ໃນວັນ​ທີ 13 ພະຈິກ 2015, ທີ່​ສູນ​ຮ່ວມ​ມື ​ແລະ ຝຶກ​ອົບຮົມ​ສາກົນ (ICTC), ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຈັດ​ງານ​ພົບ​ປະ​ສັງ​ສັນ “ງານ​ລ້ຽງ​ນ້ຳຊາ” ລະຫວ່າງ​ບັນດາ​ພັນ​ລະ​ຍາ​ການ​ນຳ​ຂອງ​ກະຊວງ​ການ​ຕ່າງປະ​ເທດ, ພັນ​ລະ​ຍາ​ນັກ​ການ​ທູດ​ລາວ, ບັນດາ​ທ່ານ​ພັນ​ລະ​ຍາ​ຂອງ​ທູດ​ຕາ​ນຸທູດຕ່າງປະ​ເທດ ປະຈຳ​ລາວ, ນັກ​ການ​ທູດຍິງ ​ແລະ ພັນ​ລະ​ຍາ​ຂອງຜູ້ຕາງໜ້າ​ອົງການ​ຈັດ​ຕັ້ງ​ສາກົນ ປະຈຳ​ຢູ່ ສປປ ລາວ ​ໂດຍການເປັນ​ປະທານຂອງ ທ່ານ ນາງ ນາລີ ສີ​ສຸ​ລິດ, ພັນ​ລະ​ຍາ​ທ່ານ​ຮອງ​ນາຍົກລັດຖະມົນຕີ, ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ​, ປະທານ​ກິດ​ຕິມະ​ສັກ ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນກາງ​ພັກ (ຄຕພ), ​ໃນ​ນັ້ນ, ມີຜູ້ຕາງຫນ້າຈາກ​ສູນ​ກາງ​ສະຫະພັນ​ແມ່ຍິງລາວ ແລະ ຕາງຫນ້າຈາກ ສະຫະພັນແມ່ຍິງແຕ່ລະກະຊວງ ກໍ​ໄດ້​ໃຫ້​ກຽດ​ເຂົ້າ​ຮ່ວມ; ​ມີ​​ແຂກເຂົ້າ​ຮ່ວມ​ຫຼາຍ​ກວ່າ 350 ທ່ານ.

​ຈຸດປະສົງຂອງ​ການຈັດ​ງານ​ຄັ້ງ​ນີ້, ນອກຈາກ​ຈະ​ເປັນກິດຈະກຳ​ປະຈຳ​ປີ​ຂອງ ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ​ແລະ ຄຕພ ​ແລ້ວ ຍັງ​ເປັນ​ການ​ສ້າງ​ຂະ​ບວນການ​ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 40 ປີ, ສົ່ງ​ທ້າຍ​ປີ​ເກົ່າ​ຕ້ອນຮັບ​ປີ​ໃໝ່​ສາກົນ 2016 ​ແລະ ຊົ​ມ​ເຊີຍ​ຜົນສຳ​ເລັດ​ຂອງ​ວັນ​ການ​ທູດ​ລາວ ຄົບຮອບ 70 ປີ (12 ຕຸລາ), ທັງ​ເປັນ​ໂອກາດ​ທີ່​ເຮັດ​ໃຫ້​ຜູ້​ເຂົ້າ​ຮ່ວມ​ໄດ້​ພົບ​ປະ​ສັງ​ສັນ, ສ້າງ​ຄວາມມ່ວນ​ຊື່ນ, ສ້າງ​ຄວາມ​ຮູ້ຈັກ​ຮັກ​ແພງ ​ແລະ ​ແລກປ່ຽນ​ວັດທະນະທຳ ​ຊຶ່ງ​ກັນ ​ແລະ ກັນ. ພິ​ເສດ, ພາຍ​ໃນ​ງານ ນອກຈາກຈະມີການວາງສະແດງສິນຄ້າ ແລະ ອາຫານ ແລະ ການສະແດງສິນລະປະ​ແລ້ວ ຍັງມີ​ການ​ສາທິດ​ເຮັດ​ເຂົ້າໜົມລາວ ​ແລະ ​ເຂົ້າໜົມຕ່າງປະ​ເທດ ອັນໄດ້ສ້າງຄວາມເພີດເພີນ ແລະ ຄວາມປະທັບໃຈ ໃຫ້ແກ່ຜູ້ເຂົ້າຮ່ວມ.

