ໃນວັນທີ 12 ຕຸລາ 2016, ທີ່ ສະໂມສອນຂອງຄະນະໂຄສະນາອົບຮົມສູນກາງພັກ (ຫຼັກ 6), ໄດ້ມີພິທີປາຖະກະຖາ ກ່ຽວກັບວັນສ້າງຕັ້ງການທູດລາວ 12 ຕຸລາ 1945 ຄົບຮອບ 71 ປີ ແລະ ເຜີຍແຜ່ຜົນສຳເລັດການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ, ເຊິ່ງໃຫ້ກຽດປາຖະກະຖາໂດຍ ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ, ໄດ້ມີບັນດາຄະນະພັກກະຊວງ, ພະນັກງານຂັ້ນນໍາອ້ອມຂ້າງສູນກາງ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມຮັບຟັງ 300 ກວ່າທ່ານ.
ໃນການປະຖະກະຖາຄັ້ງນີ້, ທ່ານ ສະເຫຼີມໄຊ ກົມມະສິດໄດ້ຍົກໃຫ້ເຫັນເຖິງປະຫວັດຄວາມເປັນມາຂອງວັນການທູດລາວ ແລະ ຜົນສຳເລັດອັນໃຫຍ່ຫຼວງຂອງວຽກງານການຕ່າງປະເທດ ແລະ ການທູດ ຂອງພັກ ແລະ ລັດ ເຮົາຍາດມາໄດ້ນັ້ນ ແມ່ນຍ້ອນແນວທາງອັນຖືກຕ້ອງສອດຄ່ອງຂອງພັກເຮົາ, ຍ້ອນການຊີ້ນຳໆພາທີ່ໃກ້ຊິດໂດຍກົງ ຮອບດ້ານຂອງກົມການເມືອງ ໃນແຕ່ລະຍຸກ, ແຕ່ລະສະໄໝ ແລະ ການຮ່ວມແຮງຮ່ວມກັນຈັດຕັ້ງປະຕິບັດຂອງຄະນະບໍລິຫານງານສູນກາງພັກ, ລັດຖະບານ ພ້ອມດ້ວຍຄວາມຮັບຜິດຊອບ ແລະ ການຮ່ວມແຮງຮ່ວມໃຈຂອງພະນັກງານ, ທະຫານ, ຕຳຫຼວດ ແຕ່ສູນກາງລົງຮອດທ້ອງຖິ່ນ ຕະຫຼອດຮອດນັກທຸລະກິດ, ພໍ່ແມ່ປະຊາຊົນລາວໃນທົ່ວປະເທດ ລວມທັງຄົນລາວຢູ່ຕ່າງປະເທດ. ຜ່ານການເຄື່ອນໄຫວການຕ່າງປະເທດ ແລະ ການທູດນັ້ນ ພວກເຮົາສາມາດຕອບໂຕ້ຖ້ອຍທຳນອງໃສ່ຮ້າຍປ້າຍສີຂອງອິດທິກຳລັງປໍລະປັກ ແລະ ກຸ່ມຄົນບໍ່ດີ, ສາມາດປົກປັກຮັກສາອະທິປະໄຕ, ເຂດນ້ຳແດນດິນ ແລະ ຜືນແຜ່ນດິນອັນຄົບຖ້ວນຂອງຊາດ, ສາມາດຊີ້ແຈງອະທິບາຍ, ຍາດແຍ່ງຄວາມເປັນໃຈ ແລະ ການສະໜັບສະໜູນຂອງເພື່ອນມິດສາກົນໄດ້ນັບມືນັບຫຼາຍຂຶ້ນ ເຮັດໃຫ້ ສປປ ລາວ ມີຖານະບົດບາດສູງເດັ່ນຂຶ້ນໃນເວທີພາກພື້ນ ແລະ ສາກົນ ອັນໄດ້ສ້າງເງື່ອນໄຂສະພາບແວດລ້ອມພາຍນອກ ທີ່ເອື້ອອໍານວຍໃຫ້ແກ່ການສ້າງສາພັດທະນາປະເທດຊາດ ໃຫ້ນັບມື້ນັບເຂັ້ມແຂງ, ກ້າວໄປສູ່ເປົ້າໝາຍໃນການນໍາເອົາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ ໃນປີ 2020 ແລະ ສ້າງປະເທດ ໃຫ້ເປັນປະເທດທີ່ມັ່ງຄັ່ງ, ປະຊາຊົນມີຄວາມສຸກ, ສັງຄົມມີຄວາມຍຸຕິທໍາ, ປະຊາທິປະໄຕປອງດອງ ແລະ ສີວິໄລ. ໂດຍປະຕິບັດຕາມແນວນະໂຍບາຍການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມື ບົນພື້ນຖານຕ່າງຝ່າຍຕ່າງມີຜົນປະໂຫຍດ, ສປປ ລາວ ໄດ້ເປີດກວ້າງການພົວພັນຮ່ວມມືກັບບັນດາປະເທດ ແລະ ບັນດາອົງການຈັດຕັ້ງສາກົນຕ່າງໆ, ຊຶ່ງມາຮອດປັດຈຸບັນ ສປປ ລາວ ໄດ້ສ້າງຕັ້ງສາຍພົວພັນການທູດກັບ 139 ປະເທດ, ມີສະຖານທູດຂອງ ສປປ ລາວ ຢູ່ຕ່າງປະເທດ 26 ແຫ່ງ, ມີ 3 ສຳນັກງານຜູ້ຕ່າງໜ້າຖາວອນ, ກົງສູນໃຫຍ່ 9 ແຫ່ງ ແລະ 1 ຫ້ອງການກົງສູນ.
