ໃນ​ວັນ​ທີ 14 ມິຖຸນາ 2016, ​ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ ອາຊຽນ-ຈີນ ສະໄໝພິເສດ ຊຶ່ງເປັນຂໍ້ລິເລີ່ມຂອງອາຊຽນ, ຈັດຂຶ້ນທີ່ ຄຸນໝິງ, ແຂວງ ຢຸນນານ, ສປ ຈີນ.

ກອງປະຊຸມສະໄໝພິເສດຄັ້ງນີ້ ໄດ້ປຶກສາຫາລືຫຼາຍບັນຫາທີ່ສໍາຄັນຄື: ໄດ້ທົບທວນຄືນການຮ່ວມມື ອາຊຽນ-ຈີນ ໃນໄລຍະຜ່ານມາ ໂດຍໄດ້ສະແດງຄວາມຍິນດີທີ່ເຫັນວ່າ ການຮ່ວມມືໄດ້ສືບຕໍ່ຂະຫຍາຍຕົວໃນທຸກຂົງເຂດ ໂດຍສະເພາະດ້ານການຄ້າ, ການລົງທຶນ ແລະ ການທ່ອງທ່ຽວ, ແລະ ເຫັນວ່າສອງຝ່າຍຄວນນຳໃຊ້ໂອກາດຄົບຮອບ 25 ປີ ແຫ່ງການພົວພັນອາຊຽນ-ຈີນ ໃນປີນີ້ ເພື່ອເສີມຂະຫຍາຍການ​ຮ່ວມ​ມື​ໃຫ້​ນັບ​ມື້ນັບ​ສູງ​ຂຶ້ນ ​​​ໂດຍ​ສະ​ເພາະ​ແມ່ນ​ດ້ານ​ເສດຖະກິດ ແນ​ໃສ່​ບັນລຸ​ເປົ້າໝາຍມູນ​ຄ່າ​ການ​ຄ້າໃຫ້​ໄດ້ 1,000 ຕື້​    ໂດ​ລາ​ ສະຫະລັດ ​ແລະ ມູນ​ຄ່າ​ການ​ລົງທຶນໃຫ້ໄດ້ 150 ຕື້​ ໂດ​ລາ​ ສະຫະລັດ ພາຍ​ໃນ​ປີ 2020. ກອງປະຊຸມ ກໍໄດ້ປຶກສາຫາລື ກ່ຽວກັບການຈັດຕັ້ງປະຕິບັດຖະແຫຼງການແຫ່ງການປະພຶດ ຂອງບັນດາຝ່າຍໃນທະເລຈີນໃຕ້ (ດີໂອຊີ) ລວມທັງການປຶກສາຫາລື ກ່ຽວກັບກົດແຫ່ງການປະພຶດ (ຊີໂອຊີ) ຊຶ່ງເຫັນວ່າມີຄວາມຄືບໜ້າດີ ແລະ ໄດ້ຢ້ຳເຖິງຄວາມສຳຄັນຂອງການຈັດຕັ້ງປະຕິບັດຖະແຫຼງການດັ່ງກ່າວຢ່າງຄົບຖ້ວນ ແລະ ມີປະສິດທິຜົນ.

ນອກນັ້ນ, ກອງປະຊຸມຍັງໄດ້ປຶກສາຫາລື ເພື່ອວາງທິດທາງການຮ່ວມມືໃນຕໍ່ໜ້າ ໂດຍສະເພາະການເພີ້ມທະວີການຮ່ວມມືດ້ານການເຊື່ອມຈອດ, ການພັດທະນາພື້ນຖານໂຄງລ່າງ, ການໄປມາຫາສູ່ກັນຂອງປະ ຊາຊົນຂອງສອງພາກພື້ນ ແລະ ອື່ນໆ. ພິເສດ ອາຊຽນ ແລະ ສປ ຈີນ ໄດ້ເຫັນດີກໍານົດເອົາປີ 2016 ເປັນປີແລກປ່ຽນດ້ານການສຶກສາ ແລະ ຈະໄດ້ຈັດສັບປະດາການສຶກສາ ອາຊຽນ-ຈີນ ໃນເດືອນກໍລະກົດ 2016 ທີ່ ກຸຍຢາງ, ສປ ຈີນ. ພ້ອມກັນນີ້, ກອງປະຊຸມຍັງໄດ້ເຫັນດີເອົາປີ 2017 ເປັນປີຮ່ວມມືດ້ານການທ່ອງທ່ຽວ ອາຊຽນ-ຈີນ.

ໃນໂອກາດນີ້, ກອງປະຊຸມຍັງໄດ້ປຶກສາຫາລືການກະກຽມໃຫ້ແກ່ກອງປະຊຸມລັດຖະມົນຕີການຕ່າງປະ ເທດ ອາຊຽນ-ຈີນ ຊຶ່ງຈະຈັດຂຶ້ນໃນວັນທີ 25 ກໍລະກົດ 2016 ທີ່ ນະຄອນຫຼວງວຽງຈັນ ແລະ ກອງປະຊຸມສຸດຍອດສະເຫຼີມສະຫຼອງການຮ່ວມມື ອາຊຽນ-ຈີນ ຄົບຮອບ 25 ປີ ຊຶ່ງຈະຈັດຂຶ້ນໃນວັນທີ 7 ກັນຍາ 2016 ທີ່ ນະຄອນຫຼວງວຽງຈັນ ໂດຍສະເພາະບັນດາເອກະສານຜົນຂອງກອງປະຊຸມທີ່ຈະນໍາສະເໜີໃຫ້ຜູ້ນໍາອາຊຽນ ແລະ ສປ ຈີນ ພິຈາລະນາຮັບຮອງເອົາ ລວມທັງການຮ່ວມກັນຈັດບັນດາກິດຈະກໍາສະເຫຼີມສະຫຼອງຊຶ່ງຈະຈັດຂຶ້ນຢູ່ບັນດາປະເທດສະມາຊິກອາຊຽນ ແລະ ຈັດຢູ່ ສປ ຈີນ ໃນປີນີ້. ກອງປະຊຸມຍັງໄດ້ແລກປ່ຽນທັດສະນະຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ສະຫຼຸບ​ແລ້ວ, ບັນດາ​ລັດຖະມົນຕີ​ຕ່າງປະ​ເທດ​ອາຊຽນ-ຈີນ ​ໄດ້​ຕີ​ລາຄາ​ວ່າ ການ​ຮ່ວມ​ມື ອາຊຽນ-ຈີນ ເປັນ​ການ​ຮ່ວມ​ມື​ທີ່ມີໝາກຜົນ ​ແລະ ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດຮ່ວມ​ກັນ ​ແລະ ມີ​ທ່ວງທ່າ​ກ້າວ​ຂຶ້ນ​ໄປ​ເລື້ອຍໆ.

ໃນໂອກາດເຂົ້າຮ່ວມກອງປະຊຸມດັ່ງກ່າວ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຍັງໄດ້ພົບປະສອງຝ່າຍກັບ ທ່ານ ຫວາງ ອີ້, ລັດຖະມົນຕີການຕ່າງ ປະເທດ ແຫ່ງ ສປ ຈີນ ເພື່ອປຶກສາຫາລືກ່ຽວກັບການຮ່ວມມື ລາວ-ຈີນ ເຊິ່ງສອງຝ່າຍໄດ້ຕີລາຄາສູງຕໍ່ໝາກຜົນການພົວພັນຮ່ວມມືທີ່ເປັນມູນເຊື້ອໃນໄລຍະຜ່ານມາ ແລະ ຈະສືບຕໍ່ເສີມຂະຫຍາຍເພື່ອຜົນປະໂຫຍດຂອງທັງສອງ ປະເທດ. ສອງຝ່າຍ ຍັງໄດ້ປຶກສາຫາລືກ່ຽວກັບການຮ່ວມມື ອາຊຽນ-ຈີນ ໂດຍສະເພາະການກະກຽມໃຫ້ແກ່ກອງປະຊຸມລັດຖະມົນຕີການຕ່າງປະເທດ ອາຊຽນ-ຈີນ ໃນເດືອນກໍລະກົດ ແລະ ກອງປະຊຸມສຸດຍອດສະ ເຫຼີມສະຫຼອງການຮ່ວມມື ອາຊຽນ-ຈີນ ຄົບຮອບ 25 ປີ ໃນເດືອນກັນຍາ 2016 ທີ່ ສປປ ລາວ.