ທ່ານ Stephen Anthony Rudgard, ຜູ້ໜ້າໜ້າອົງການອາຫານ ແລະ ການກະເສດ FAO ປະຈຳລາວ
ທ່ານ ລີ ຊັງ ກຸນ, ເອກອັກຄະລັດຖະທູດ ແຫ່ງ ສປປ ເກົາຫລີ ປະຈຳລາວ
ທ່ານ Karel Hartogh, ເອກອັກຄະລັດຖະທູດ ແຫ່ງ ໂຮນລັງ ປະຈຳລາວ
ທ່ານ ຢູນ ຄັງ ຮຽນ, ເອກອັກຄະລັດຖະທູດ ແຫ່ງ ສ.ເກົາຫລີ ປະຈຳລາວ
ໃນວັນທີ 22 ມິຖຸນາ 2016, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບອວຍພອນ ຂອງບັນດາທູດປະເທດເພື່ອນມິດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ, ໃນນີ້ມີ ທ່ານ Stephen Anthony Rudgard, ຜູ້ໜ້າໜ້າອົງການອາຫານ ແລະ ການກະເສດ FAO, ທ່ານ ລີ ຊັງ ກຸນ, ເອກອັກຄະລັດຖະທູດ ແຫ່ງ ສປປ ເກົາຫລີ, ທ່ານ Karel Hartogh, ເອກອັກຄະລັດຖະທູດ ແຫ່ງ ໂຮນລັງ ແລະ ທ່ານ ຢູນ ຄັງ ຮຽນ, ເອກອັກຄະລັດຖະທູດ ແຫ່ງ ສ.ເກົາຫລີ ຕາມລຳດັບ.
ໃນໂອກາດດັ່ງກ່າວ, ບັນດາທູດ ກໍໄດ້ສະແດງຄວາມຍ້ອງຍໍຊົມເຊີຍ ທ່ານ ສະເຫຼີມໄຊ ກົມມະສິດ ທີ່ໄດ້ຂຶ້ນຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃໝ່ ແລະ ໄດ້ອວຍພອນໃຫ້ທ່ານຈົ່ງໄດ້ຮັບຜົນສຳເລັດໃນການປະຕິບັດໜ້າທີ່ໃໝ່; ພ້ອມກັນນັ້ນ, ກໍໄດ້ຕີລາຄາສູງ ຕໍ່ຜົນສຳເລັດແຫ່ງການສ້າງສາພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາແລະ ຢືນຢັນວ່າ ຈະໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນການເປັນປະທານອາຊຽນໝູນວຽນໃນປີ 2016 ນີ້.
ທ່ານລັດຖະມົນຕີກະຊວງການຕ່າງປະເທດ ກໍໄດ້ສະແດງຄວາມພູມໃຈຕໍ່ການຊົມເຊີຍດັ່ງກ່າວ ແລະ ສະແດງຄວາມຊົມເຊີຍຕໍ່ການປະຕິບັດໜ້າທີ່ຂອງບັນດາທູດ ທີ່ໄດ້ຊຸກຍູ້ສົ່ງເສີມການພົວພັນ ແລະ ການຮ່ວມມືສອງຝ່າຍໃນໄລຍະຜ່ານມາ ແລະ ໄດ້ກ່າວສະແດງຄວາມຂອບໃຈໂດຍຜ່ານບັນດາທ່ານທູດ ໄປຍັງ ລັດຖະບານ ແລະ ປະຊາຊົນ ຂອງບັນດາທູດປະເທດກ່ຽວຂ້ອງ ທີ່ໄດ້ໃຫ້ການຊ່ວຍເຫຼືອອຸ້ມຊູໃນບັນດາຂະແໜງການຕ່າງໆ ຂອງ ສປປ ລາວ ຕະຫຼອດໄລຍະຜ່ານມາ, ເຊິ່ງເປັນການປະກອບສ່ວນອັນສຳຄັນເຂົ້າໃນວຽກງານການພັດທະນາເສດຖະກິດສັງຄົມ ຂອງ ສປປ ລາວ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ໃນປີ 2020 ແລະ ຫວັງວ່າ ບັນດາທູດ ຈະສືບຕໍ່ຢ່າງຕັ້ງໜ້າໃນການປະກອບສ່ວນເສີມຂະຫຍາຍສາຍພົວພັນຮ່ວມມື ລະຫວ່າງ ສປປ ລາວ ກັບ ບັນດາປະເທດເພື່ອນມິດ ໃຫ້ມີປະສິດທິຜົນສູງກວ່າເກົ່າໃນຕໍ່ໜ້າ; ພ້ອມທັງອວຍພອນໃຫ້ບັນດາທູດ ຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດຂອງຕົນ.