ໃນວັນທີ 16 ມິຖຸນາ 2016, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ໃຫ້ກຽດຕອນຮັບການເຂົ້າຢ້ຽມຄຳນັບອວຍພອນຂອງບັນດາທູດປະເທດເພື່ອນມິດ ປະຈຳ ສປປ ລາວ ເຊັ່ນ: ທ່ານ ນາງ ໂຄລດິນ ເລີດູຊ໌ (Claudine LEDOUX), ເອກອັກຄະລັດຖະທູດ ແຫ່ງ ສາທາລະນະລັດ ຝຣັ່ງ ແລະ ທ່ານ ນາງ ຊາລ໋ອດຕ໌ ໂລເຊັນ (Charlotte LAURSEN), ເອກອັກຄະຣາຊະທູດ ແຫ່ງ ຣາຊະອານາຈັກ ດານມາກ ຕາມລຳດັບ. ໃນໂອກາດດັ່ງກ່າວ, ບັນດາທູດ ກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ອວຍພອນໃຫ້ ທ່ານລັດຖະມົນຕີກະຊວງການຕ່າງປະເທດ ຈົ່ງໄດ້ຮັບຜົນສຳເລັດໃນການປະຕິບັດໜ້າທີ່ອັນໃໝ່ ແລະ ຕີລາຄາສູງຕໍ່ຜົນສຳເລັດ ແຫ່ງການສ້າງສາພັດທະນາປະເທດຊາດ ໃນໄລຍະຜ່ານມາ, ພ້ອມທັງ ຢັ້ງຢືນວ່າ ຈະໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນການເປັນປະທານອາຊຽນໝູນວຽນ.

ໃນໂອກາດດັ່ງກ່າວ, ທ່ານລັດຖະມົນຕີ ກະຊວງການຕ່າງປະເທດ ກໍໄດ້ສະແດງຄວາມຍິນດີຕ້ອນຮັບ ພ້ອມທັງສະແດງຄວາມຊົມເຊີຍຕໍ່ການປະຕິບັດໜ້າທີ່ຂອງທູດ ແລະ ໄດ້ກ່າວຄວາມຂອບໃຈ ຜ່ານບັນດາທ່ານທູດ ໄປຍັງ ລັດຖະບານ ແລະ ປະຊາຊົນ ທີ່ໄດ້ໃຫ້ການຊ່ວຍເຫຼືອອຸ້ມຊູ ໃນບັນດາຂະແໜງການຕ່າງໆ ຕະຫຼອດໄລຍະຜ່ານມາ, ເຊິ່ງເປັນການປະກອບສ່ວນອັນສຳຄັນເຂົ້າໃນວຽກງານການພັດທະນາເສດຖະກິດຂອງ ສປປ ລາວ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ແລະ ຫວັງວ່າ ບັນດາທູດຈະສືບຕໍ່ຕັ້ງໜ້າປະກອບສ່ວນເສີມຂະຫຍາຍສາຍພົວພັນຮ່ວມມື ລະຫວ່າງ ສປປ ລາວ ກັບ ບັນດາປະເທດເພື່ອນມິດ ໃຫ້ມີປະສິດທິຜົນສູງ ແລະ ມີໝາກຜົນອັນໃໝ່ທີ່ຍິ່ງໃຫຍ່ກວ່າເກົ່າໃນຕໍ່ໜ້າ; ພ້ອມທັງ ອວຍພອນໃຫ້ບັນດາທູດ ຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດຂອງຕົນ.