ໃນຕອນຄໍ່າຂອງວັນທີ 17 ມິຖຸນາ 2016, ທີ່ໂຮງແຮມແດນສະຫວັນ, ນະຄອນຫຼວງວຽງຈັນ ກະຊວງການຕ່າງປະເທດ ຮ່ວມກັບສະຖານເອກອັກຄະຣາຖະທູດ ແຫ່ງ ຣາຊະອານາຈັກ ກຳປູເຈຍ ປະຈຳ ສປປ ລາວ ພ້ອມກັນສະເຫຼີມຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຣາຊະອານາຈັກ ກຳປູເຈຍ ຄົບຮອບ 60 ປີ ໂດຍເປັນກຽດເຂົ້າຮ່ວມຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ; ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ປຣາກ ໂຊຄົນ, ລັດຖະມົນຕີຕ່າງປະເທດ ແລະ ການຮ່ວມມືສາກົນ ແຫ່ງ ຣາຊະອານາຈັກ ກຳປູເຈຍ ພ້ອມດ້ວຍແຂກທີ່ຖືກເຊີນ.
ສປປ ລາວ ແລະ ຣາຊະອານາຈັກ ກຳປູເຈຍ ສ້າງຕັ້ງສາຍພົວພັນການທູດນຳກັນໃນວັນທີ 15/6/1956, ເປັນປະເທດບ້ານໃກ້ເຮືອນຄຽງ, ບ້ານພີ່ເມືອງນ້ອງ ທີ່ມີສາຍພົວພັນມິດຕະພາບອັນເປັນມູນເຊື້ອ ແລະ ມີການຮ່ວມມື ທີ່ດີງາມມາແຕ່ດຶກດຳບັນ ໂດຍສະເພາະແມ່ນໄລຍະການຕໍ່ສູ້ກູ້ຊາດ ຕ້ານການຮຸກຮານຂອງພວກລ່າເມືອງຂຶ້ນ ເພື່ອປົດປ່ອຍປະເທດຊາດ ກໍຄືໄລຍະການສ້າງສາ ແລະ ພັດທະນາປະເທດຊາດໃນປັດຈຸບັນ. ຕະຫຼອດ 60 ປີ ທີ່ຜ່ານມາ, ການພົວພັນຮ່ວມມືຂອງສອງປະເທດ ລາວ-ກຳປູເຈຍ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ, ຊຶ່ງສະແດງອອກໃນການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນສອງປະເທດໃນຂັ້ນຕ່າງໆເຊັ່ນ: ການຢ້ຽມຢາມລັດຖະກິດ ກຳປູເຈຍ ຂອງພະນະທ່ານ ຈູມມາລີ ໄຊຍະສອນ, ອາດີດປະທານປະເທດ ແຫ່ງ ສປປ ລາວ ໃນລະຫວ່າງວັນທີ 26-28 ກຸມພາ 2015; ການຢ້ຽມຢາມລັດຖະກິດ ສປປ ລາວ ຂອງ ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາໂມນີ, ພະມະຫາກະສັດ ແຫ່ງ ຣາຊະອານາຈັກ ກຳປູເຈຍ ໃນລະຫວ່າງວັນທີ 21-23 ທັນວາ 2015; ແລະ ການເຂົ້າຮ່ວມການແຂ່ງຂັນກິລາບານເຕະມິດຕະພາບ ລະຫວ່າງສອງປະເທດ ຢູ່ ກຳປູເຈຍ ນຳໂດຍ ທ່ານທອງລຸນ ສີສຸລິດ, ອາດີດຮອງນາຍົກລັດຖະມົນຕີ,ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນລະ ຫວ່າງວັນທີ 18-19 ມີນາ 2016, ໄດ້ເປັນການປະກອບສ່ວນອັນສຳຄັນເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມື ທີ່ມີມູນເຊື້ອອັນຍາວນານ ຖານບ້ານໃກ້ເຮືອນຄຽງ ໃຫ້ນັບມື້ນັບຂະຫຍາຍຕົວ ຢ່າງບໍ່ຢຸດຢັ້ງ.
ສອງປະເທດຍັງໄດ້ຮ່ວມກັນສ້າງກົນໄກຮ່ວມມືສອງຝ່າຍນຳກັນ ເພື່ອຊ່ວຍສົ່ງເສີມການຮ່ວມມືທາງດ້ານການເມືອງ, ເສດຖະກິດ-ການຄ້າ, ການຄົມມະນາຄົມ, ການລົງທຶນ, ການສຶກສາ, ວັດທະນາທຳ ແລະ ອື່ນໆ ໃຫ້ມີປະສິດທິພາບ ແລະ ມີປະສິດທິຜົນສູງ ນຳເອົາຜົນປະໂຫຍດມາສູ່ປະຊາຊົນຂອງສອງປະເທດ; ສອງປະເທດມີກົນໄກຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ກຳປູເຈຍ; ດ້ານການຄ້າ ແລະ ການລົງທຶນເຫັນວ່າມີບາດກ້າວຂະຫຍາຍຕົວ ເປັນຕົ້ນແມ່ນ ຂະແໜງອຸດສາຫະກຳບໍ່ແຮ່ ແລະ ການຂຸດຄົ້ນ, ການຄ້າຂາຍຍົກ-ຂາຍຍ່ອຍ; ການເຄື່ອນໄຫວດ້ານການເງິນ ແລະ ປະກັນໄພ, ການບໍລິການພັກເຊົ່າ ແລະ ອື່ນໆ; ສອງປະເທດຍັງໄດ້ມີການແລກປ່ຽນທຶນການສຶກສາລະດັບປະລິນຍາຕີ 15 ທຶນຕໍ່ປີ. ນອກຈາກການຮ່ວມມືສອງຝ່າຍແລ້ວ ສອງປະເທດຍັງມີການຮ່ວມມື, ສະໜັບສະໜູນຊ່ວຍເຫຼືອເຊິງກັນ ແລະ ກັນ ໃນເວທີພາກພື້ນ ແລະ ສາກົນ ເຊັ່ນ: CLV, CLMV, ACMEC, ASEAN, UN, GMS ແລະ ອື່ນໆ.