ໃນວັນທີ 15 ມິຖຸນາ 2016, ທີ່ ກະຊວງການຕ່າງປະເທດ, ທ່ານ ​ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ​ໄດ້​ໃຫ້​ກຽດ​ຕ້ອນຮັບ​ການເຂົ້າຢ້ຽມ​ຄຳນັບ​ຂອງ ​ທ່ານ ເບັນ ຄິງ ( Ben King ), ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອຳນາດ​ເຕັມ​ ແຫ່ງ ນິວຊີແລນ ປະຈຳ ສປປ ​ລາວ, ເນື່ອງ​ໃນ​ໂອກາດທີ່ ທ່ານ ສະເຫຼີມໄຊ ກົມມະສິດ ໄດ້​ຮັບ​ການ​ແຕ່ງຕັ້ງ​ໃຫ້ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ຜູ້ໃໝ່. ໃນໂອກາດ​ດັ່ງກ່າວ, ທ່ານເອກອັກຄະລັດຖະທູດ ກໍ່ໄດ້​ສະແດງຄວາມຂອບໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ ພ້ອມທັງສະແດງ​ຄວາມ​ຍ້ອງຍໍ-ຊົມເຊີຍ​ ທີ່ ​ທ່ານ ສະເຫຼີມໄຊ ກົມມະສິດ ທີ່​ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ​ຈາກ ​ພັກ ແລະ ລັດຖະບານ ໃຫ້​ດຳລົງຕຳ   ແໜ່ງ​ເປັນ ລັດຖະມົນຕີກະຊວງການຕ່າງປະເທດ ແລະ ອວຍພອນໃຫ້ ທ່ານລັດຖະມົນຕີກະຊວງການຕ່າງປະເທດ ຈົ່ງໄດ້ຮັບຜົນສຳເລັດໃນການປະຕິບັດໜ້າທີ່ອັນໃໝ່, ຊົມເຊີຍ ແລະ ຕີລາຄາອັນດີຕໍ່ໝາກຜົນສຳເລັດ ແຫ່ງການສ້າງສາພັດທະນາປະເທດຊາດ ແລະ ການເຕີບໃຫຍ່ຂະຫຍາຍຕົວຂອງວຽກງານການທູດລາວ, ຍິນດີໃຫ້ການສະໜັບສະໜູນ ສປປ ລາວ ໃນການເປັນປະທານອາຊຽນ ແລະ ຈະສືບຕໍ່ພົວພັນຮ່ວມມືກັບ ສປປ ລາວ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ-ນິວຊີແລນ ທີ່ມີມາແລ້ວນັ້ນ ໃຫ້ແໜ້ນແຟ້ນຍິ່ງໆຂຶ້ນ.

ໃນ​ໂອກາດ​ດັ່ງກ່າວ, ທ່ານ​ລັດຖະມົນຕີ​ຕ່າງປະ​ເທດ ກໍ​ໄດ້​ສະແດງຄວາມຍິນດີຕ້ອນຮັບ ພ້ອມທັງຕີ​ລາຄາ​ສູງຕໍ່​ສາຍ​ພົວພັນມິດຕະພາບ ແລະ ​ການຮ່ວມມືອັນດີງາມ ລະຫວ່າງສອງປະເທດ ລາວ-ນິວຊີແລນ ຊຶ່ງໄດ້ຮັບການຮັດ     ແໜ້ນ ແລະ ເສີມຂະຫຍາຍຢ່າງຕໍ່ເນື່ອງ ພ້ອມທັງ ສະແດງຄວາມຂອບໃຈຕໍ່ ລັດຖະບານ ນິວຊີແລນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາ ເປັນຕົ້ນແມ່ນ ດ້ານການພັດທະນາຊັບພະຍາກອນມະນຸດ, ໂຄງການພັດທະນາການທ່ອງທ່ຽວແບບປະຊາຊົນມີສ່ວນຮ່ວມ, ການຮ່ວມມືດ້ານກະສິກຳ ແລະ ການຊ່ວຍເຫຼືອໂຄງການເກັບກູ້ລະເບີດບໍ່ທັນແຕກ ຜ່ານຂອບຫຼາຍຝ່າຍ, ການເພີ່ມການຊ່ວຍເຫຼືອທາງການ ODA ໃຫ້ແກ່ ສປປ ລາວ ໃນໄລຍະ 3 ປີ ຂ້າງໜ້າ, ຊຶ່ງເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ. ນອກຈາກນີ້, ທ່ານລັດຖະມົນຕີຕ່າງປະເທດ ຍັງສະແດງຄວາມຊົມເຊີຍທີ່ການພົວພັນ ລະຫວ່າງ ອາຊຽນ-ນິວຊີແລນ ໄດ້ຮັບການຍົກລະດັບ ເປັນການພົວພັນແບບຄູ່ຮ່ວມມືຍຸດທະສາດ, ຂອບໃຈຕໍ່ ລັດຖະບານ ນິວຊີແລນ ທີ່ໃຫ້ການຊ່ວຍເຫຼືອ ສປປ ລາວ ໃນການກະກຽມທາງດ້ານບຸກຄະລາກອນ ເປັນເຈົ້າພາບຈັດກອງປະຊຸມອາຊຽນ ໃນປີ 2016 ແລະ ຫວັງຢ່າງຍິ່ງວ່າ ສປປ ລາວ ຈະໄດ້ຕ້ອນຮັບ ທ່ານນາຍົກລັດຖະມົນຕີ ຈອນ ຄີ ເດີນທາງຢ້ຽມຢາມ ແລະ ເຂົ້າຮ່ວມກອງປະຊຸມສຸດຍອດອາຊຽນ ທີ່ ສປປ ລາວ ຈະເປັນເຈົ້າພາບໃນທ້າຍປີນີ້. ສອງປະເທດ ລາວ-ນິວຊີແລນ ຢືນຢັນຈະສືບຕໍ່ການຮ່ວມມືເຊິ່ງກັນ ແລະ ກັນ ໃນເວທີສາກົນ ໂດຍສະເພາະໃນເວທີ ສປຊ.

ໃນປີ 2017 ນີ້, ສອງກະຊວງການຕ່າງປະເທດ ລາວ-ນິວຊີແລນ ຈະຈັດກອງປະຊຸມປຶກສາຫາລືລະດັບສູງ (ລະດັບຫົວໜ້າກົມ) ຄັ້ງທີ 1 ຂຶ້ນ ທັງນີ້ ກໍເພື່ອເພີ່ມທະວີການພົວພັນສອງຝ່າຍໃຫ້ນັບມື້ຂະຫຍາຍຕົວຍິ່ງໆຂຶ້ນ.