ຄະນະນຳກະຊວງ /
ຄະນະກົມ /
ຊື່ບັນດາກົມຕ່າງໆ /
ສະເຫລີມສະຫລອງວັນຟຣັງໂກໂຟນີສາກົນ
ໃນຕອນບ່າຍວັນທີ
26 ມີນາ 2008 ຢູ່ທີ່ມະຫາວິທະຍາໄລແຫ່ງຊາດ ໄດ້ມີການສະເຫລີມສະຫລອງວັນຟຣັງໂກໂຟນີສາກົນ.
ໂດຍການເປັນປະທານຂອງ ທ່ານ ພົງສະຫວັດ ບຸບຜາ, ລັດຖະມົນຕີຊ່ວຍວ່າການກະຊວງການຕ່າງປະເທດ,
ຮັບຜິດຊອບວຽກງານ ຟຣັງໂກໂຟນີ, ໂດຍມີບັນດາລັດຖະມົນຕີວ່າການ,
ຊ່ວຍວ່າການ, ພະນັກງານອາວຸໂສ, ກະຊວງ, ກົມກອງ ອ້ອມຂ້າງສູນກາງ,
ບັນດາ ເອກອັກຄະລັດຖະທູດປະເທດທີ່ໃຊ້ພາສາຝຮັ່ງ
ປະຈຳລາວ ຕະຫລອດຮອດ ຄູ-ອາຈານ, ນັກຮຽນ-ນັກສຶກສາ
ສາຍພາສາຝຮັ່ງເຂົ້າຮ່ວມ 400 ກວ່າຄົນ.
ໃນໂອກາດນີ້,
ທ່ານ ພົງສະຫວັດ ບຸບຜາ ໄດ້ກ່າວຢ້ຳເຖິງຄວາມສຳຄັນຂອງວັນຝຣັງໂກໂຟນີ
ກໍຄືບົດບາດອົງການຟຣັງໂກໂຟນີ ຢູ່ໃນໂລກ ແລະ ທ່ານ
ຍັງໄດ້ຊີ້ໃຫ້ເຫັນເຖິງ ຜົນສຳເລັດຂອງກອງປະຊຸມບັນດາລັດຖະມົນຕີຟຣັງໂກໂຟນີ
ຄັ້ງທີ 23 ທີ່ ສປປ ລາວ ເປັນເຈົ້າພາບ. ໂດຍສະເພາະແມ່ນການຮັບຮອງເອົາຫົວຂໍ້
“ ພາສາຝຣັ່ງ ແມ່ນເຄື່ອງມືແຫ່ງຄວາມສາມັກຄີ ແລະ ການສົ່ງເສີມຄວາມ
ຫລາກຫລາຍ ທາງດ້ານວັດທະນະທຳ ແລະ ພາສາ” ທີ່ ສປປ
ລາວ ສະເໜີນັ້ນ ອັນເປັນການຊຸກຍູ້ໃຫ້ມີການສືບຕໍ່ໂຄງສົ່ງເສີມຄຸນຄ່າ
ການສິດສອນ ແລະການຮຽນພາສາຝຣັ່ງຢູ່ພາກພື້ນອາຊີຕາເວັນອອກສຽງໃຕ້
ແລະ ທັງເປັນແບບຢ່າງທີ່ດີແກ່ພາກພື້ນອື່ນອີກດ້ວຍ.
ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ
ຍັງໄດ້ຍົກໃຫ້ເຫັນ ເຖິງສະພາບການສິດສອນພາສາຝຣັ່ງ
ຢູ່ ສປປ ລາວ ຊຶ່ງມີທ່ວງທ່າຂະຫຍາຍຕົວ ແລະ ເຮັດແນວໃດໃຫ້ພ້ອມກັນເສີມຂະຫຍາຍ
ເພື່ອດຶງດູດໃຫ້ມີຄວາມສົນໃຈຮຽນພາສາຝຣັ່ງຫລາຍ ຂຶ້ນ.
ນອກຈາກນີ້, ຍັງມີການມອບລາງວັນໃຫ້ແກ່ບັນດານັກຮຽນ-ສຶກສາ
ຂອງໂຮງຮຽນຕ່າງໆ ທີ່ຊະນະເລີດໃນການແຂ່ງຂັນປະກວດ
ຮ້ອງເພງ, ສະແດງລະຄອນ, ອ່ານກາບກອນ ແລະ ຕອບຄຳຖາມພາສາຝຣັ່ງອີກດ້ວຍ.
ການສະເຫລີມສະຫລອງວັນຟຣັງໂກໂຟນີສາກົນ
ວັນທີ 20 ມີນາ ແມ່ນໄດ້ຈັດຂຶ້ນໃນທຸກໆປີ ດ້ວຍຫລາຍຮູບແບບ.
ສະເພາະປີນີ້, ກໍໄດ້ມີການຈັດສັບປະດາຟຣັງໂກໂຟນີ
ຊຶ່ງໄດ້ເລີ່ມແຕ່ວັນທີ 17-26 ມີນາ 2008 ແລະ ມີກິດຈະກຳຫລາຍຢ່າງ
ທີ່ໄດ້ຈັດຂຶ້ນຢູ່ນະຄອນຫລວງວຽງຈັນ, ຢູ່ແຂວງຫລວງພະບາງ,
ສະຫວັນນະເຂດ, ຈຳປາສັກ ເປັນຕົ້ນແມ່ນກິດຈະກຳດ້ານສິນລະປະ
ວັດທະນະທຳ, ກິລາ, ສຶກສາວິທະຍາສາດ, ເວທີຈັດຫາງານ
ແລະ ອື່ນໆອີກ.
ໃນຕອນຄ່ຳຂອງວັນດຽວກັນ,
ທ່ານ ຝຣັງຊົວ ເຊເນໂມ, ເອກອັກຄະລັດຖະທູດຝຣັ່ງ
ປະຈຳລາວ ໄດ້ຈັດງານລ້ຽງ ເພື່ອ ສະເຫລີມສະຫລອງວັນສຳຄັນດັ່ງກ່າວ
ຢູ່ທີ່ສະຖານທູດຝຣັ່ງ, ນະຄອນຫລວງວຽງຈັນ ໂດຍມີບັນດາທ່ານລັດຖະມົນຕີວ່າການ,
ຊ່ວຍວ່າການ, ຫົວໜ້າກົມ, ຮອງກົມ, ອົງການຈັດຕັ້ງສາກົນທີ່ໃຊ້ພາສາ
ຝຣັ່ງ ເຂົ້າຮ່ວມ.
