ໃນຕອນບ່າຍຂອງວັນທີ 24 ກໍລະກົດ 2016, ທີ່ ຫໍປະຊຸມແຫ່ງຊາດ, ທ່ານ ສະເຫລີມໄຊ ກົມມະສິດ ໄດ້ເປັນປະທານກອງປະຊຸມລັດຖະມົນຕີຕ່າງປະເທດ ຄັ້ງທີ 49 ໂດຍການເຂົ້າຮ່ວມຂອງ ລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາຊຽນ, ຫົວໜ້າເຈົ້າໜ້າທີ່ອາວຸໂສອາຊຽນ ພ້ອມດ້ວຍ ຄະນະຜູ້ແທນ ຈາກບັນດາປະເທດສະມາຊິກອາຊຽນ.

ກອງປະຊຸມໄດ້ປຶກສາຫາລື ກ່ຽວກັບ ຄວາມຄືບໜ້າຂອງການຜັນຂະຫຍາຍວິໄສທັດປະຊາຄົມອາຊຽນ 2025 ໂດຍສະເພາະການຈັດຕັ້ງປະຕິບັດ ແຜນແມ່ບົດປະຊາຄົມການເມືອງ-ຄວາມຫມັ້ນຄົງອາຊຽນ 2025. ພ້ອມກັນນີ້, ກອງປະຊຸມໄດ້ຮັບຮອງເອົາແຜນວຽກບູລິມະສິດ ຂອງຄະນະກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍ ສິດທິມະນຸດ ພ້ອມດ້ວຍ ແຜນງົບປະມານຂອງກິດຈະກໍາດັ່ງກ່າວ ສໍາລັບປີ 2017 ແລະ ໄດ້ຮັບຮອງເອົາ ຖະແຫລງການລັດຖະມົນຕີຕ່າງປະເທດອາຊຽນ ເນື່ອງໃນໂອກາດ 40 ຂອງສົນທິສັນຍາ ໄມຕີຈິດ ແລະ ການຮ່ວມມື ຢູ່ ພາກພື້ນອາຊີຕາເວັນອອກສ່ຽງໃຕ້, ພ້ອມທັງເຫັນດີຕໍ່ການສະໝັກ ຂອງ ອີຣານ, ມາຣົກ, ອີຢິບ ແລະ ຈິເລ ເພື່ອເຂົ້າເປັນພາຄີສົນທິສັນຍາດັ່ງກ່າວ.

ໃນໂອກາດນີ້, ​ລັດຖະມົນຕີຕ່າງປະເທດອາຊຽນ ຍັງໄດ້ປຶກສາຫາລື ກ່ຽວກັບ ການສົ່ງເສີມການຮ່ວມມືກັບພາຍນອກ ແລະ ການສົ່ງເສີມບົດບາດຄວາມເປັນແກນກາງຂອງອາຊຽນ ໃນບັນດາກົນໄກການຮ່ວມມືທີ່ອາຊຽນເປັນຜູ້ລິເລີ້ມ ແລະ ໄດ້ແລກປ່ຽນຄວາມຄິດຄວາມເຫັນຢ່າງກົງໄປກົງມາ ແລະ ສ້າງສັນ ກ່ຽວກັບ ບັນຫາຢູ່ພາກພື້ນ ແລະ ສາກົນ ເຊັ່ນ: ການກໍ່ການຮ້າຍ, ການຄ້າມະນຸດ, ບັນຫາຢາເສບຕິດ, ໄພພິບັດທໍາມະຊາດ, ການຍ້າຍຖິ່ນຖານແບບຜິດປົກກະຕິ, ແລະ ສະພາບການ ຢູ່ ຕາເວັນອອກກາງ, ແຫລມເກົາຫລີ ແລະ ທະເລຈີນໃຕ້.