ຄະນະນຳກະຊວງ / ຄະນະກົມ / ຊື່ບັນດາກົມຕ່າງໆ /

ສະຫາຍ ດຣ. ທອງລຸນ ສີສຸລິດມອບຫລຽນໄຊອິດສະຫລະ
ຊັ້ນ I ໃຫ້ແກ່ກະຊວງສຶກສາ - ກໍ່ສ້າງຫວຽດນາມ

ວັນທີ 10 ມີນາ 2008, ທີ່ນະຄອນຫລວງຮ່າໂນ້ຍ, ສະຫາຍ ດຣ. ທອງລຸນ ສີສຸລິດ, ກຳມະການ ກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ສປປ ລາວ, ຕາງຫນ້າລັດຖະບານ ສປປ ລາວ ມອບຫລຽນໄຊອິດສະຫລະຊັ້ນ I ໃຫ້ແກ່ກະຊວງ ສຶກສາ - ກໍ່ສ້າງຫວຽດນາມ ເນື່ອງໃນໂອກາດສະເຫລີມສະຫລອງສອງວັນປະຫວັດສາດຂອງການ ພົວພັນລາວ - ຫວຽດນາມ ຄື: 30 ປີ ວັນເຊັນ ສົນທິສັນຍາການພົວພັນ ມິດຕະພາບ ແລະ ການຮ່ວມມື ແລະ 45 ປີ ວັນສ້າງຕັ້ງສາຍພົວພັນການທູດລາວ - ຫວຽດນາມ. ໃນພິທີ, ສະຫາຍ ດຣ. ທອງລຸນ ສີສຸລິດ ກ່າວຢືນຢັນວ່າ: ການມອບຫລຽນໄຊດັ່ງກ່າວເປັນການສະແດງເຖິງຄວາມຮູ້ ບຸນຄຸນຢ່າງເລິກເຊິ່ງ, ຄວາມຂອບໃຈຢ່າງຈິງໃຈຂອງພັກ, ລັດ ແລະ ປະຊາຊົນລາວຕໍ່ພັກ, ລັດ ແລະ ປະຊາຊົນຫວຽດນາມເວົ້າລວມ, ເວົ້າສະເພາະຕໍ່ພະນັກງານ, ຄູອາຈານໃນຂະແຫນງສຶກສາ ຫວຽດນາມທີ່ໄດ້ເສຍສະຫລະເຫື່ອແຮງ, ສະຕິປັນຍາຢ່າງຫມົດຈິດຫມົດໃຈ ເຂົ້າໃນວຽກງານຮັດແຫນ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ໂດຍສະເພາະໃນວຽກງານກໍ່ສ້າງຊັບພະຍາກອນມະນຸດໃຫ້ແກ່ ສປປ ລາວ. ສະຫາຍ ດຣ. ທອງລຸນ ສີສຸລິດ ກ່າວຕື່ມວ່າ: ໃນຕະຫລອດໄລຍະຫລາຍທົດສະວັດທີ່ຜ່ານມາ, ນັກ ສຶກສາລາວຈຳນວນຫລາຍຫມື່ນຄົນໄດ້ຮັບການສຶກສາຢູ່ທີ່ ສສ ຫວຽດນາມ, ປະຈຸບັນເຂົາເຈົ້າໄດ້ກາຍ ເປັນພະນັກງານຫລັກແຫລ່ງຂອງລັດ ແລະ ຈຳນວນບໍ່ຫນ້ອຍໄດ້ກາຍເປັນ ຜູ້ນຳຂັ້ນສູງຂອງລາວ. ສະຫາຍ ຫງວຽນຖຽນເຍິນ, ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາ - ກໍ່ສ້າງ ຫວຽດນາມ ໄດ້ກ່າວວ່າ: ຫວຽດນາມຖືເປັນກຽດອັນສູງສົ່ງໃນການຊ່ວຍເຫລືອພັດທະນາຊັບພະຍາ ກອນມະນຸດໃຫ້ແກ່ລາວພ້ອມທັງໃຫ້ຄຳຫມັ້ນສັນຍາວ່າການຮ່ວມມືໃນຂະແຫນງການສຶກສາຈະໄດ້ຮັບການສືບ ຕໍ່ໃນຊຸມປີຕໍ່ຫນ້າ.