ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເປັນປະທານຈັດກອງປະຊຸມລັດຖະມົນຕີ ຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ ຄັ້ງທີ 7 ໃນຕອນບ່າຍ ຂອງວັນທີ 24 ກໍລະກົດ 2016, ທີ່ ຫໍປະຊຸມແຫ່ງຊາດ, ນະຄອນຫລວງວຽງຈັນ ແລະ ມີບັນດາ ລັດຖະມົນຕີຕ່າງປະເທດ ກໍາປູເຈຍ, ມຽນມາ, ໄທ, ຫວຽດນາມ ແລະ ອິນເດຍ ເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ ໄດ້ຕີລາຄາສູງຕໍ່ຄວາມຄືບໜ້າຂອງການຈັດຕັ້ງປະຕິບັດ ຂອບການຮ່ວມມືໃນໄລຍະຜ່ານມາ, ໂດຍສະເພາະ ການຮ່ວມມືດ້ານການພັດທະນາຊັບພະຍາກອນມະນຸດ ທີ່ອິນເດຍໄດ້ສະໜອງທຶນການສຶກສາໃຫ້ແກ່ປະເທດ ກຳປູເຈຍ, ລາວ, ມຽນມາ ແລະ ຫວຽດນາມ ຈຳນວນ 900 ທຶນຕໍ່ປີ ແລະ ກຳລັງຈັດຕັ້ງປະຕິບັດໂຄງການທີ່ເຫັນຜົນໄວຮ່ວມກັນ ຈຳນວນ 20 ໂຄງການ, ສປປ ລາວ ມີ 3 ໂຄງການ. ພ້ອມດຽວກັນນັ້ນ, ກໍ່ໄດ້ປຶກສາຫາລື ກ່ຽວກັບ ທິດທາງການຮ່ວມມືໃນຕໍ່ໜ້າ, ໂດຍໄດ້ຂະຫຍາຍຂະແໜງການຮ່ວມມືເຊິ່ງກວມເອົາ ການຮ່ວມມືດ້ານການພັດທະນາວິສາຫະກິດຂະໜາດນ້ອຍ ແລະ ຂະໜາດກາງ, ການຮ່ວມມືດ້ານການພັດທະນາແນວພັນເຂົ້າ ແລະ ດ້ານສາທາລະນະສຸກ.
ກອງປະຊຸມ ໄດ້ຮັບຮອງເອົາເອກະສານສໍາຄັນ 2 ສະບັບ ຄື: ຖະແຫລງການຮ່ວມກອງປະຊຸມລັດຖະມົນຕີ ຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ ຄັ້ງທີ 7 ແລະ ແຜນປະຕິບັດງານ ຂອງຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ ໃນໄລຍະ 3 ປີຕໍ່ໜ້າ (2016-2018), ເຊິ່ງທັງສອງເອກະສານນີ້ ຈະເປັນບ່ອນອີງໃຫ້ແກ່ການຈັດຕັ້ງປະຕິບັດ ສຳລັບຂອບການຮ່ວມມືດັ່ງກ່າວໃນຕໍ່ຫນ້າ.
ກອງປະຊຸມລັດຖະມົນຕີຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ ຄັ້ງຕໍ່ໄປຈະຈັດຂຶ້ນ ໃນປີ 2017, ທີ່ ປະເທດຟີລິນປິນ, ໂດຍການເປັນປະທານຂອງ ສສ. ມຽນມາ.