ໃນວັນທີ 01-02 ມິຖຸນາ 2016 ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນ ເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກວ່າດ້ວຍ ອາຊຽນ ຄັ້ງທີ 25 (25th World Economic Forum on ASEAN) ທີ່ ກົວລາລຳເປີ, ປະເທດ ມາເລເຊຍ ໂດຍການເປັນປະທານຮ່ວມ ຂອງ ພະນະທ່ານ ນາຈິບ ຣາຊັກ, ນາຍົກລັດຖະມົນຕີ ແຫ່ງ ມາເລເຊຍ ແລະ ອົງການເວທີປຶກສາຫາລືເສດຖະກິດໂລກ (WEF). ກອງປະຊຸມໃນຄັ້ງນີ້ ໄດ້ມີບັນດາຜູ້ນຳອາຊຽນ ແລະ ຂອງຫຼາຍປະເທດ, ຕົວແທນຈາກພາກລັດຖະບານ ແລະ ພາກທຸລະກິດໃນພາກພື້ນ ແລະ ໃນໂລກ ເຂົ້າຮ່ວມຫຼາຍກວ່າ 600 ທ່ານ ຈາກ 50 ປະເທດໃນໂລກ.
ກອງປະຊຸມດັ່ງກ່າວ ຈັດຂື້ນເພື່ອເປັນເວທີປຶກສາຫາລື ແລະ ແລກປ່ຽນທັດສະນະຄວາມຄິດເຫັນເຊີ່ງກັນ ແລະ ກັນ ຂອງບັນດາຜູ້ເຂົ້າຮ່ວມ ແນໃສ່ຊອກຫາຊ່ອງທາງ ເພື່ອແກ້ໃຂບັນຫາຕ່າງໆ ລວມເຖິງສິ່ງທ້າທາຍທີ່ເກີດຂື້ນຢູ່ໃນໂລກ ແລະ ພາກພື້ນ. ສະເພາະກອງປະຊຸມໃນຄັ້ງນີ້ ໄດ້ເນັ້ນໃສ່ 03 ບັນຫາຫຼັກ ຄື: ການຂັບເຄື່ອນການເຕີບໂຕ ແບບຍືນຍົງ ແລະ ການມີສ່ວນຮ່ວມຂອງສັງຄົມ; ການປະຕິວັດອຸດສາຫະກຳ ຄັ້ງທີ 4 ແລະ ການຮັດແໜ້ນສາຍພົວພັນການຮ່ວມມືໃນພາກພື້ນ ພາຍຫຼັງການສ້າງຕັ້ງ ປະຊາຄົມເສດຖະກິດອາຊຽນ.
ທ່ານ ສະເຫຼີມໄຊ ກົມມະສິດ ໄດ້ເຂົ້າຮ່ວມຫຼາຍພາກຍ່ອຍຂອງກອງປະຊຸມ ແລະ ປະກອບຄຳເຫັນຢູ່ກອງປະຊຸມເວທີປຶກສາຫາລືເສດຖະກິດໂລກ (WEF) ແມ່ນກອງປະຊຸມປະຈຳປີ ທີ່ໄດ້ມີການຜັດປ່ຽນຈັດຂຶ້ນໃນພາກພື້ນມາແລ້ວ 24 ຄັ້ງ, ຊື່ງໃນແຕ່ລະຄັ້ງແມ່ນຈະມີຫົວຂໍ້ທີ່ແຕກຕ່າງກັນ ໂດຍອີງຕາມສະພາບຕົວຈິງທີ່ເກີດຂື້ນໃນພາກພື້ນ ແລະ ໃນໂລກ ໃນແຕ່ລະໄລຍະ, ຊຶ່ງມີຜູ້ນຳພາກລັດ ແລະ ພາກທຸລະກິດຈາກທົ່ວໂລກ ເຂົ້າຮ່ວມຢ່າງຫຼວງຫຼາຍ ເພື່ອຊຸກຍູ້ການເຕີບໂຕທາງດ້ານເສດຖະກິດ ແລະ ການພັດທະນາທີ່ຍືນຍົງ ໃນທົ່ວໂລກ ກໍ່ຄືໃນພາກພື້ນ.