ໃນວັນທີ 12 ສິງຫາ 2016, ທ່ານ ດານຽນ ຣັດເຊວ (Daniel Russel), ຜູ້ຊ່ວຍລັດຖະມົນຕີກະຊວງການຕ່າງປະເທດ ສະຫະລັດ ອາເມລິກາ ໄດ້ເຂົ້າຢ້ຽມຂໍ່ານັບ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ຢູ່ ກະຊວງການຕ່າງປະເທດ, ນະຄອນ​ຫຼວງວຽງຈັນ. ທັງສອງຝ່າຍ ໄດ້ປຶກ​ສາ​ຫາລື​ກັນດ້ານ​ເນື້ອ​ໃນ ​ເພື່ອ​ເປັນການ​ກະ​ກຽມໃຫ້​ແກ່​ການ​ເດີນທາງ​ມາ​ຢ້ຽມ​ຢາມ ສປປ ລາວ ຄັ້ງປະ​ຫວັດ​ສາດ ​ແລະ ​ເຂົ້າຮ່ວມ​ກອງ​ປະຊຸມ​ສຸດ​ຍອດອາຊີຕາເວັນອອກສຽງໃຕ້ (ອາຊຽນ)ຂອງ ປະທານາທິບໍດີ ສະຫະລັດ ອາ​ເມ​ລິ​ກາ ໃນຕົ້ນ​ເດືອນ ກັນຍາ 2016 ນີ້.

ສອງຝ່າຍ​ໄດ້ມີຄວາມ​ເຫັນເປັນເອກະພາບກັນວ່າ ການພົວພັນຮ່ວມມືຂອງສອງປະເທດ​ມີທ່ວງທ່າຂະຫຍາຍຕົວດີຂຶ້ນ ຊຶ່ງ​ສອງ​ຝ່າຍ​ໄດ້ລົງເລິກປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນຢ່າງກວ້າງຂວາງ ກ່ຽວກັບ ບັນຫາຕ່າງໆທີ່ນອນຢູ່ໃນຂອບການຮ່ວມມືເຊັ່ນ: ວຽກງານການຊອກຄົ້ນຫາສິ່ງເສດເຫຼືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມ (MIA), ການເກັບກູ້ລະເບີດທີ່​ບໍ່​ທັນ​ແຕກ (UXO), ການຮ່ວມມືດ້ານສາທາລະນະສຸກ, ການ​ສຶກສາ ແລະ ວັດທະນະທໍາ, ການຊຸກຍູ້ສົ່ງເສີມການພົວພັນຮ່ວມມືດ້ານການຄ້າ-ການລົງ​ທຶນ ລະຫວ່າງ ສອງປະເທດ.

ນອກຈາກ​ນັ້ນ, ທັງ​ສອງ​ຝ່າຍ​ ຍັງ​ໄດ້​ປຶກສາ​ຫາລື​ ກ່ຽວ​ກັບ ບັນຫາ​ສະພາບ​ການ​ພາກ​ພື້ນ ​ແລະ ສາກົນ​ ທີ່​ຕ່າງ​ຝ່າຍມີ​ຄວາມ​ສົນ​ໃຈ​ເປັນຕົ້ນ​ແມ່ນ ການ​ເປັນປະທານ​ອາຊຽນ ຂອງ ສປປ ລາວ.