພາດ ອອກອາກາດທາງ ສະຖານີວິທະຍຸກະຈາຍສຽງອາເມລິກາ
(VOA) ແລະ ໃນໂອກາດນີ້ ທ່ານໄດ້ໃຫ້ສຳພາດວ່າ “ເວົ້າຕາມຫຼັກການທົ່ວ
ໄປແລ້ວ ລັດຖະບານປະເທດຫນຶ່ງ ເຊື້ອເຊີນລັດຖະມົນຕີອີກລັດຖະບານໜຶ່ງ
ມາຢ້ຽມຢາມກໍ່ສະແດງໃຫ້ເຫັນວ່າ ລັດຖະບານນັ້ນ ມີເຈດຕະນາວ່າຢາກໃຫ້ມີການແລກປ່ຽນຄວາມຄິດຄວາມເຫັນນຳກັນກ່ຽວກັບບັນຫາໃດບັນຫາໜຶ່ງ
ເພື່ອ ຄວາມເຂົ້າໃຈກັນ ແລະ ຮ່ວມມືກັນໃນອະນາຄົດ.
ການຕອບສະໜອງການເຊື້ອເຊີນນັ້ນ ກໍແມ່ນສັນຍານແຫ່ງຄວາມປາດ
ຖະໜາດີຂອງລັດຖະບານນັ້ນເຊັ່ນກັນ. ສະນັ້ນ, ໃນຖານະທີ່ຂ້າພະເຈົ້າຮັບຜິດຊອບບັນຫາຢາເສບຕິດຢູ່
ສປປ ລາວ ໄດ້ ຖືກເຊື້ອເຊີນໃຫ້ມາຢ້ຽມຢາມ ສະຫະລັດອາເມລິກາໃນເທື່ອນີ້
ກໍບໍ່ແມ່ນຄັ້ງທຳອິດ, ນີ້ກໍໝາຍຄວາມວ່າ ສະພາບການ ຮ່ວມມືໃນດ້ານການ
ລົບລ້າງການປູກຝິ່ນ ແລະ ການປາບປາມການຄ້າຂາຍຢາເສບຕິດທີ່ຜິດກົດໝາຍ
ລະຫວ່າງ 2 ປະເທດແມ່ນດີຂຶ້ນ. ສະນັ້ນ,ການມາຢ້ຽມຢາມຂອງຂ້າພະເຈົ້າໃນເທື່ອນີ້
ແມ່ນມີຄວາມສຳຄັນຫລາຍ ຍ້ອນມີຫຼາຍເຫດ ການທີ່ຈະແຈ້ງໃຫ້ກັນຮູ້.
ສປປ ລາວ ໄດ້ລົບລ້າງການປູກຝິ່ນຢ່າງເປັນທາງການໃນປີ
2006, ວົງຄະນາຍາດສາກົນ ໄດ້ ຮັບຮູ້ຢ່າງເປັນເອກະສັນກັນ,
ລັດຖະບານລາວ ໄດ້ມີຄວາມພະຍາຍາມຫຼາຍຂຶ້ນໃນການ ປະຕິບັດຖະແຫລງການ
ຂອງ ກອງປະຊຸມສະຫະປະຊາຊາດສະໄໝພິເສດ ປີ 1998 ດ້ວຍການຮ່ວມໄມ້ຮ່ວມມືກັບ
ວົງຄະນາຍາດສາກົນ, ຊຶ່ງມາເຖິງ ປະຈຸບັນນີ້ ຍັງບໍ່ທັນມີປະເທດໃດໃນໂລກ
ທີ່ເຮັດໄດ້ຄືກັບປະເທດຂອງຂ້າພະເຈົ້າ. ອັນນີ້ແມ່ນການປະກອບສ່ວນອັນ
ໃຫຍ່ຫລວງຂອງ ສປປລາວ ເຂົ້າໃນຄວາມພະຍາຍາມຂອງບັນດາປະເທດໃນໂລກ
ເພື່ອເຮັດໃຫ້ໂລກປາດສະຈາກຢາ ເສບຕິດທຸກປະເພດໃນປີ
2018. ຕໍ່ບັນຫາດັ່ງກ່າວນີ້, ໃນການພົບປະກັບເຈົ້າໜ້າທີ່ຂັ້ນສູງ
ຂອງຫຼາຍອົງການຂອງລັດ ຖະບານອາເມລິກາ ທີ່ກ່ຽວກັບການຕ້ານຢາເສບຕິດ,
ຂ້າພະເຈົ້າກໍໄດ້ສະແດງ ຄວາມຂອບໃຈຢ່າງເລີກເຊີ່ງຂອງ
ລັດຖະບານລາວ ຕໍ່ລັດຖະບານອາເມລິກາ ທີ່ໄດ້ໃຫ້ການຊ່ວຍເຫຼືອໃນຫຼາຍດ້ານ
ຈົນເຮັດໃຫ້ການລົບລ້າງການປູກຝິ່ນ ໄດ້ສຳເລັດລົງຢ່າງໜ້າເພີ່ງພໍໃຈ.