​ໃນ​ໂອກາດ​ອັນ​ສຳຄັນ​ຄັ້ງ​ນີ້ ທ່ານ​ ນາງ ນາລີ ສີ​ສຸ​ລິດ ​ໄດ້​ໃຫ້​ກຽດ​ມີ​ຄຳ​ເຫັນ​ວ່າ: “ງານ​ພົບ​ປະ​ຄັ້ງ​ນີ້​ໄດ້​ຈັດ​ຂຶ້ນ​ໃນ​ຊ່ວງ​ໄລຍະ​ທີ່​ປະຊາຊົນ​ລາວ​ບັນດາ​ເຜົ່າ ກໍາລັງອອກແຮງແຂ່ງຂັ້ນສ້າງຂະບວນການຂໍ່ານັບຮັບຕ້ອນ ວັນສະຖາປະນາ ສປປ ລາວ ຄົບຮອບ 40 ປີ. ຕະຫຼອດ​ໄລຍະ 40 ປີ​ ທີ່​ຜ່ານ​ມາ​ປະຊາຊົນ​ລາວ​ ກໍ​ຄື​ແມ່ຍິງ​ລາວ ທີ່​ມີ​ຈຳນວນ​ຫຼາຍ​ກວ່າ​ເຄິງ​ໜຶ່ງ​ຂອງ​ພົນລະ​ເມືອງ​ລາວ ​ໄດ້​ຕັ້ງໜ້າ​ປະກອບສ່ວນ​ເຂົ້າ​ໃນ​ການປະຕິບັດ​ສອງ​ໜ້າ​ທີ່​ຍຸດ​ທະ​ສາດຄື​ ປົກ​ປັກ​ຮັກສາ ​ແລະ ​ພັດທະນາ​ປະ​ເທດ​ຊາດ, ທັງ​ປະຕິບັດ​ເປົ້າ​ໝາຍ​ສະຫະ​ສະ​ວັດ​ການ​ພັດທະນາຂອງ ສະຫະ​ປະຊາ​ຊາດ​ ທີ່​ໄດ້​ມີ​ຜົນສຳ​ເລັດ​ຫຼາຍ​ດ້ານ​ທີ່​ໃຫ່ຍຫຼວງ​ກວ່າ​ເກົ່າ ອັນ​ໄດ້​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ລາວ ລວມທັງແມ່ຍິງ ແລະ ເດັກນ້ອຍ ນັບມື້ນັບດີຂຶ້ນເປັນກ້າວໆມາ, ປະເທດຊາດ​ໄດ້​ຮັບການພັດທະນາ ຈະເລີນຮຸ່ງ ເຮືອງຢ່າງບໍ່ຢຸດຢັ້ງ. ຜົນສຳເລັດດັ່ງກ່າວທີ່ຍາດມາໄດ້ນັ້ນ ສ່ວນໜຶ່ງກໍແມ່ນມາຈາກການປະກອບສ່ວນຊ່ວຍເຫຼືອຮ່ວມມື ​ແລະ ສະໜັບ​ສະ​ໜູນ ຂອງວົງຄະນະຍາດສາກົນ ໂດຍສະເພາະ ແມ່ນການຊ່ວຍເຫຼືອຮ່ວມມືຈາກບັນດານັກການທູດ ທີ່ມີສຳນັກງານຕັ້ງຢູ່ ສປປ ລາວ ​ເຊິ່ງເຮັດໃຫ້ ສປປ ລາວ ມີ ບົດບາດສູງຂຶ້ນໃນເວທີສາກົນ ແລະ ໄດ້ຮັບຄວາມໄວ້ວາງ ໃຈຈາກສາກົນໃຫ້ເປັນເຈົ້າພາບ ຈັດກອງປະຊຸມລະດັບພາກພື້ນ ແລະ ສາກົນລະດັບຕ່າງໆຫຼາຍຄັ້ງໃນຊຸມປີຜ່ານມາ. ​ໃນ​ໂອກາດ​ນີ້ ​ແຂກ​ເຂົ້າ​ຮ່ວມ​ກໍ​ໄດ້​ອວຍພອນ​ສົ່ງ​ທ້າຍ​ປີ​ເກົ່າ ​ແລະ ຕ້ອນຮັບ​ປີ​ໃໝ່​ຊຶ່ງ​ກັນ ​ແລະ ກັນ​ດ້ວຍ​ຄວາມ​ເບີກບານ​ມ່ວນ​ຊື່ນ.