ໃນໂອກາດດັ່ງກ່າວ, ທ່ານ ສະເຫຼີມໄຊກົມມະສິດ ຍັງໄດ້ເຜີຍແຜ່ ກ່ຽວກັບຜົນສຳເລັດໃນການເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ພາຍໃຕ້ຫົວຂໍ້: “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ”. ໃນກອງປະຊຸມສຸດຍອດຄັ້ງນີ້ ໄດ້ຮັບຮອງເອົາ “ຖະແຫຼງການອາຊຽນ ວ່າດ້ວຍ ອາຊຽນເປັນໜຶ່ງດຽວໃນການຕອບໂຕ້ໄພພິບັດ: ອາຊຽນເປັນໜຶ່ງດຽວໃນການຕອບໂຕ້ໄພພິບັດໃນພາກພື້ນ ແລະ ນອກພາກພື້ນ” ແລະ ໄດ້ຮັບຮອງເອົາ ເອກະສານ 8 ສະບັບ ເພື່ອຈັດຕັ້ງຜັນຂະຫຍາຍ 8 ບູລິມາສິດ ຂອງການເປັນປະທານອາຊຽນ ໃນປີ 2016 ກໍ່ຄືວິໄສທັດປະຊາຄົມອາຊຽນ 2025, ໃນນັ້ນ, ອັນສຳຄັນແມ່ນຜູ້ນຳໄດ້ຮັບຮອງເອົາ ແຜນແມ່ບົດການເຊື່ອມຈອດອາຊຽນ 2025 ແລະ ແຜນງານສຳລັບຂໍ້ລິເລີ່ມ ເພື່ອການເຊື່ອມໂຍງອາຊຽນ ສະບັບທີ 3, ເຊິ່ງ ເອກະສານດັ່ງກ່າວ ເປັນພາກສ່ວນໜຶ່ງຂອງວິໄສທັດປະຊາຄົມອາຊຽນ 2025. ຜ່ານການຈັດກອງປະຊຸມສຸດຍອດ ຄັ້ງທີ 28 ແລະ 29 ແບບຄຽງຄູ່ກັນ ແມ່ນໄດ້ຮັບຜົນດີ, ຊຶ່ງ ສປປ ລາວ ສາມາດຈັດທຸກກອງປະຊຸມ ແລະ ກິດຈະກຳໄດ້ຢ່າງຄົບຖ້ວນ ແລະ ມີປະສິດທິພາບ ຈົນໄດ້ຮັບຄຳຍ້ອງຍໍຊົມເຊີຍຈາກບັນດາປະເທດອາຊຽນ ແລະ ບັນດາປະເທດຄູ່ຮ່ວມມືອາຊຽນ, ເຮັດໃຫ້ຖານະບົດບາດທາງການທູດຂອງ ສປປ ລາວ ໃນເວທີພາກພື້ນ ແລະ ສາກົນ ໄດ້ຮັບການຍົກສູງຂຶ້ນສູ່ລະດັບໃໝ່. ນອກຈາກນີ້, ທ່ານລັດຖະມົນຕີຕ່າງປະເທດຍັງໄດ້ຍົກໃຫ້ເຫັນເຖິງຜົນສຳເລັດຂອງການຢ້ຽມຢາມລັດຖະກິດ ສປປ ລາວ ຢ່າງເປັນທາງການຂອງ ປະທານາທິບໍດີ ແຫ່ງ ສະຫະລັດ ອາເມລິກາ; ການຢ້ຽມຢາມ ສປປ ລາວ ຢ່າງເປັນທາງການຂອງ ປະທານາທິບໍດີ ແຫ່ງ ສ.ເກົາຫຼີ ຊຶ່ງການຢ້ຽມຢາມຂອງທັງສອງປະມຸກລັດນີ້ ຖືເປັນການຢ້ຽມຄັ້ງທຳອິດຂອງການນຳຂັ້ນສູງສຸດຂອງ ອາເມລິກາ ແລະ ສ. ເກົາຫຼີ;ການຢ້ຽມຢາມ ສປປ ລາວ ຢ່າງເປັນທາງການຂອງ ນາຍົກລັດຖະມົນຕີ ແຫ່ງ ສປ ຈີນ ແລະ ນາຍົກລັດຖະມົນຕີ ຍີ່ປຸ່ນ,ຊຶ່ງເປັນການເສີມຂະຫຍາຍການພົວພັນຮ່ວມມືທີ່ດີກັບບັນດາປະເທດເພື່ອນມິດກໍຄືປະເທດມະຫາອຳນາດໃນໂລກ.