ຢູ່ວຽນນາ, ນະຄອນຫລວງຂອງປະເທດ ໂອຕຣິດສ, ໃນກອງປະຊຸມປະຈຳປີ
ຂອງ ກຳມະການຢາເສບຕິດໃນປີນີ້ ໄດ້ພິຈາລະນາຜົນສຳເລັດ
ແລະ ຂໍ້ຫຍຸ້ງຍາກທີ່ຄ້າງຄາ ໃນການປະຕິບັດຖະແຫລງການ
ຂອງກອງປະຊຸມໃຫຍ່ສະໄໝພິເສດຂອງ ສປຊ ປີ 1998 ເພື່ອກະກຽມໃຫ້ກອງປະ
ຊຸມກາງສະໄໝທີ່ຈະເປີດຂຶ້ນໃນປີ 2009 ຢູ່ ນິວຢອກ,
ສປປລາວ ກໍ່ອາດຈະຖືກຍົກຂຶ້ນມາເປັນຕົວແບບ ອັນໜຶ່ງ
ຍ້ອນມີຜົນສຳເລັດອັນປະເສີດ ທີ່ທົ່ວໂລກຍັງບໍ່ທັນເຮັດໄດ້.
ໃນການພົບປະກັບເຈົ້າໜ້າທີ່ຂັ້ນສູງ ຂອງສະຫະລັດ,
ໃຜກໍ່ຖາມວ່າ ລັດຖະບານລາວ ສະຫຼຸບແນວໃດ ແລະ ດ້ວຍເຫດຜົນແນວໃດຈິ່ງສາມາດລົບລ້າງການປູກຟິ່ນໄດ້.
ອັນນີ້ກໍແມ່ນອັນໜຶ່ງ ທີ່ຫລາຍປະເທດ ຢາກຮູ້ ແລະ ຢາກນຳເອົາ
ໄປໝູນໃຊ້ ໃນປະເທດທີ່ບໍ່ທັນເຮັດໄດ້ຫຼືເຮັດແລ້ວ
ແຕ່ບໍ່ທັນສຳເລັດ. ຄວາມສົນໃຈ ຂອງວົງຄະນາຍາດສາກົນກໍຄື
ຂອງລັດຖະບານສະຫະລັດອາເມລິກາແມ່ນຢາກຮູ້ວ່າ ສປປ
ລາວ ຈະເຮັດຢ່າງໃດຈະ ເຮັດໃຫ້ການຢຸດຕິການ ປູກຝິ່ນນີ້
ຍືນຍົງຕະຫລອດໄປ ແລະ ຈະເຮັດແນວໃດບໍ່ໃຫ້ ສປປ ລາວ
ເປັນທາງຜ່ານຢາ ເສບຕິດຈາກປະເທດນີ້ໄປປະເທດອື່ນ.
ຕໍ່ຄຳຖາມທີ່ວ່າ ສະຖານະການປູກຝິ່ນຢູ່ລາວໃນປະຈຸບັນເປັນແນວໃດ,
ເປັນຫຍັງຈຶ່ງມີສະພາບການປູກຝິ່ນຄືນ ນັ້ນ, ທ່ານ ສຸບັນ
ສະຣິດທິຣາດ ໄດ້ໃຫ້ຄຳຕອບວ່າ: ສະພາບການປູກຝິ່ນຢູ່ ສປປ ລາວ
ແມ່ນມີໜ້ອຍທີ່ສຸດໃນປີ 2006 ທີ່ປະກາດວ່າລາວ ລົບລ້າງການປູກຝິ່ນຢ່າງເປັນທາງການ,
ແຕ່ກໍ່ຍັງມີການປູກຝິ່ນຢູ່ປະມານ 2.500 ເຮັກຕາ, ພໍມາ
ເຖິງປີ 2007 ຍັງເຫຼືອແຕ່ 1.500 ເຮັກຕາ. ແຕ່ການສຳຫລວດເບື້ອງຕົ້ນໃນປີ
2008 ນີ້, ໄດ້ຮູ້ວ່າ ຫລາຍບ່ອນ ກໍມີການປູກ ແລະ
ຫລາຍບ່ອນທີ່ປູກໃນປີ 2007 ກໍບໍ່ມີການປູກອີກ. ອັນນີ້ກໍສະແດງວ່າລັດຖະບານ
ຮັກສາການຫຼຸດ ຜ່ອນເນື້ອທີ່ການປູກຟິ່ນນັ້ນລົງແຕ່ລະປີ.
ຕາມການຕີລາຄາ ຂອງ CNC (Center for Narcotic and Crime)
ຂອງສູນວິໄຈຢາເສບຕິດ ແລະ ອາດຊະຍາກຳ ທີ່ຂຶ້ນກັບອົງການ
CIA ໄດ້ຕີລາຄາວ່າ: ຕາມການຄາດຄະເນການປູກ ຝິ່ນຢູ່ລາວໃນປີ
2008 ນີ້, ຫຼັງຈາກປະກາດວ່າ ສປປ ລາວ ບໍ່ມີການປູກຝິ່ນອີກ
2006 ແມ່ນຢູ່ໃນລະດັບດຽວ ກັນກັບການປູກຝິ່ນຢູ່ປະເທດໄທໃນປະຈຸບັນ
ທີ່ປະເທດນີ້ໄດ້ປະກາດເປັນປະເທດຢຸດຕິການປູກຝິ່ນ
ມາໄດ້ 20 ກວ່າປີ ແລ້ວ.
ສຳລັບທິດທາງການແກ້ໄຂໃນຕໍ່ໜ້ານີ້, ການປູກຝິ່ນໄດ້ໝົດໄປ
ແຕ່ປັດໄຈທີ່ຊຸກຍູ້ໃຫ້ປະຊາຊົນປູກຝິ່ນແມ່ນມີ
ຫລາຍເຊັ່ນ: ຄົນຕິດຝິ່ນຍັງ 12.000 ຄົນ, ລວມທັງຜູ້ຖືກປິ່ນປົວແລ້ວ
ແຕ່ກັບມາກິນຝິ່ນຄືນ, ລາຄາຝິ່ນ ໄດ້ເພີ່ມຂຶ້ນແຕ່ລະປີ,
ໃນປະຈຸບັນເກືອບຮອດ 1.000 ໂດລາສະຫະລັດ/ກິໂລ, ຜູ້ທີ່ທຸກຍາກຫລາຍກວ່າໝູ່ຢູ່
ສປປລາວ ແມ່ນພວກທີ່ເຄີຍປູກຝິ່ນ; ປະຈຸບັນມີຢູ່ປະມານ
1.100 ບ້ານ ທີ່ຢຸດຕິການປູກຝິ່ນແລ້ວແຕ່ຍັງບໍ່ທັນໄດ້ຮັບການແກ້ໄຂ,
ລໍຖ້າການຊ່ວຍເຫຼືອ. ໃນຕໍ່ໜ້າພວກເຮົາຈະວາງຍຸດທະສາດແຕ່ນີ້ເຖິງ
ປີ 2012 ເພື່ອແກ້ໄຂບັນຫານີ້. ສະນັ້ນ, ພວກ ເຮົາໄດ້ຮຽກຮ້ອງໃຫ້ວົງຄະນາຍາດສາກົນ
ພ້ອມກັນມາຊ່ວຍເຫລືອພວກເຮົາ ເພື່ອແກ້ໄຂບັນຫາດັ່ງກ່າວ
ແລະ ປະກົດວ່າ ປະຈຸບັນທຸກອົງການທີ່ກ່ຽວຂ້ອງກັບຢາເສບຕິດຂອງສະຫະລັດອາເມລິກາ
ແມ່ນມີຄວາມສົນໃຈຕໍ່ຍຸດທະສາດນີ້.
