ຕອບສະຫນອງຕາມຄຳເຊີນຂອງ ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ປຣາກ ໂຊຄົນ, ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ແຫ່ງ ຣາຊະອານາຈັກ ກຳປູເຈຍ ພ້ອມດ້ວຍຄະນະ​ ໄດ້ເດີນທາງມາຢ້ຽມຢາມເຮັດວຽກ ຢ່າງເປັນທາງການ ຢູ່ ສປປ ລາວ, ໃນລະຫວ່າງວັນທີ 16-17 ມິຖຸນາ 2106, ເພື່ອເປັນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ລາວ ແລະ ກຳປູເຈຍ.

ໃນ​ຕອນ​ເຊົ້າ​ຂອງ​ວັນ​ທີ 17 ມິຖຸນາ 2016, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ​ໄດ້​ໃຫ້​ກຽດ​ຕ້ອນຮັບ ​ແລະ ພົບ​ປະ​ປຶກສາຫາລື​ ຢ່າງ​ເປັນ​ທາງ​ການ ກັບ ທ່ານ ປຣາກ ​ໂຊ​ຄົນ, ລັດຖະມົນຕີກະຊວງການຕ່າງປະເທດ ແລະ ຮ່ວມ​ມື​ສາກົນ ​ແຫ່ງ ຣາຊະ​ອານາຈັກ ກຳປູ​ເຈຍ ຢູ່ທີ່ ກະຊວງການຕ່າງປະເທດ. ​ໃນ​ການ​ພົບ​ປະ​ຄັ້ງ​ນີ້, ສອງ​ຝ່າຍ​​ຕີ​ລາຄາການ​ພົວພັນ ​ແລະ ການ​ຮ່ວມ​ມື​ສອງ​ຝ່າຍ​ມີ​ການ​ຂະຫຍາຍຕົວ ເພີ່ມ​ຂຶ້ນຢ່າງ​ຕໍ່​ເນື່ອງ ຊຶ່ງ​ເຫັນ​ໄດ້​ຈາກ​ການ​ແລກປ່ຽນການ​ຢ້ຽມຢາມ ​ເຊິ່ງກັນ ​ແລະ ​ກັນ ​ຂອງ​ຄະນະ​ຜູ້​ແທນ​ຂັ້ນປະມຸກ​ລັດ, ຫົວໜ້າລັດຖະບານ ​ແລະ ຂະ​ແໜງການ​ຕ່າງໆ ຕະຫຼອດຮອດ​ທ້ອງ​ຖິ່ນ​ຂອງ​ສອງ​ປະ​ເທດ ແລະ ສອງ​ຝ່າຍ​ເຫັນ​ດີຈະສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນ​ຕ່າງໆຂອງສອງປະເທດຢ່າງເປັນປົກກະຕິ; ​ເພີ່ມ​ທະວີ​ການ​ປະຕິບັດ ບັດ​ດາ​ສັນຍາ ​ແລະ ຂໍ້​ຕົກລົງ​ຕ່າງໆ ທີ່​ສອງ​ຝ່າຍ​ໄດ້​ຕົກລົງ​ນຳກັນ ​ໃຫ້​ເກີດ​ດອກ​ອອກ​ຜົນ ​ແລະ ​ເປັນ​ຮູບ​ປະ​ທຳ; ສືບຕໍ່​ເພີ່ມ​ທະວີ​ການຮ່ວມ​ມື​ກັນ​ໃ​ນ ການຮັກສາ​ຄວາມ​ສະຫງົບ​, ​ສະກັດ​ກັ້ນການ​ເຄື່ອນ​ໄຫວ​ຂອງ​ຄົນ​ບໍ່ດີ,​ ການ​ລັກລອບ​ຂົ່ນສົ່ງ-ຄ້າຂາຍ​ຢາ​ເສບ​ຕິດ ​ແລະ ​ປະກົດ​ການ​ຫຍໍ້​ທໍ້​ອື່ນໆ ເພື່ອ​ຮັກສາ​ສັນຕິພາບ, ສະ​ເຖຍລະ​ພາບ ລຽບຕາມ​ເສັ້ນ​ຊາຍ​ແດນຂອງ​ສອງ​ປະ​ເທດ; ສືບຕໍ່ສົ່ງ​ເສີມ​ກົນ​ໄກ​ການ​ຮ່ວມ​ມື ຄະນະ​ກຳ​ມະ​ທິການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ (JC) ຂອງສອງປະເທດ, ຊຶ່ງລວມມີ ດ້ານການເມືອງ, ເສດຖະກິດ-ການຄ້າ, ການຄົມມະນາຄົມ, ການລົງທຶນ, ການສຶກສາ,​ ວັດທະນາທຳ ແລະ ອື່ນໆ; ສອງຝ່າຍເຫັນດີສ້າງຕັ້ງສະຖານກົງສູນໃຫຍ່ຂອງສອງປະເທດ ຢູ່ປະເທດຂອງກັນ ຊຶ່ງຝ່າຍລາວຕັ້ງຢູ່ ແຂວງຊຽງແຕງ ຂອງກຳປູເຈຍ ແລະ ຝ່າຍກຳປູເຈຍຕັ້ງຢູ່ ແຂວງຈຳປາສັກ ຂອງລາວ, ຊຶ່ງ​ຈະ​ຈັດ​ພິທີ​ເປີດຢ່າງ​ເປັນ​ທາງ​ການ​ໃນ​ໄວໆນີ້; ເຫັນດີສືບຕໍ່ປັກຫຼັກໝາຍຊາຍແດນຂອງ​ສອງ​ປະ​ເທດທີ່ຍັງຄົງຄ້າງໃຫ້ສຳເລັດໂດຍໄວ; ຕົກລົງເຫັນດີກໍ່ສ້າງເສັ້ນທາງ ແລະ ຂົວເຊລຳເພົາ ເພື່ອເຊື່ອມຈອດລະຫວ່າງສອງປະເທດ; ຊຸກ​ຍູ້ໃຫ້​ມີ​ການ​ລົງທຶນ,​ ການ​ຄ້າ​ຮ່ວມ​ກັນຫຼາຍຂຶ້ນ ​ໂດຍ​ສະ​ເພາະ​ໃຫ້​ເຂົ້າ​ໄປ​ລົງທຶນ​ຢູ່​ໃນ​ປະ​ເທດ​ຂອງ​ກັນ ​ແລະ ກັນ,​ການ​ຄ້າ​ລະຫວ່າງ​ແຂວງ​ທີ່​ມີ​ຊາຍ​ແດນ​ຕິດ​ຈອດ​ກັນ; ​ແລະ ດ້ານການສຶກສາສອງຝ່າຍເຫັນດີເປັນເອກະພາບ ເພີ່ມທຶນ​ແລກປ່ຽນການສຶກສາລະດັບປະລິນຍາຕີ ລະຫວ່າງສອງລັດຖະບານ ເປັນ 15 ທຶນຕໍ່ປີ. ນອກ​ນັ້ນ, ສອງ​ຝ່າຍ​ຍັງ​ເຫັນ​ດີ​ໃຫ້ການ​ຮ່ວມ​ມື​ກັນ​ຢ່າງ​ໃກ້ຊິດ ​ແລະ ​ໃຫ້ການ​ສະໜັບສະໜູນ ຊ່ວຍ​ເຫຼືອ​​ເຊິ່ງກັນ​ແລະ ກັນ ​ໃນ​ເວທີ​ພາກພື້ນ ​ແລະ ສາກົນ ​ເຊັ່ນ: CLV, CLMV, ACMEC, ASEAN, UN, GMS ​ແລະ ອື່ນໆ.