ວັນ​ທີ 7 ມິຖຸນາ 2016, ທີ່ ຫ້ອງ​ວ່າການສຳນັກງານນາຍົກລັດຖະມົນຕີ, ທ່ານ ທອງ​ລຸນ ສີ​ສຸ​ລິດ, ນາຍົກລັດຖະມົນຕີ ​ແຫ່ງ ສາ​ທາ​ລະນະ​ລັດ ປະຊາທິປະ​ໄຕ ປະຊາຊົນ​ລາວ ​ໄດ້​ໃຫ້ກຽດຕ້ອນຮັບການ​ເຂົ້າ​ຢ້ຽມຂ່ຳນັບຂອງ ທ່ານ ປີ​ເຕີ ຊີ​ຈາ​ໂຕ, ລັດຖະມົນຕີ​ ກະຊວງ​ການ​ຕ່າງປະ​ເທດ ​ແລະ ການ​ຄ້າ ແຫ່ງ ຮົງ​ກາຣີ ພ້ອມ​ດ້ວຍ​ຄະນະ ​ທີ່ໄດ້​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ ທີ່ ສປປ ລາວ ​​ໃນ​ລະຫວ່າງ​ ວັນ​ທີ 6-7 ມິຖຸນາ​ນີ້.

​ໃນ​ໂອກາດ​ດັ່ງກ່າວ, ທ່ານນາຍົກ​ລັດຖະມົນຕີ ທອງ​ລຸນ ​ສີ​ສຸ​ລິດ ໄດ້ສະແດງຄວາມຍິນ​ດີຕ້ອນຮັບ​ອັນ​ອົບ​ອຸ່ນ ແລະ ຕີລາຄາ​ສູງຕໍ່ການ​ເດີນທາງມາ​ຢ້ຽມຢາມ ​ແລະ ​ເຮັດ​ວຽກ​ຢູ່ ສປປ ລາວ ຂອງ ທ່ານ ປີ​ເຕີ ຊີ​ຈາ​ໂຕ ພ້ອມ​ດ້ວຍ​ຄະນະ ​ໃນ​ຄັ້ງ​ນີ້, ​ເຊິ່ງ​ເປັນ​ການປະກອບສ່ວນ​ສຳ​ຄັນ​ເຂົ້າໃນ​ການຮັດ​ແໜ້ນ ສາຍ​ພົວພັນ ​ມິດຕະພາບ ທີ່​ມີ​ມູນ​ເຊື້ອ ​ແລະ ການ​ຮ່ວມມື ທີ​ມີ​ມາ​ແຕ່​ຍາວ​ນານ ລະຫວ່າງ​ສອງ​ປະ​ເທດ​ ລາວ-​ຮົງ​ກາຣີ ໃຫ້​​ແຕກ​ດອກ​ອອກ​ຜົນ​ງອກ​ງາມ​ຍິ່ງໆຂຶ້ນ.

​ໃນ​ໂອກາດ​​ນີ້, ທ່ານ ປີ​ເຕີ ຊີ​ຈາ​ໂຕ, ລັດຖະມົນຕີ​ ກະຊວງ​ການ​ຕ່າງປະ​ເທດ ​ແລະ ການ​ຄ້າ ແຫ່ງ ຮົງ​ກາຣີ ຍັງ​ໄດ້​ເຂົ້າ​ຢ້ຽມຂ່ຳນັບ ທ່ານ ນາງ ປານີ ຢາ​ທໍ່​ຕູ້,ປະທານ​ສະພາ​ແຫ່ງ​ຊາດ ​ແຫ່ງ ​ສາ​ທາ​ລະນະ​ລັດ ປະຊາທິປະ​ໄຕ ປະຊາຊົນ​ລາວ ຕື່ມອີກ.