ໃນຕອນເຊົ້າຂອງ ວັນທີ 24 ກໍລະກົດ 2016, ພິທີເປີດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ໄດ້ຈັດຂື້ນ ທີ່ ໂຮງແຮມດອນຈັນພາເລັດ ໂດຍການເຂົ້າຮ່ວມຂອງ ລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາຊຽນ, ພັນລະຍາຂອງລັດຖະມົນຕີຕ່າງປະເທດ, ຫົວຫນ້າເຈົ້າຫນ້າທີ່ອາວຸໂສອາຊຽນ, ຄະນະຜູ້ແທນ ແລະ ບັນດາສື່ມວນຊົນ ທັງພາຍໃນ ແລະ ຕ່າງປະເທດ. ນອກຈາກນີ້, ລັດຖະມົນຕີຕ່າງປະເທດຂອງ ຕີມໍ ເລສເຕ, ປາປົວ ນິວກິນີ ແລະ ນອກແວ ກໍໄດ້ເຂົ້າຮ່ວມໃນນາມແຂກຂອງ ສປປ ລາວ ທີເປັນປະທານອາຊຽນ.
ໃນພິທີເປີດດັ່ງກ່າວ, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນນາມປະທານກອງປະຊຸມລັດຖະມົນຕີຕ່າງປະເທດອາຊຽນ ໄດ້ກ່າວຕ້ອນຮັບບັນດາລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາຊຽນ ແລະ ບັນດາຄະນະຜູ້ແທນ ເພື່ອເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມອື່ນໆທີ່ກ່ຽວຂ້ອງ. ໃນນີ້, ທ່ານ ສະເຫລີມໄຊ ໄດ້ສະແດງຄວາມຂອບໃຈບັນດາປະເທດອາຊຽນ, ຄູ່ເຈລະຈາອາຊຽນ, ປະເທດເພື່ອນມິດ ແລະ ອົງການຈັດຕັ້ງພາກພື້ນ ແລະ ສາກົນ ທີ່ໄດ້ໃຫ້ການຮ່ວມມື ແລະ ຊ່ວຍເຫລືອ ສປປ ລາວ ໃນການເປັນປະທານອາຊຽນ ພາຍໃຕ້ຄຳຂັວນ “ຫັນວິໄສທັດໃຫ້ເປັນຮູບປະທໍາ ເພື່ອຄວາມເຂັ້ມແຂງຂອງປະຊາຄົມອາຊຽນ”ແລະ ຜົນສຳເລັດຂອງບັນດາກອງປະຊຸມຄັ້ງນີ້ ຈະເປັນການກະກຽມອັນດີໃຫ້ແກ່ ກອງປະຊຸມສຸດຍອດ ອາຊຽນຄັ້ງທີ 28 ແລະ 29 ທີ່ຈະຈັດຂຶ້ນໃນເດືອນ ກັນຍາ 2016 ທີ່ ນະຄອນຫລວງວຽງຈັນ.
ໃນໂອກາດນີ້, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ກໍໄດ້ໃຫ້ກຽດກ່າວເປີດກອງປະຊຸມ ຊຶ່່ງໃນນີ້ ທ່ານໄດ້ຍົກໃຫ້ເຫັນເຖິງຄວາມສໍາເລັດຂອງອາຊຽນ ໃນໄລຍະ 49 ປີ ຜ່ານມາ ໂດຍສະເພາະ ການປະກາດສ້າງຕັ້ງເປັນປະຊາຄົມອາຊຽນ ໃນວັນທີ 31 ທັນວາ 2015 ແລະ ເນັ້ນເຖິງຄວາມສຳຄັນໃນການສືບຕໍ່ຮັດແຫນ້ນການຮ່ວມມືກັນພາຍໃນອາຊຽນ ແລະ ລະຫວ່າງອາຊຽນກັບຄູ່ຮ່ວມມືພາຍນອກ ເພື່ອສົ່ງເສີມ ແລະ ຮັດແຫນ້ນປະຊາຄົມອາຊຽນໃຫ້ເຂັ້ມແຂງ ແລະ ຈະເລີນກ້າວຫນ້າ.
ພາຍຫລັງ ພິທີເປີດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49, ທ່ານ ສະເຫລີມໄຊ ກົມມະສິດ ກໍໄດ້ນໍາພາລັດຖະມົນຕີຕ່າງປະເທດອາຊຽນ ໄດ້ເຂົ້າຢ້ຽມຂໍ່ານັບ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ. ໃນໂອກາດນີ້, ພະນະທ່ານ ນາຍົກລັດຖະມົນຕີ ໄດ້ຕີລາຄາສູງຕໍ່ບົດບາດສຳຄັນຂອງ ກອງປະຊຸມລັດຖະມົນຕີຕ່າງປະເທດອາຊຽນ ນັບແຕ່ອາຊຽນໄດ້ຮັບການສ້າງຕັ້ງຂຶ້ນໃນປີ 1967 ປະກອບສ່ວນເຂົ້າໃນການຊຸກຍູ້ ແລະ ສົ່ງເສີມການຮ່ວມມືຂອງອາຊຽນໃນຂົງເຂດຕ່າງໆ ກໍຄື ການຮ່ວມມືກັບຄູ່ເຈລະຈາຂອງອາຊຽນ ແລະ ຄູ່ຮ່ວມມືພາຍນອກອື່ນໆ ພາຍໃຕ້ກົນໄກທີ່ອາຊຽນ ເປັນຜູ້ລິເລີ່ມຂຶ້ນ.