ຄະນະນຳກະຊວງ / ຄະນະກົມ / ຊື່ບັນດາກົມຕ່າງໆ /

ທ່ານ ດຣ. ທອງລຸນ ສີສຸລິດ ຊົມເຊີຍ ລັດຖະມົນຕີຕ່າງປະເທດມາເລເຊຍ

ວັນທີ 20 ມີນານີ້, ທ່ານ ດຣ. ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງ ການຕ່າງປະເທດ, ໄດ້ສົ່ງໂທລະເລກຊົມເຊີຍເຖິງ ພະນະທ່ານ ດາຕຸກ ເສຣິ ອຸຕາມາ ດຣ. ຣາຍ ຢາຕິມ, ລັດຖະມົນຕີວ່າການກະຊວງການຕ່າງປະເທດ ແຫ່ງມາເລເຊຍ ທີ່ກົວລາລຳເປີ. ໂທລະເລກຂຽນວ່າ: ເນື່ອງໃນໂອກາດທີ່ ພະນະທ່ານ ໄດ້ຖືກແຕ່ງຕັ້ງໃຫ້ດຳລົງຕຳແຫນ່ງເປັນ ລັດຖະມົນຕີວ່າການກະຊວງການຕ່າງປະເທດແຫ່ງ ມາເລເຊຍ, ຂ້າພະເຈົ້າ ມີຄວາມຍິນດີເປັນຢ່າງຍິ່ງສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ພະນະທ່ານ ຈົ່ງປະສົບແຕ່ຜົນສຳເລັດ ອັນສະຫງ່າງາມໃນພາລະກິດອັນມີກຽດ ແລະ ສູງສົ່ງຂອງ ພະນະທ່ານ. ຂ້າພະເຈົ້າຫວັງວ່າຈະໄດ້ຮ່ວມເຮັດວຽກກັບ ພະນະທ່ານ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດພວກເຮົາ ໃຫ້ເກີດດອກອອກຜົນຍິ່ງໆຂຶ້ນ ເພື່ອຜົນປະໂຫຍດຮ່ວມກັນຂອງປະຊາຊົນສອງຊາດ ລາວ ແລະ  ມາເລເຊຍ ກໍ່ຄືຄວາມເຂັ້ມ ແຂງຂອງຄອບຄົວອາຊຽນ.