ບັນດາຜູ້ນຳພັກ-ລັດເຮົາ ໂດຍມີສະຫາຍ ບຸນຍັງ ວໍລະຈິດ, ເລຂາທິການໃຫຍ່, ຄະນະບໍລິຫານງານສູນກາງພັກ, ປະທານປະເທດ, ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແລະ ສະຫາຍ ບຸນທອງ ຈິດມະນີ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານກວດກາສູນກາງພັກ ໄດ້ຕ້ອນຮັບສະຫາຍ ຟາມ ມິງ ຈິ້ງ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ພ້ອມຄະນະເຂົ້າຢ້ຽມຂ່ຳນັບໃນວັນທີ 29 ສິງຫານີ້ທີ່ນະຄອນຫຼວງວຽງຈັນຕາມລຳດັບ ໃນໂອກາດທີ່ຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນໂອກາດນີ້, ບັນດາຜູ້ນຳເຮົາກໍໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະຜູ້ແທນດັ່ງກ່າວທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ຊຶ່ງຈະເປັນການເພີ່ມພູນຄູນສ້າງສາຍພົວພັນມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ - ຫວຽດນາມ ນັບມື້ກ້າວເຂົ້າສູ່ລວງເລິກ ໂດຍສະເພາະແມ່ນການພົວພັນຮ່ວມມື ລະຫວ່າງສອງຄະນະຈັດຕັ້ງສູນກາງພັກປະຊາຊົນ ປະຕິວັດລາວ ແລະ ສູນກາງພັກກອມມູນິດຫວຽດນາມ; ພ້ອມກັນນັ້ນ, ຍັງອວຍພອນໃຫ້ຄະນະຈົ່ງປະສົບຜົນສຳເລັດໃນການຢ້ຽມຢາມ ແລະ ເຮັດວຽກຢູ່ ສປປ ລາວ ໃນເທື່ອນີ້.
ສະຫາຍຟາມມິງຈິ້ງໄດ້ສະແດງຄວາມຂອບອົກຂອບໃຈຕໍ່ບັນດາຜູ້ນຳເຮົາທີ່ໄດ້ໃຫ້ການຕ້ອນຮັບອັນອົບອຸ່ນແລະສະໜິດສະໜົມໃນຄັ້ງນີ້ແລະພ້ອມທັງແຈ້ງຈຸດປະສົງໃນການເດີນທາງມາຢ້ຽມຢາມລາວໂດຍສະເພາະຜົນການພົບປະສອງຝ່າຍລະຫວ່າງສອງຄະນະຈັດຕັ້ງສູນກາງພັກລາວ-ຫວຽດນາມ ໃຫ້ບັນດາຜູ້ນຳເຮົາໄດ້ຮັບຊາບ.