ເພື່ອ​ເປັນ​ການ​ເພີ່ມ​ທະ​ວີ ແລະ ຮັດ​ແໜ້ນ​ການ​ພົວ​ພັນມິດ​ຕະ​ພາບ ແລະ ເພື່ອອຳນວຍຄວາມສະດວກໃນການເດີນທາງເຂົ້າ-ອອກ ແລະ ພັກເຊົາ ຂອງພົນລະເມືອງສອງປະເທດ, ໃນ​ວັນ​ທີ 24 ກັນ​ຍາ 2016ທີ່ ສຳ​ນັກ​ງານ​ໃຫ​ຍ່ ຂອງອົງ​ການ​ສະ​ຫະ​ປະ​ຊາ​ຊາດ ທີ່​ ນີວຢອກ, ​ສະ​ຫະ​ລັດ ອາ​ເມ​ລິ​ກາ, ໄດ້​ມີ​ພິ​ທີ​ລົງ​ນາມໃນສັນຍາວ່າ​ດ້ວຍ ການ​ຍົກເວັ້ນວີຊາ ສຳລັບຜູ້ທີ່ຖືໜັງສືຜ່ານແດນການທູດ ແລະ ລັດຖະການລະ​ຫວ່າງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ແລະ ສາ​ທາ​ລະ​ນະ​ລັດ ກິຣກິດສະຖານ. ຕາງ​ໜ້າ​ໃຫ້ ລັດ​ຖະ​ບານ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ລົງ​ນາມໃນ​ສັນຍາ​ຄັ້ງ​ນີ້ ແມ່ນ ທ່ານ ​ສະເຫລີມໄຊ ກົມມະສິດ, ລັດ​ຖະ​ມົນ​ຕີ​​​ກະຊວງຕ່າງ​ປະ​ເທດ ແຫ່ງ ສ​ປ​ປ ລາວ ແລະ ຕາງ​ໜ້າ​ໃຫ້ ລັດ​ຖະ​ບານ ສາ​ທາ​ລະ​ນະ​ລັດ ກິຣກິດສະຖານແມ່ນ ທ່ານ ເອີແລນ ອັບດີວດາແອັບ (Erlan Abdyldaev), ລັດ​ຖະ​ມົ​ນຕີ​ກະຊວງຕ່າງ​ປະ​ເທດ ແຫ່ງ ສາ​ທາ​ລະ​ນະ​ລັດ ກິຣກິດສະຖານ. ໂດຍມີບັນດາພະ​ນັກ​ງານ​ການ​ທູດ​ຂອງ​ທັງ​ສອງ​ຝ່າຍ ເຂົ້າ​ຮ່ວມ​ໃນ​ພິ​ທີ​ລົງ​ນາມ​​ດັ່ງ​ກ່າວ.

      ສາທາລະນະລັດປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ແລະ ສາ​ທາ​ລະ​ນະ​ລັດ ກິຣກິດສະຖານ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 13 ມິຖຸນາ 1995. ກິຣກິດສະຖານ ຕັ້ງ​ຢູ່​ອາຊີກາງ ມີຊາຍແດນຕິດກັບ ສປ ຈີນ, ກາຊັກສະຖານ, ທາຈິກິດສະຖານ ແລະ ອູດສະເບກິດສະຖານ. ກິຣກິດສະຖານເປັນ​ປະ​ເທດ​ທີ່​ປົກ​ຄອງ​ດ້ວຍ​ລະ​ບອບ​ສາ​ທາ​ລະ​ນະ​ລັດ ໂດຍ​ມີ ປະ​ທາ​ນາ​ທິ​ບໍ​ດີ ເປັນ​ປະ​ມຸກ​ລັດ, ມີ​ປະ​​ຊາ​ກອນ ປະ​ມານ 5,9 ລ້ານກວ່າ​ຄົນ, ເມືອງ​ຫລວງ​ແມ່ນ ບິດສະເຄກ (Bishkek).