ວັນ​ທີ 6 ມິຖຸນາ 2016, ທີ່ ຫ້ອງ​ວ່າການ​ສໍານັກງານ​ນາຍົກລັດຖະມົນຕີ, ທ່ານ ທອງ​ລຸນ ສີ​ສຸ​ລິດ, ນາຍົກລັດຖະມົນຕີ ​ແຫ່ງ ສປປ ລາວ ​ໄດ້​ໃຫ້​ກຽດຕ້ອນຮັບ​ການ​ເຂົ້າ​ຢ້ຽມ​ຂໍ່ານັບ​ຂອງ​ ທ່ານ ​ຄຽງ​ເຊັງ, ຮອງ​ປະທານ​ສໍານັກງານ​ຕ້ານ​ການ​ສໍ້​ລາດ​ບັງ​ຫລວງ​ ແຫ່ງ ຣາຊະ​ອານາຈັກ​ກໍາປູ​ເຈຍ ພ້ອມ​ດ້ວຍ​ຄະນະ​ ​ໃນ​ໂອກາດ​ທີ່​ເດີນທາງ​ມາ​ຢ້ຽມຢາມ ​ແລະ ​ພົບ​ປະ​ແລກປ່ຽນ​ບົດຮຽນ ​ກັບ​ອົງການ​ກວດກາ​ລັດ​ຖະບານ-ອົງການ​ຕ້ານ​ການ​ສໍ້​ລາດ​ບັງ​ຫລວງ​ແຫ່ງ ສປປ ລາວ​ ແຕ່​ວັນ​ທີ  ​5-7 ມິຖຸນາ ນີ້.

ໃນ​ໂອກາດ​ດັ່ງກ່າວ, ທ່ານ ທອງ​ລຸນ ສີສຸ​ລິດ ​ໄດ້​ສະ​ແດງ​ຄວາມ​ຍິນ​ຕີ​ຕ້ອນຮັບ ​ແລະ ຊົມ​ເຊີຍ ພ້ອມ​ທັງ​ຕີ​ລາຄາ​ສູງ​ຕໍ່ ທ່ານ ​ຄຽງ​ເຊັງ ​ພ້ອມຄະນະ ທີ່​ໄດ້​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ​ຢູ່ ສປປ ລາວ ​ໃນ​ຄັ້ງ​ນີ້ ​ເຊິ່ງຖືວ່າ​ມີ​ຄວາມ​ໝາຍ​ຄວາມ​ສໍາຄັນ​ເປັນ​ຢ່າງ​ຍິ່ງ​​ ເພື່ອ​ສືບ​ຕໍ່​ເພີ່ມ​ທະວີ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ ລະຫວ່າງ​ສອງ​ປະ​ເທດ, ​ປະຊາຊົນ​ສອງ​ຊາດ ລາວ-ກໍາປູ​ເຈຍ ​ເວົ້າ​ລວມ,​ ເວົ້າ​ສະ​ເ​ພາະການ​ຮ່ວມ​ມື​ ລະຫວ່າງ​ອົງການ​ກວດກາ​ລັດຖະບານ-ອົງການ​ຕ້ານ​ການ​ສໍ້​ລາດ​ບັງ​ຫລວງ​ແຫ່ງ ສປປ ລາວ ກັບ ສໍານັກງານ​ຕ້ານ​ການ​ສໍ້​ລາດ​ບັງ​ຫລວງ ​ແຫ່ງ ຣາຊະ​ອານາຈັກ ​ກໍາປູ​ເຈຍ ​ໃຫ້​ມີ​ຄວາມ​ແໜ້ນ​ແຟ້ນຍິ່ງ​ໆຂຶ້ນ.

ຈາກ​ນັ້ນ, ທ່ານ ​ຄຽງ​ເຊັງ ​ ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ ​ຕໍ່ນາຍົກ​ລັດຖະມົນຕີ ທີ່​ໄດ້​ເສຍສະຫລະ​ເວລາ​ອັນ​ມີຄ່າ​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ​ໃນ​ຄັ້ງ​ນີ້ ພ້ອມ​ທັງ​ໄດ້​ແຈ້ງ​ຈຸດປະສົງ​ຂອງ​ການ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ​ຢູ່ ສປປ ລາວ ​ໃນ​ຄັ້ງ​ນີ້​ ໃຫ້​ທ່ານ ນາຍົກ​ລັດຖະມົນຕີໄດ້​ຮັບ​ຊາບ.