ໃນຕອນບ່າຍຂອງວັນທີ 9 ມິຖຸນາ 2016, ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມຄະນະຜູ້ແທນຂັ້ນສູງກະຊວງການຕ່າງປະເທດ ໄດ້ເຂົ້າຢ້ຽມຂໍ່ານັບ ສະຫາຍ ເຈິ້ນ ດ້າຍ ກວາງ, ປະທານປະເທດ ແຫ່ງ ສສ.ຫວຽດນາມ, ທີ່ ທຳນຽບປະທານປະເທດ, ນະຄອນຫລວງຮ່າໂນ້ຍ, ສສ.ຫວຽດນາມ. ໃນໂອກາດດັ່ງກ່າວ, ສະຫາຍ ເຈິ້ນ ດ້າຍ ກວາງ, ປະທານປະເທດ ແຫ່ງ ສສ.ຫວຽດນາມ ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ ສະຫາຍ ສະເຫຼີມໄຊ ກົມມະສິດ, ທີ່ໄດ້ຮັບການເລືອກຕັ້ງໃຫ້ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ເຊິ່ງສະແດງໃຫ້ເຫັນເຖິງຄວາມເຊື້ອໜັ້ນ ຂອງການນໍາພັກ-ລັດ, ກໍຄືປະຊາຊົນລາວບັນດາເຜົ່າ. ສະຫາຍສະເຫຼີມໄຊ ກົມມະສິດ ກໍໄດ້ສະແດງຄວາມປິຕິຊົມຍິນດີເປັນຢ່າງຍິ່ງ ແລະ ຮູ້ສຶກເປັນກຽດອັນສູງທີ່ໄດ້ນຳພາຄະນະຜູ້ແທນຂັ້ນສູງ ກະຊວງການຕ່າງປະເທດ ແຫ່ງ ສປປ ລາວ ເດີນທາງມາຢ້ຽມຢາມ ສສ.ຫວຽດນາມ ຢ່າງເປັນທາງການ ເປັນປະເທດທຳອິດພາຍຫລັງໄດ້ຮັບຕຳແໜ່ງເມື່ອບໍ່ດົນມານີ້.
ສະຫາຍ ສະເຫຼີມໄຊ ກົມມະສິດ ໄດ້ແຈ້ງໃຫ້ການນຳຂັ້ນສູງຂອງ ສສ. ຫວຽດນາມ ຊາບວ່າ ການພົບປະສອງຝ່າຍ ລະຫວ່າງສອງກະຊວງການຕ່າງປະເທດ ລາວ ແລະ ຫວຽດນາມ ແມ່ນມີຜົນສຳເລັດດີ, ຊຶ່ງທັງສອງຝ່າຍຢັ້ງຢືນເຖິງຄວາມຕັ້ງໃຈ ທີ່ຈະສືບຕໍ່ເສີມຂະຫຍາຍການພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງປະເທດ, ສຳຄັນແມ່ນພ້ອມກັນສືບຕໍ່ຈັດຕັ້ງປະຕິບັດບັນດາຂໍ້ຕົກລົງ ແລະ ໂຄງການຮ່ວມມືນຳກັນ ໃຫ້ມີປະສິດທິພາບ ແລະ ປະສິດທິຜົນຂຶ້ນເລື້ອຍໆ. ການຢ້ຽມຢາມຂອງລັດຖະມົນຕີຕ່າງປະເທດລາວຄັ້ງນີ້ ເປັນການປະກອບສ່ວນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມູນເຊື້ອອັນດີງາມນັ້ນ ໃຫ້ນັບມື້ນັບມີຄວາມແໜ້ນແຟ້ນ, ຈະເລີນງອກງາມ ແລະ ແຕກດອກອອກຜົນຍີ່ງໆຂຶ້ນ.
ໃນວັນດຽວກັນ, ທີ່ ສຳນັກງານນາຍົກລັດຖະມົນຕີ ແຫ່ງ ສສ.ຫວຽດນາມ, ສະຫາຍລັດຖະມົນຕີຕ່າງປະເທດ ກໍໄດ້ເຂົ້າຢ້ຽມຂໍ່ານັບ ສະຫາຍ ຫງຽວນ ຊວນ ຟຸກ, ນາຍົກລັດຖະມົນຕີ ແຫ່ງ ສສ.ຫວຽດນາມ ອີກດ້ວຍ.