ໃນລະຫວ່າງວັນທີ 30 ພຶດສະພາ ຫາ 1 ມິຖຸນາ 2016, ທີ່ ນະຄອນຫຼວງ ກົວລາລຳເປີ, ປະເທດ ມາເລເຊຍ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມໂຕະມົນ ອາຊີ-ປາຊີຟິກ ຄັ້ງທີ 30 (APR@ 30) ໃນຖານະເປັນແຂກພິເສດ ແລະ ໄດ້ມີຄໍາເຫັນຕໍ່ ວາລະທີສອງ ຂອງກອງປະຊຸມດັ່ງກ່າວ (ປະຊາຄົມອາຊຽນ: ການເຊື່ອມໂຍງໃນຍຸກແຫ່ງການຕໍ່ສູ້ຍາດແຍ່ງດ້ານຜົນປະໂຫຍດ), ເຊິ່ງໄດ້ຮັບການຕີລາຄາສູງຈາກຜູ້ເຂົ້າຮ່ວມກອງປະຊຸມ. ກອງປະຊຸມຄັ້ງນີ້ ໄດ້ດຳເນີນໄປພາຍໃຕ້ຫົວຂໍ້ໃຫຍ່ “ ການຮ່ວມມື ແລະ ການແຂ່ງຂັນທ່າມກາງສະພາບການປ່ຽນແປງຂອງພາກພື້ນ ( Cooperation and Contestation in a Changing Regional Landscape ), ເຊິ່ງມີ 4 ຫົວຂໍ້ຫຍ່ອຍຄື: 1. ຄວາມໝັ້ນຄົງໃນພາກພື້ນອາຊີ-ປາຊີຟິກ: ສະພາບການໃນປັດຈຸບັນ ແລະ ທິດທາງໃນອານາຄົດ; 2. ປະຊາຄົມອາຊຽນ: ການເຊື່ອມໂຍງໃນຍຸກແຫ່ງການຕໍ່ສູ້ຍາດແຍ່ງດ້ານຜົນປະໂຫຍດ; 3. ຍຸດທະສາດດ້ານຈິດໃຈ ເພື່ອຕໍ່ສູ້ກັບຄວາມມືດບອດ, ການໃຊ້ກຳລັງ ແລະ ຄວາມຮຸນແຮງ; ແລະ 4. ລາຄານໍ້າມັນ, ການປ່ຽນແປງສະພາບດິນຟ້າອາກາດ ແລະ ພູມສາດການເມືອງໂລກທີ່ຈະເກີດຂຶ້ນໃນອານາຄົດ.
ກອງປະຊຸມໂຕະມົນ ອາຊີ-ປາຊີຟິກ ໄດ້ຖືກຈັດຂຶ້ນມາແຕ່ປີ 1987 ເປັນຕົ້ນມາ ແລະ ຈັດຂຶ້ນປີລະຄັ້ງ ໂດຍມີຈຸດປະສົງເພື່ອສ້າງຄວາມໄວ້ເນື້ອເຊື່ອໃຈ ແລະ ຫຼຸດຜ່ອນຂໍ້ຂັດແຍ່ງ ໃນພາກພື້ນ ອາຊີ-ປາຊີຟິກ, ຖືກຮັບຮູ້ເປັນເວທີປຶກສາຫາລືທີ່ສຳຄັນນຳໜ້າໃນຂອບການທູດຊ່ອງທາງທີ 2 (Track II ) ແລະ ເປັນໜຶ່ງໃນ 20 ກອງປະຊຸມຄວາມໜັ້ນຄົງຂອງໂລກ ທີ່ດຶງດູດເອົາບັນດານັກຄັງປັນຍາ, ນັກວິຊາການ, ເຈົ້າໜ້າທີ່ອາວຸໂສຈາກພາກລັດໃນແຕ່ລະຂົງເຂດ ແລະ ຜູ້ຕາງໜ້າສື່ມວນຊົນໃນພາກພື້ນ ອາຊີ-ປາຊີຟິກ ແລະ ພາກພື້ນອື່ນ ເຂົ້າຮ່ວມແຕ່ລະປີ 200-300 ຄົນ ເພື່ອແລກປ່ຽນຄວາມຄິດເຫັນຢ່າງກົງໄປກົງມາ ກ່ຽວກັບບັນຫາ ແລະ ສິ່ງທ້າທ້າຍຕ່າງໆ ໂດຍສະເພາະແມ່ນເນັ້ນໜັກໃສ່ບັນຫາຄວາມໝັ້ນຄົງຂອງພາກພື້ນ.