ໃນວັນທີ 23 ກັນຍາ 2016, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ ອາຊຽນ-ສະຫະລັດ ແບບບໍ່ເປັນທາງການ.
ກອງປະຊຸມໄດ້ປຶກສາຫາລື ກ່ຽວກັບການຮ່ວມມື ລະຫວ່າງ ອາຊຽນ ແລະ ສະຫະລັດ ໂດຍສະເພາະແມ່ນໄດ້ຕີລາຄາສູງຕໍ່ຜົນສຳເລັດຂອງກອງປະຊຸມສຸດຍອດ ອາຊຽນ-ສະຫະລັດ ຄັ້ງທີ 4 ຈັດຂຶ້ນໃນ ວັນທີ 8 ກັນຍາ 2016 ທີ່ ນະຄອນຫຼວງວຽງຈັນ, ສປປ ລາວ. ກອງປະຊຸມໄດ້ຢໍ້າຄືນຄໍາໝາຍໝັ້ນຂອງ ສອງຝ່າຍໃນການສືບຕໍ່ເພີ່ມທະວີການຮ່ວມມື ແລະ ປະສານງານຢ່າງໃກ້ຊິດ ລະຫວ່າງ ອາຊຽນ ແລະ ສະຫະລັດ ເພື່ອຮັບປະກັນ ໃຫ້ບັນດາຄຳຕົກລົງຂອງກອງປະຊຸມສຸດຍອດດັ່ງກ່າວ ກໍຄືແຜນປະຕິບັດງານ ອາຊຽນ-ສະຫະລັດ ໄລຍະ ປີ 2016-2020 ໄດ້ຮັບການຈັດຕັ້ງຜັນຂະຫຍາຍຢ່າງເປັນຮູບປະທຳ.
ນອກຈາກນັ້ນ, ກອງປະຊຸມຍັງໄດ້ແລກປ່ຽນຄຳຄິດເຫັນ ກ່ຽວກັບ ບັນຫາສິ່ງທ້າທາຍຕ່າງໆທີ່ເກີດຂຶ້ນຢູ່ໃນພາກພື້ນຕ່າງໆຂອງໂລກເຊັ່ນ: ການກໍ່ການຮ້າຍຂອງລັດທິຫົວຮຸນແຮງ, ບັນຫາອາຊະຍາກຳຂ້າມຊາດ, ບັນຫາແຫຼມເກົາຫຼີ, ການເຄື່ອນຍ້າຍຖິ່ນຖານແບບວົງກວ້າງທີ່ບໍ່ເຄີຍມີມາກ່ອນ, ການປ່ຽນແປງສະ ພາບດິນຟ້າອາກາດ, ໄພພິບັດທຳມະຊາດ, ພະຍາດລະບາດ ແລະ ບັນຫາອື່ນໆທີ່ມີຄວາມເປັນຫ່ວງຮ່ວມກັນ.