ວັນ​ທີ 18 ຕຸລາ 2016, ທີ່ ສະຖານ​ເອກ​ອັກ​ຄະ​ລັດ​ຖະ​ທູດ ແຫ່ງ ຣາຊະອານາຈັກໄທ​ ປະຈຳ ​ສປປ ລາວ, ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເຊັນປຶ້ມໄຫວອາໄລ ຕໍ່ເຫດການສິ້ນພະຊົນ ຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ແຫ່ງ ຣາຊະອານາຈັກໄທ ໃນວັນທີ 13 ຕຸລາ 2016 ທີ່ຜ່ານມາ. ການເຊັນປຶ້ມໄຫວ້ອາໄລຄັ້ງນີ້ ມີເນື້ອໃນຂຽນວ່າ: ໃນນາມ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມ ສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ການສິ້ນພະຊົນຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ແຫ່ງ ຣາຊະອານາຈັກໄທ.

ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ເປັນພະຣາຊາທີ່ມີນ້ຳໃຈເສຍສະຫຼະອັນສູງສົ່ງ ແລະ ມີຄຸນງາມຄວາມດີອັນໃຫຍ່ຫຼວງອຸທິດເຫື່ອແຮງໃຫ້ແກ່ປະເທດຊາດ ແລະ ປວງຊົນຊາວໄທຕະຫຼອດໄລຍະ 70 ປີ ທີ່ພະອົງຂຶ້ນຄອງລາດ ເຊິ່ງເຮັດໃຫ້ ພະອົງ ເປັນທີ່ເຄົາລົບຮັກ ແລະ ເປັນທີ່ສັກກາລະບູຊາ ຂອງປວງຊົນຊາວໄທທຸກທົ່ວໜ້າ.

ການຈາກໄປຂອງພະອົງ ເປັນການສູນເສຍຜູ້ເປັນປະມຸກຂອງຊາດໄທ ທັງເປັນການສູນເສຍຜູ້ນຳທີ່ມີວິໄສທັດໃນການພັດທະນາຮອບດ້ານ ເຊິ່ງເປັນທີ່ຮັບຮູ້ຢ່າງກວ້າງຂວາງໃນທົ່ວໂລກ. ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ຍັງປ່ຽມລົ້ນໄປດ້ວຍຄວາມມີພະໄທຕໍ່ຄວາມສຳພັນຖານບ້ານພີ່ເມືອງນ້ອງ, ບ້ານໃກ້ເຮືອນຄຽງ ຕໍ່ ສປປ ລາວ ແລະ ຕໍ່ການເສີມຂະຫຍາຍສາຍພົວພັນທີ່ດີງາມ ລະຫວ່າງ ປະຊາຊົນສອງຊາດ ລາວ-ໄທ ຕະຫຼອດມາ.

ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ຂໍສະແດງຄວາມໄວ້ອາໄລອັນສຸດຊຶ້ງ ແລະ ແບ່ງເບົາຄວາມທຸກໂສກ ມາຍັງ ພະບໍຣົມວົງສານຸວົງທຸກພະອົງ ແລະ ປວງຊົນຊາວໄທພີ່ນ້ອງ ມານະໂອກາດນີ້ດ້ວຍ.

ຂໍໃຫ້ດວງວິນຍານຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດຈົ່ງໄປສູ່ຂະຕິສຸກ.