ໃນວັນທີ 26 ກໍລະກົດ 2016, ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ສືບຕໍ່ເປັນປະທານກອງປະຊຸມລັດຖະມົນຕີການຕ່າງປະເທດອາຊຽນບວກສາມ ຄັ້ງທີ 17 ແລະ ກອງປະຊຸມລັດຖະມົນຕີການຕ່າງປະເທດຂອງກອງຊຸມມສຸດຍອດ ອີເອເອສ ຄັ້ງທີ 6.
ກອງປະຊຸມລັດຖະມົນຕີການຕ່າງປະເທດອາຊຽນບວກສາມ ຄັ້ງທີ 17 (ອາຊຽນ + ສປ ຈີນ, ຍີ່ປຸ່ນ, ສ. ເກົາຫລີ) ໄດ້ຕີລາຄາວ່າ ນັບແຕ່ໄດ້ຮັບການສ້າງຕັ້ງໃນປີ 1997 ເປັນຕົ້ນມາ, ການການຮ່ວມມືອາຊຽນບວກສາມ ໄດ້ຮັບຜົນສຳເລັດທີ່ສຳຄັນໃນຫຼາຍດ້ານ ໂດຍສະເພາະ ແມ່ນດ້ານການເງິນ ແລະ ຄວາມໝັ້ນຄົງດ້ານສະບຽງອາຫານ. ກ່ຽວກັບການຮ່ວມມືດ້ານການເງິນ, ກອງປະຊຸມມີຄວາມຍິນດີທີ່ເຫັນວ່າການຮ່ວມມືໃນຂອບຂໍ້ລິເລີ່ມຊຽງ ໃໝ່ຫຼາຍຝ່າຍ (CMIM), ຫ້ອງການຕິດຕາມເສດຖະກິດມະຫາພາກອາຊຽນບວກສາມ (AMRO), ຂໍ້ລິເລີ່ມພັນທະບັດອາຊີ (ABMI), ເຄື່ອງມືຄໍ້າປະກັນສິນເຊື່ອ ແລະ ການລົງທຶນ (CGIF), ສືບຕໍ່ໄດ້ຮັບການເສີມຂະຫຍາຍໃຫ້ມີຄວາມເຂັ້ມແຂງເພື່ອຮັບປະກັນສະຖຽນລະພາບທາງການເງິນໃນພາກພື້ນ. ສ່ວນຄວາມໝັ້ນຄົງດ້ານສະບຽງອາຫານແມ່ນສືບຕໍ່ໄດ້ຮັບການຄໍ້າປະກັນ ໂດຍຜ່ານການຈັດຕັ້ງປະຕິບັດຄັງເຂົ້າສຸກເສີນອາຊຽນບວກສາມ (APTERR). ອັນສຳຄັນແມ່ນບັນດາລັດຖະມົນຕີຕ່າງປະເທດອາຊຽນບວກສາມ ໄດ້ຢ້ຳຄືນຄວາມສຳຄັນຂອງກົນໄກອາຊຽນບວກສາມຕໍ່ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ແລະ ເປັນກົນໄກຂັບເຄື່ອນການເຕີບໂຕທາງດ້ານເສດຖະກິດຢູ່ອາຊີຕາເວັນອອກ. ພ້ອມນັ້ນ, ກໍໄດ້ຊຸກຍູ້ໃຫ້ເຈົ້າໜ້າທີ່ກ່ຽວຂ້ອງສືບຕໍ່ຈັດຕັ້ງປະຕິບັດແຜນວຽກໄລຍະປີ 2013-2017 ໃຫ້ມີປະສິດທິຜົນສູງ ແນໃສ່ເສີມຂະຫຍາຍການຮ່ວມມືອາຊຽນບວກສາມໃຫ້ນັບມື້ນັບຂະຫຍາຍຕົວຍິ່ງຂຶ້ນ.
ກອງປະຊຸມລັດຖະມົນຕີການຕ່າງປະເທດຂອງກອງປະຊຸມສຸດຍອດອາຊີຕາເວັນອອກ (ອີເອເອສ) ຄັ້ງທີ 6 ໄດ້ສະແດງຍິນດີຕໍ່ຜົນສຳເລັດຂອງຂອບການຮ່ວມມື ອີເອເອສ ຕະລອດໄລຍະ 10 ປີ ຜ່ານມາ ໂດຍສະເພາະແມ່ນອີເອເອສເປັນກົນໄກທີ່ມີລັກສະນະພິເສດ ກໍຄືເປັນເວທີປຶກສາຫາລືຂອງຜູ້ນຳ (Leaders-led Forum) ທີ່ໄດ້ເຕົ້າໂຮມບັນດາຜູ້ນຳຢູ່ພາກພື້ນອາຊີ-ປາຊີຟິກ ແລະ ອາຊີຕາເວັນອອກ ເພື່ອມາປຶກສາຫາລື ກ່ຽວກັບບັນຫາຍຸດທະສາດ, ການເມືອງ ແລະ ເສດຖະກິດ ທີ່ມີຄວາມສຳຄັນ ແນໃສ່ສົ່ງເສີມຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ແລະ ອຳນວຍຄວາມສະດວກໃຫ້ແກ່ການຮ່ວມມືເພື່ອການພັດທະນາ, ເຊິ່ງທັງໝົດນີ້ໄດ້ປະກອບສ່ວນເຂົ້າໃນການສົ່ງເສີມສັນຕິພາບ, ສະຖຽນລະພາບ ແລະ ຄວາມສົນບູນພູນສຸກຢູ່ພາກພື້ນອາຊີຕາເວັນອອກ. ບັນດາລັດຖະມົນຕີການຕ່າງປະເທດຂອງກອງປະຊຸມສຸດຍອດ ອີເອເອສ ຍັງໄດ້ປຶກສາຫາລືກ່ຽວກັບຖະແຫຼງການ ກົວລາລຳເປີ ວ່າດ້ວຍການສ້າງຕັ້ງ ອີເອເອສ ຄົບຮອບ 10 ປີ ແລະ ຊຸກຍູ້ການຈັດຕັ້ງປະຕິບັດກິດຈະກຳຕ່າງໆພາຍໃຕ້ 6 ຂົງເຂດບູລິມະສິດຄື: ການເງິນ, ພະລັງງານ ແລະ ສິ່ງແວດລ້ອມ, ການສຶກສາ, ບັນຫາສຸຂະພາບ ແລະ ພະຍາດລະບາດ, ການຄຸ້ມຄອງໄພພິບັດ, ແລະ ການເຊື່ອມຈອດອາຊຽນ. ໃນໂອກາດນີ້, ກອງປະຊຸມ ຍັງໄດ້ແລກປ່ຽນຄວາມຄິດເຫັນ ກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ ໂດຍສະເພາະແມ່ນ ການກໍ່ຄວາມບໍ່ສະຫງົບຂອງລັດທິຫົວຮຸນແຮງ ແລະ ການກໍ່ການຮ້າຍ ຢູ່ ອີຣັກ, ຊີຣີ, ຝຣັ່ງ ແລະ ພາກພື້ນອື່ນໆຂອງໂລກ ລວມທັງບັນຫາອື່ນໆທີ່ມີຄວາມສົນໃຈຮ່ວມກັນ.