ໃນ​ວັນ​ທີ 10 ສິງຫາ 2016, ທີ່ ທໍານຽບລັດຖະບານ ຣາຊະ​ອານາຈັກ​ໄທ, ທ່ານ ສະ​ເຫຼີມ​ໄຊ ກົມມະ​ສິດ, ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສປປ ລາວ, ​ໄດ້​ນຳພາ​ຄະນະ​ຜູ້​ແທນ​ລາວ ​ເຂົ້າ​ຢ້ຽມຂ່ຳນັບ​ ທ່ານ ພົນ​ເອກ ປຣະຢຸດ ຈັນ​ໂອຊາ, ນາຍົກລັດຖະມົນຕີ ​ແຫ່ງ ຣາຊະ​ອານາຈັກ​ໄທ, ​ໃນ​ໂອກາດ​ເດີນທາງ​ຢ້ຽມຢາມ​ ຣາຊະ​ອານາຈັກ​ໄທ ຢ່າງ​ເປັນ​ທາງ​ການ, ​ໃນລະຫວ່າງ​ວັນ​ທີ 9-10 ສິງຫາ 2016. ​ໃນ​ໂອກາດ​ດັ່ງກ່າວ, ທ່ານ ສະ​ເຫຼີມ​ໄຊ ກົມມະ​ສິດ ກໍ​ໄດ້​ນຳ​ເອົາ​ຄວາມ​ຢື້ຢາມ​ຖາມ​ຂ່າວຈາກ ​ພະນະ​ທ່ານ ທອງ​ລຸນ ສີ​ສຸ​ລິດ, ນາຍົກລັດຖະມົນຕີ ​ແຫ່ງ ສປປ ລາວ ​ເຖິງ ພະນະ​ທ່ານ ພົນ​ເອກ ປຣະຢຸດ ​ຈັນ​ໂອຊາ;​ ​ໄດ້​​ແຈ້ງ​ຜົນ​ຫຍໍ້ ກ່ຽວກັບ ການ​ພົບ​ປະ​ສອງ​ຝ່າຍ ກັບ​ລັດຖະມົນຕີ​ຕ່າງປະ​ເທດ​ໄທ ແລະ ຈະ​ໃຫ້ການ​ຮ່ວມ​ມື​ຢ່າງ​ໃກ້ຊິດກັບ ລັດຖະມົນຕີ​ຕ່າງປະ​ເທດ​ໄທ ​ໃນ​ການ​ເອົາ​ໃຈ​ໃສ່​ປະຕິບັດ​ພາລະ​ບົດບາດ ຂອງ​ກະຊວງ​ການ​ຕ່າງປະ​ເທດ ​ໃນ​ການ​ຍຸກ​ຊູ້ຕິດຕາມບັນດາ​ຂະ​ແໜງການ​ກ່ຽວຂ້ອງ ​ໃນ​ການຈັດ​ຕັ້ງ​ປະຕິບັດ​ບັນດາ​ຂໍ້​ຕົກລົງ​ຂອງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ ​ໃຫ້​ປະກົດ​ຜົນ​ເປັນ​ຈິງ ​ເພື່ອ​ສ້າງ​ໃຫ້ການ​ພົວພັນ​ຮ່ວມ​ມື ລະຫວ່າງ ລາວ-​ໄທ ສາມາດ​ນໍາ​ເອົາ​ຜົນ​ປະ​ໂຫຍ​ດຕົວ​ຈິງ​ມາສູ່​ປະຊາຊົນ​ສອງ​ຊາດ, ສະ​ແດງ​ຄວາມ​ຂອບ​ໃຈ​ຕໍ່ລັດຖະບານ​ໄທ ທີ່​ໃຫ້ການ​ຮ່ວມ​ມື ​ແລະ ຊ່ວຍ​ເຫຼືອ​ເປັນ​ຢ່າງ​ດີ​ແກ່​ການ​​ເປັນ​ເຈົ້າພາບຈັດກອງ​ປະຊຸມ AMM ຄັ້ງທີ 49 ແລະ ກອງປະຊຸມປິ່ນອ້ອມອື່ນໆ ທີ່ ນະຄອນຫຫຼວງວຽງຈັນ. ​ຫຼັງຈາກ​ນັ້ນ, ທ່ານ ພົນ​ເອກ ປຣະຢຸດ ຈັນ​ໂອຊາ ກໍ​ໄດ້​ຝາກຄວາມຢື້ຢາມຖາມຂ່າວເຖິງ ພະນະທ່ານ ທອງລຸນ ສີສຸລິດ ແລະ ສະ​ແດງ​ຄວາມ​ຕ້ອນຮັບ ​ແລະ ຊົມ​ເຊີຍຕໍ່ ທ່ານ ສະ​ເຫຼີມ​ໄຊ ກົມມະ​ສິດ ທີ່​ໄດ້​ນຳພາ​ຄະນະ​ຜູ້​ແທນ​ລາວ ມາ​ຢ້ຽມຢາມ​ໄທ​ໃນ​ຄັ້ງ​ນີ້ ຊຶ່ງເປັນການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ຖານ​ບ້ານ​ໃກ້​ເຮືອນຄຽງທີ່​ດີ ມີ​ມາ​ແຕ່​ດົນ​ນານ ​ແລະ ການ​ຮ່ວມ​ມື​ອັນ​ດີ ລະຫວ່າງ​ສ​ອງປະ​ເທດ ລາວ ​ແລ​ະ ​ໄທ ​ໃຫ້​ແໜ້ນ​ແຟ້ນ ​ແລະ ກວ້າງຂວາງ​ຍິ່ງໆຂຶ້ນ.